ਮਹਾਰਾਜਗੰਜ, 10 ਅਗਸਤ (ਪੋਸਟ ਬਿਊਰੋ)- ਨੇਪਾਲ ਦੇ ਪ੍ਰਧਾਨ ਮੰਤਰੀ ਕੇ ਪੀ ਸ਼ਰਮਾ ਓਲੀ ਨੇ ਫਿਰ ਅਯੁੱਧਿਆ ਰਾਗ ਅਲਾਪਿਆ ਅਤੇ ਅਸਲੀ ਅਯੁੱਧਿਆ ਦੇ ਨੇਪਾਲ ਦੇ ਚਿਤਵਨ ਵਾਲੇ ਮਾਡੀ ਇਲਾਕੇ ਦੇ ਅਯੁੱਧਿਆਪੁਰੀ ਹੋਣ ਦਾ ਦਾਅਵਾ ਕਰਦਿਆਂ ਕਿਹਾ ਕਿ ਉਥੇ ਰਾਮ ਦੀ ਮੂਰਤੀ ਬਣਾ ਕੇ ਇਲਾਕੇ ਨੂੰ ਵਿਕਸਤ ਕਰਨ ਲਈ ਮਾਸਟਰ ਪਲਾਨ ਤਿਆਰ ਕਰਾਂਗੇ। ਮਾਡੀ ਖੇਤਰ ਮਹਾਰਾਜਗੰਜ ਜ਼ਿਲਾ ਹੈੱਡਕੁਆਰਟਰ ਤੋਂ ਕਰੀਬ 186 ਕਿਲੋਮੀਟਰ ਦੂਰ ਹੈ।
ਚਿਤਵਨ ਦੀ ਮਾਡੀ ਨਗਰ ਪਾਲਿਕਾ ਦੇ ਚੇਅਰਮੈਨ ਸ਼ਿਵਹਰੀ ਸੂਬੇਦਾਰ ਤੇ ਠਾਕੁਰ ਪ੍ਰਸਾਦ ਢਕਾਲ ਨੇ ਦੱਸਿਆ ਕਿ ਚਿਤਵਨ ਦੇ ਅਧਿਕਾਰੀਆਂ ਤੇ ਲੋਕ ਪ੍ਰਤੀਨਿਧਾਂ ਨਾਲ ਪ੍ਰਧਾਨ ਮੰਤਰੀ ਓਲੀ ਨੇ ਦੋ ਘੰਟੇ ਤੱਕ ਫੋਨ ਉੱਤੇ ਗੱਲਬਾਤ ਕੀਤੀ, ਜਿਸ ਦੌਰਾਨ ਪ੍ਰਧਾਨ ਮੰਤਰੀ ਓਲੀ ਨੇ ਉਥੇ ਖੁਦਾਈ ਕਾਰਜ ਕਰਵਾਉਣ ਦਾ ਨਿਰਦੇਸ਼ ਦਿੱਤਾ ਹੈ। ਓਲੀ ਨੇ ਕਿਹਾ ਕਿ ਸਾਰੇ ਸਬੂਤ ਸਾਬਿਤ ਕਰਦੇ ਹਨ ਕਿ ਭਗਵਾਨ ਰਾਮ ਦਾ ਜਨਮ ਨੇਪਾਲ ਦੀ ਅਯੁੱਧਿਆਪੁਰੀ ਵਿੱਚ ਹੋਇਆ ਸੀ। ਓਲੀ ਦਾ ਇਹ ਦਾਅਵਾ ਓਦੋਂ ਆਇਆ ਹੈ ਜਦੋਂ ਭਰਾਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਬੀਤੇ ਦਿਨੀਂ ਰਾਮ ਮੰਦਰ ਬਣਾਉਣ ਲਈ ਅਯੁੱਧਿਆ 'ਚ ਭੂਮੀ ਪੂਜਨ ਕੀਤਾ ਹੈ। ਨੇਪਾਲੀ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਭਗਵਾਨ ਰਾਮ ਦਾ ਜਨਮ ਸਥਾਨ ਭਾਰਤ ਦੀ ਅਯੁੱਧਿਆ ਨਹੀਂ, ਨੇਪਾਲ ਦੀ ਅਯੁੱਧਿਆਪੁਰੀ ਹੈ। ਉਨ੍ਹਾਂ ਨੇ ਸਥਾਨਕ ਅਧਿਕਾਰੀਆਂ ਨੂੰ ਅਯੁੱਧਿਆਪੁਰੀ ਦਾ ਪ੍ਰਚਾਰ ਕਰਨ ਅਤੇ ਇਤਿਹਾਸਕ ਸਬੂਤਾਂ ਦੀ ਸਾਂਭ ਸੰਭਾਲ ਕਰਨ ਨੂੰ ਕਿਹਾ ਹੈ। ਨੈਸ਼ਨਲ ਅਸੈਂਬਲੀ ਮੈਂਬਰ ਦਿਲ ਕੁਮਾਰੀ ਰਾਵਲ ਨੇ ਦੱਸਿਆ ਕਿ ਪ੍ਰਧਾਨ ਮੰਤਰੀ ਓਲੀ ਨੇ ਅਯੁੱਧਿਆਪੁਰੀ ਦੇ ਆਲੇ ਦੁਆਲੇ ਦੇ ਇਲਾਕਿਆਂ ਦੀ ਸਾਂਭ ਸੰਭਾਲ ਦਾ ਨਿਰਦੇਸ਼ ਦਿੱਤਾ ਹੈ। ਇਸ ਤੋਂ ਬਾਅਦ ਅਯੁੱਧਿਆਪੁਰੀ ਵਿਕਸਤ ਕਰਨ ਦੇ ਯਤਨ ਆਰੰਭ ਹੋ ਗਏ ਹਨ।