ਨਵੀਂਂ ਦਿੱਲੀ, 10 ਅਗਸਤ (ਪੋਸਟ ਬਿਊਰੋ)- ਭਾਰਤ ਦੇ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਕੱਲ੍ਹ ਐਲਾਨ ਕੀਤਾ ਹੈ ਕਿ ‘ਆਤਮ ਨਿਰਭਰ ਭਾਰਤ' ਪਹਿਲ ਵਜੋਂ ਦੇਸ਼ ਵਿੱਚ ਰੱਖਿਆ ਸਾਮਾਨ ਦਾ ਉਤਪਾਦਨ ਵਧਾਉਣ ਲਈ 101 ਫੌਜ ਯੰਤਰਾਂ ਦੀ ਇੰਪੋਰਟ 'ਤੇ ਰੋਕ ਲਾਈ ਜਾਵੇਗੀ। ਇਨ੍ਹਾਂ ਹਥਿਆਰਾਂ ਅਤੇ ਸਾਮਾਨ ਵਿੱਚ ਅਸਾਟਲ ਰਾਈਫਲਾਂ ਅਤੇ ਤੋਪਾਂ ਤੋਂ ਆਵਾਜਾਈ ਦੇ ਵਾਹਨ, ਜਹਾਜ਼ ਅਤੇ ਮਿਜ਼ਾਈਲ ਤੱਕ ਸ਼ਾਮਲ ਹਨ।
ਰੱਖਿਆ ਮੰਤਰਾਲੇ ਨੇ ਇਨ੍ਹਾਂ 101 ਉਤਪਾਦਾਂ ਦੀ ਲਿਸਟ ਜਾਰੀ ਕਰ ਦਿੱਤੀ ਹੈ। ਇਸ ਕਦਮ ਦਾ ਮਕਸਦ ਡਿਫੈਂਸ ਇੰਡਸਟਰੀ ਨੂੰ ਇਹ ਜਤਾਉਣਾ ਹੈ ਕਿ ਉਸ ਨੂੰ ਜਿਨ੍ਹਾਂ-ਜਿਨ੍ਹਾਂ ਚੀਜ਼ਾਂ ਦੀ ਜ਼ਰੂਰਤ ਹੈ, ਉਨ੍ਹਾਂ ਨੂੰ ਉਹ ਖੁਦ ਤਿਆਰ ਕਰਨ। ਸਾਰੇ ਸਟੇਕ ਹੋਲਡਰਜ਼ ਨਾਲ ਕਈ ਦੌਰ ਦੀ ਗੱਲਬਾਤ ਤੋਂ ਬਾਅਦ ਇਹ ਲਿਸਟ ਬਣਾਈ ਗਈ ਹੈ। ਮੰਤਰਾਲੇ ਨੇ 2020-21 ਦੇ ਕੈਪਿਟਲ ਪ੍ਰੋਕਿਓਰਮੈਂਟ ਬਜਟ 'ਚ ਘਰੇਲੂ ਅਤੇ ਵਿਦੇਸ਼ੀ ਕੈਪਿਟਨ ਪ੍ਰੋਕਿਓਰਮੈਂਟ ਲਈ ਵੰਡ ਕਰ ਦਿੱਤੀ ਹੈ। ਨਾਲ ਹੀ ਚਾਲੂ ਵਿੱਤ ਸਾਲ 'ਚ ਘਰੇਲੂ ਪੂੰਜੀਗਤ ਖ਼ਰੀਦ ਲਈ ਲੱਗਭਗ 52,000 ਕਰੋੜ ਰੁਪਏ ਦਾ ਵੱਖਰਾ ਬਜਟ ਬਣਾਇਆ ਗਿਆ ਹੈ। 101 ਰੱਖਿਆ ਯੰਤਰਾਂ ਦੇ ਇੰਪੋਰਟ ਉੱਤੇ ਪਾਬੰਦੀ ਕਾਰਨ ਅਗਲੇ 5 ਤੋਂ 7 ਸਾਲਾਂ ਅੰਦਰ ਘਰੇਲੂ ਉਦਯੋਗ 'ਚ ਲੱਗਭਗ ਚਾਰ ਲੱਖ ਕਰੋੜ ਰੁਪਏ ਦੇ ਠੇਕੇ ਦਿੱਤਾ ਜਾਣਗੇ। ਅਨੁਮਾਨਤ ਤੌਰ 'ਤੇ ਇਨ੍ਹਾਂ 'ਚੋਂ ਫੌਜ ਅਤੇ ਹਵਾਈ ਫੌਜ ਲਈ ਲੱਗਭਗ 1.3 ਲੱਖ ਕਰੋੜ ਰੁਪਏ ਦੇ ਯੰਤਰ ਅਤੇ 1.4 ਲੱਖ ਕਰੋੜ ਰੁਪਏ ਦੇ ਯੰਤਰ ਜਲ ਸੈਨਾ ਲਈ ਹੋਣਗੇ।