ਨਵਾਂ ਸ਼ਹਿਰ, 10 ਅਗਸਤ (ਪੋਸਟ ਬਿਊਰੋ)- ਇਸ ਜ਼ਿਲੇ ਦੇ ਪੋਜੇਵਾਲ ਦੇ ਪਿੰਡ ਸੜੋਆ ਦੀ ਰਹਿਣ ਵਾਲੀ ਇੱਕ ਔਰਤ ਨਾਲ ਜਾਅਲਸਾਜ ਨੇ ਫੇਸਬੁਕ 'ਤੇ ਐੱਨ ਆਰ ਆਈ ਦੇ ਨਾਂਅ 'ਤੇ ਜਾਅਲੀ ਆਈ ਡੀ ਬਣਾ ਕੇ ਦੋਸਤੀ ਕਰ ਲਈ ਅਤੇ ਫਿਰ ਵਟਸਐਪ ਨੰਬਰ ਲੈ ਲਿਆ। ਉਸ ਔਰਤ ਨੇ ਵੀ ਜੌਲੀ ਨਾਂਅ 'ਤੇ ਆਪਣੀ ਫੇਸਬੁਕ ਆਈ ਡੀ ਬਣਾਈ ਸੀ। ਦੋਸ਼ੀ ਨੇ ਖੁਦ ਨੂੰ ਲੰਡਨ ਦਾ ਰਹਿਣ ਵਾਲਾ ਦੱਸਿਆ ਅਤੇ ਔਰਤ ਨੂੰ ਪੰਜਾਹ ਹਜ਼ਾਰ ਡਾਲਰ ਭੇਜਣ ਦਾ ਲਾਲਚ ਦੇ ਕੇ ਬੈਂਕ ਅਕਾਊਂਟ ਵਿੱਚ ਦੋ ਲੱਖ ਪੰਜ ਹਜ਼ਾਰ ਰੁਪਏ ਜਮ੍ਹਾਂ ਕਰਵਾ ਲਏ। ਬੈਂਕ ਖਾਤਾ ਧਾਰਕ ਲੁਧਿਆਣਾ ਦੇ ਗਗਨਦੀਪ ਸਿੰਘ 'ਤੇ ਕੇਸ ਦਰਜ ਕੀਤਾ ਗਿਆ ਹੈ, ਜਿਸ ਦੇ ਰਾਹੀਂ ਪੈਸੇ ਜਮ੍ਹਾਂ ਕਰਵਾਏ ਗਏ ਹਨ।
ਆਪਣੀ ਸ਼ਿਕਾਇਤ ਵਿੱਚ ਪਿੰਡ ਸੜੋਆ ਦੀ ਰੇਸ਼ਮਾ ਦੇਵੀ ਨੇ ਦੱਸਿਆ ਕਿ ਉਸ ਨੇ ਫੇਸਬੁਕ 'ਤੇ ਸੁਮਾਈ ਕੁਮਾਰ ਦੇ ਨਾਂਅ ਦੀ ਆਈ ਡੀ ਬਣਾਈ ਹੈ। ਫੇਸਬੁਕ 'ਤੇ ਉਸ ਦੀ ਪਛਾਣ ਜੋਹਨ ਡੇਵਿਟ ਨਾਂਅ ਦੇ ਇੱਕ ਵਿਅਕਤੀ ਨਾਲ ਹੋਈ। ਦੋਵਾਂ ਦੀ ਫੇਸਬੁਕ 'ਤੇ ਦੋਸਤੀ 27 ਮਈ ਨੂੰ ਹੋਈ ਸੀ। ਫੇਸਬੁਕ ਤੋਂ ਉਸ ਦਾ ਨੰਬਰ ਲਿਆ ਅਤੇ ਦੋ ਜੂਨ ਨੂੰ ਫੋਨ 'ਤੇ ਗੱਲ ਕੀਤੀ। ਇਸ ਦੇ ਬਾਅਦ ਔਰਤ ਨੇ ਉਸ ਦੇ ਦੱਸੇ ਖਾਤੇ ਵਿੱਚ ਦੋ ਲੱਖ ਪੰਜ ਹਜ਼ਾਰ ਰੁਪਏ ਜਮ੍ਹਾਂ ਕਰਾ ਦਿੱਤੇ। ਬਾਅਦ ਵਿੱਚ ਜਦ ਦੋਸ਼ੀ ਨੇ ਹੋਰ ਪੈਸਿਆਂ ਦੀ ਮੰਗ ਕੀਤੀ ਤਾਂ ਔਰਤ ਨੇ ਮਨ੍ਹਾ ਕਰ ਦਿੱਤਾ। ਨਾਭਾ ਥਾਣਾ ਕੋਤਵਾਲੀ ਦੀ ਪੁਲਸ ਨੇ ਤਿੰਨ ਜਣਿਆਂ ਖਿਲਾਫ ਜਾਅਲੀ ਫੇਸਬੁਕ ਆਈ ਡੀ ਬਣਾ ਕੇ 19 ਲੱਖ ਰੁਪਏ ਠੱਗਣ 'ਤੇ ਕੇਸ ਦਰਜ ਕੀਤਾ ਹੈ। ਪੁੱਡਾ ਕਾਲੋਨੀ ਦੇ ਅਸ਼ਵਨੀ ਕੁਮਾਰ ਦੀ ਸ਼ਿਕਾਇਤ 'ਤੇ ਸ਼ਾਮ ਸਿੰਘ, ਇਮਤਿਆਜ਼, ਮਹਿਸਿਰ ਖਾਨ 'ਤੇ ਕੇਸ ਦਰਜ ਕੀਤਾ ਗਿਆ ਹੈ।