ਅੰਮ੍ਰਿਤਸਰ, 9 ਅਗਸਤ (ਪੋਸਟ ਬਿਊਰੋ)- ਪਿੰਡ ਇੱਬਨ ਕਲਾਂ ਵਿੱਚ ਪਟਾਕਾ ਫੈਕਟਰੀ ਵਿੱਚ ਕੱਲ੍ਹ ਸਵੇਰੇ ਧਮਾਕਾ ਹੋ ਗਿਆ, ਜਿਹੜਾ ਇੰਨਾ ਜ਼ਬਰਦਸਤ ਸੀ ਕਿ ਫੈਕਟਰੀ ਦੀਆਂ ਛੱਤਾਂ ਦਾ ਮਲਬਾ ਆਸਪਾਸ ਖੇਤਾਂ ਵਿੱਚ 500 ਮੀਟਰ ਤੱਕ ਦੂਰ ਜਾ ਕੇ ਡਿੱਗਾ। ਇਸ ਧਮਾਕੇ ਦੌਰਾਨ ਕਿਸੇ ਦੀ ਮੌਤ ਦੀ ਖਬਰ ਨਹੀਂ ਹੈ।
ਇਸ ਪਿੱਛੋਂ ਨਗਰ ਨਿਗਮ ਅਤੇ ਢਾਬ ਬਸਤੀ ਰਾਮ ਸੇਵਾ ਸੁਸਾਇਟੀ ਦੀਆਂ ਗੱਡੀਆਂ ਨੇ ਅੱਗ 'ਤੇ ਕਾਬੂ ਪਾਇਆ। ਥਾਣਾ ਇੰਚਾਰਜ ਨੇ ਦੱਸਿਆ ਕਿ ਇਹ ਫੈਕਟਰੀ ਤਲਵਿੰਦਰ ਜੌਲੀ ਨਾਂਅ ਦੇ ਵਿਅਕਤੀ ਦੀ ਹੈ ਤੇ ਇਸ ਦੇ ਚਾਰ ਕਮਰਿਆਂ ਵਿੱਚ ਬਾਰੂਦ ਭਰਿਆ ਪਿਆ ਸੀ, ਜਿਸ ਵਿੱਚ ਧਮਾਕਾ ਹੋਇਆ ਹੈ। ਧਮਾਕੇ ਤੋਂ ਬਾਅਦ ਫੈਕਟਰੀ ਮਾਲਕ ਅਤੇ ਮਜ਼ਦੂਰ ਫਰਾਰ ਹੋ ਗਏ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਡੇਢ ਸਾਲ ਪਹਿਲਾਂ ਵੀ ਫੈਕਟਰੀ ਵਿੱਚ ਅੱਗ ਲੱਗੀ ਸੀ, ਪਰ ਪੁਲਸ ਨੇ ਕੋਈ ਕਾਰਵਾਈ ਨਹੀਂ ਕੀਤੀ। ਪੁਲਸ ਨੂੰ ਇਲਾਕੇ ਦੀਆਂ ਤਿੰਨ-ਚਾਰ ਫੈਕਟਰੀਆਂ ਨੂੰ ਬੰਦ ਕਰਵਾਉਣਾ ਚਾਹੀਦਾ ਹੈ।