ਕੋਲੰਬੋ, 10 ਅਗਸਤ (ਪੋਸਟ ਬਿਊਰੋ)- ਸ੍ਰੀਲੰਕਾ ਦੇ ਸਾਬਕਾ ਰਾਸ਼ਟਰਪਤੀ ਮਹਿੰਦਾ ਰਾਜਪਕਸ਼ੇ ਨੇ ਕੱਲ੍ਹ ਪ੍ਰਧਾਨ ਮੰਤਰੀ ਦੇ ਅਹੁਦੇ ਦੀ ਸਹੁੰ ਚੁੱਕੀ। ਉਨ੍ਹਾਂ ਦੇ ਛੋਟੇ ਭਰਾ ਤੇ ਰਾਸ਼ਟਰਪਤੀ ਗੋਤਬਾਯਾ ਰਾਜਪਕਸ਼ੇ ਨੇ ਉੱਤਰੀ ਕੋਲੰਬੋ ਦੇ ਉਪ ਨਗਰ ਕੈਲਾਨੀਆਂ ਵਿੱਚ ਰਾਜਮਹਾ ਵਿਹਾਰਿਆ (ਬੋਧੀ ਮੰਦਰ) ਵਿੱਚ 74 ਸਾਲਾਂ ਦੇ ਮਹਿੰਦਾ ਰਾਜਪਕਸ਼ੇ ਨੂੰ ਸਹੁੰ ਚੁਕਾਈ। ਇਸ ਸਾਲ ਜੁਲਾਈ ਵਿੱਚ ਮਹਿੰਦਾ ਰਾਜਪਕਸ਼ੇ ਨੇ ਆਪਣੇ ਪਾਰਲੀਮੈਂਟਰੀ ਰਾਜਨੀਤੀ ਦੇ 50 ਸਾਲ ਪੂਰੇ ਕੀਤੇ ਹਨ।
ਸਾਲ 1970 ਵਿੱਚ 24 ਸਾਲ ਦੀ ਉਮਰ ਵਿੱਚ ਪਹਿਲੀ ਵਾਰ ਮਹਿੰਦਾ ਰਾਜਪਕਸ਼ੇ ਐਮ ਪੀ ਚੁਣੇ ਗਏ ਸਨ। ਤਦ ਤੋਂ ਲੈ ਕੇ ਉਹ ਮਹਿੰਦਾ ਦੋ ਵਾਰ ਰਾਸ਼ਟਰਪਤੀ ਅਤੇ ਤਿੰਨ ਵਾਰ ਸ੍ਰੀਲੰਕਾ ਦੇ ਪ੍ਰਧਾਨ ਮੰਤਰੀ ਬਣ ਚੁੱਕੇ ਹਨ। ਮਹਿੰਦਾ ਰਾਜਪਕਸ਼ੇ ਦੀ ਪਾਰਟੀ ਐੱਸ ਐੱਲ ਪੀ ਪੀ ਨੇ ਪੰਜ ਅਗਸਤ ਨੂੰ ਹੋਈ ਚੋਣ ਵਿੱਚ ਦੋ-ਤਿਹਾਈ ਬਹੁਮਤ ਹਾਸਲ ਕੀਤਾ ਹੈ। ਇਸ ਬਹੁਮਤ ਦੇ ਆਧਾਰ 'ਤੇ ਪਾਰਟੀ ਸੰਵਿਧਾਨ ਵਿੱਚ ਸੋਧ ਕਰ ਸਕੇਗੀ, ਜੋ ਸ਼ਕਤੀਸ਼ਾਲੀ ਰਾਜਪਕਸ਼ੇ ਪਰਵਾਰ ਦੀ ਸੱਤਾ 'ਤੇ ਪਕੜ ਨੂੰ ਹੋਰ ਮਜ਼ਬੂਤ ਕਰੇਗੀ। ਮਹਿੰਦਾ ਨੂੰ ਪੰਜ ਲੱਖ ਤੋਂ ਵੱਧ ਨਿਜੀ ਸੀਨੀਅਰ ਵੋਟ ਮਿਲੇ। ਚੋਣ ਇਤਿਹਾਸ ਵਿੱਚ ਪਹਿਲੀ ਵਾਰ ਕਿਸੇ ਉਮੀਦਵਾਰ ਨੂੰ ਏਨੇ ਵੋਟ ਮਿਲੇ ਹਨ। ਸ੍ਰੀਲੰਕਾ ਪੀਪਲਜ਼ ਪਾਰਟੀ ਨੇ 225 ਸੀਟਾਂ ਵਿੱਚੋਂ 145 'ਤੇ ਜਿੱਤ ਗਈ ਹੈ। ਜੇ ਸਹਿਯੋਗੀਆਂ ਨੂੰ ਮਿਲੀਆਂ ਸੀਟਾਂ ਨੂੰ ਵੀ ਮਿਲਾ ਲਿਆ ਜਾਵੇ ਤਾਂ ਇਹ ਗਿਣਤੀ 150 ਹੋ ਜਾਂਦੀ ਹੈ।