ਵਿਜੈਵਾੜਾ, 10 ਅਗਸਤ (ਪੋਸਟ ਬਿਊਰੋ)- ਆਂਧਰਾ ਪ੍ਰਦੇਸ਼ ਵਿੱਚ ਵਿਜੈਵਾੜਾ ਦੇ ਸਵਰਣ ਪੈਲੇਸ ਹੋਟਲ ਵਿਚਲੇ ਕੋਵਿਡ ਕੇਅਰ ਸੈਂਟਰ ਵਿੱਚ ਕੱਲ੍ਹ ਸਵੇਰੇ ਅੱਗ ਲੱਗਣ ਨਾਲ 10 ਮਰੀਜ਼ਾਂ ਦੀ ਮੌਤ ਹੋ ਗਈ ਅਤੇ ਦੋ ਮਰੀਜ਼ ਲਾਪਤਾ ਹਨ।
ਪੁਲਸ ਸੁਪਰਡੈਂਟ ਬੀ ਸ੍ਰੀਨਿਵਾਸੁਲੁ ਨੇ ਦੱਸਿਆ ਕਿ ਹੋਟਲ ਵਿਚਲੇ ਕਵਾਰੰਟਾਈਨ ਕੇਂਦਰ ਵਿੱਚ ਕੁੱਲ ਤੀਹ ਮਰੀਜ਼ ਸਨ। 18 ਮਰੀਜ਼ਾਂ ਨੂੰ ਸੁਰੱਖਿਅਤ ਕੱਢ ਲਿਆ ਗਿਆ। ਇਸ ਦੇ ਇਲਾਵਾ ਦੋ ਹੋਰਨਾਂ ਦਾ ਅਜੇ ਤੱਕ ਕੋਈ ਪਤਾ ਨਹੀਂ ਲੱਗ ਸਕਿਆ। ਅਧਿਕਾਰਕ ਸੂਤਰਾਂ ਨੇ ਦੱਸਿਆ ਕਿ ਇੱਕ ਨਿੱਜੀ ਹਸਪਤਾਲ ਨੇ ਸਵਰਣ ਪੈਲੇਸ ਹੋਟਲ ਨੂੰ ਕੋਰੋਨਾ ਰੋਗੀਆਂ ਦੇ ਇਲਾਜ ਲਈ ਕਿਰਾਏ 'ਤੇ ਲਿਆ ਸੀ ਅਤੇ ਇਥੇ ਕੋਵਿਡ ਕੇਅਰ ਸੈਂਟਰ ਸਥਾਪਤ ਕੀਤਾ ਸੀ।