ਲਖਨਊ, 10 ਅਗਸਤ (ਪੋਸਟ ਬਿਊਰੋ)- ਭਾਜਪਾ ਵਿਧਾਇਕ ਕ੍ਰਿਸ਼ਨਾਨੰਦ ਰਾਏ ਦੇ ਕਤਲ ਦਾ ਦੋਸ਼ੀ ਇੱਕ ਲੱਖ ਰੁਪਏ ਦਾ ਇਨਾਮੀ ਬਦਮਾਸ਼ ਹਨੂੰਮਾਨ ਪਾਂਡੇ ਉਤਰ ਪ੍ਰਦੇਸ਼ ਪੁਲਸ ਦੀ ਸਪੈਸ਼ਲ ਟਾਸਕ ਫ਼ੋਰਸ (ਐਸ ਟੀ ਐਫ਼) ਨਾਲ ਮੁਕਾਬਲੇ 'ਚ ਮਾਰਿਆ ਗਿਆ। ਇਸ ਬਾਰੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਐਸ ਟੀ ਐਫ਼ ਦੇ ਸੂਤਰਾਂ ਨੇ ਦੱਸਿਆ ਕਿ ਮਾਫ਼ੀਆ ਡਾਨ ਮੁਖ਼ਤਾਰ ਅੰਸਾਰੀ ਦਾ ਕਰੀਬੀ ਮੰਨਿਆ ਜਾਂਦਾ ਹਨੂੰਮਾਨ ਪਾਂਡੇ ਉਰਫ਼ ਰਾਕੇਸ਼ ਪਾਂਡੇ ਲਖਨਊ ਦੇ ਸਰੋਜਨੀ ਨਗਰ ਇਲਾਕੇ 'ਚ ਕੱਲ੍ਹ ਸਵੇਰੇ ਮੁਕਾਬਲੇ 'ਚ ਮਾਰਿਆ ਗਿਆ ਜਦ ਕਿ ਉਸ ਦੇ ਚਾਰ ਸਾਥੀ ਦੌੜਨ 'ਚ ਕਾਮਯਾਬ ਰਹੇ। ਪਾਂਡੇ ਸਾਲ 2005 ਵਿੱਚ ਗਾਜੀਪੁਰ ਜ਼ਿਲ੍ਹੇ ਦੇ ਭਾਂਵਰ ਕੋਲ ਇਲਾਕੇ 'ਚ ਭਾਜਪਾ ਵਿਧਾਇਕ ਕ੍ਰਿਸ਼ਨਾਨੰਦ ਰਾਏ ਦੇ ਕਤਲ ਦੇ ਮਾਮਲੇ 'ਚ ਦੋਸ਼ੀ ਸੀ। ਉਹ ਬਾਗਪਤ ਜ਼ੇਲ੍ਹ ਵਿੱਚ ਮਾਰੇ ਗਏ ਮੁੰਨਾ ਬਜਰੰਗੀ ਦਾ ਵੀ ਕਰੀਬੀ ਦੱਸਿਆ ਜਾਂਦਾ ਸੀ। ਐਸ ਟੀ ਐਫ਼ ਦੇ ਸੂਤਰਾਂ ਮੁਤਾਬਕ ਸਰੋਜਨੀ ਨਗਰ ਇਲਾਕੇ 'ਚ ਇੱਕ ਕਾਰ 'ਚ ਸਵਾਰ ਪੰਜ ਬਦਮਾਸ਼ ਦੌੜ ਰਹੇ ਸਨ। ਪਿੱਛਾ ਕਰਨ ਉਤੇ ਬਦਮਾਸ਼ਾਂ ਨੇ ਐਸ ਟੀ ਐਫ਼ ਟੀਮ 'ਤੇ ਗੋਲੀ ਚਲਾਈ। ਜਵਾਬੀ ਕਾਰਵਾਈ 'ਚ ਇੱਕ ਬਦਮਾਸ਼ ਦੀ ਮੌਤ ਹੋ ਗਈ, ਜਿਸ ਦੀ ਪਛਾਣ ਹਨੂੰਮਾਨ ਪਾਂਡੇ ਵਜੋਂ ਹੋਈ ਹੈ। ਉਨ੍ਹਾਂ ਦੱਸਿਆ ਕਿ ਐਸ ਟੀ ਐਫ਼ ਨੂੰ ਪਾਂਡੇ ਦੀ ਲੰਮੇ ਸਮੇਂ ਤੋਂ ਭਾਲ ਸੀ। ਉਸ 'ਤੇ ਇੱਕ ਲੱਖ ਰੁਪਏ ਦਾ ਇਨਾਮ ਐਲਾਨ ਸੀ। ਉਸ ਵਿਰੁਧ ਕਤਲ, ਲੁੱਟ ਅਤੇ ਹੋਰ ਵਾਰਦਾਤ ਦੇ ਕਰੀਬ 10 ਮਾਮਲੇ ਦਰਜ ਸਨ।