ਮਧੇਪੁਰਾ, 9 ਅਗਸਤ (ਪੋਸਟ ਬਿਊਰੋ)- ਬਿਹਾਰ ਦੇ ਮਧੇਪੁਰਾ ਦੇ ਕਰਪੂਰੀ ਠਾਕੁਰ ਮੈਡੀਕਲ ਕਾਲਜ ਤੋਂ ਪਟਨਾ ਲਈ ਰੈਫਰ ਕੀਤੇ ਇੱਕ ਗੰਭੀਰ ਮਰੀਜ਼ ਦੀ ਸਿਰਫ 35 ਕਿਲੋਮੀਟਰ ਦੇ ਬਾਅਦ ਆਕਸੀਜਨ ਖਤਮ ਹੋਣ ਕਾਰਨ ਤਿ੍ਰਵੇਣੀਗੰਜ ਵਿੱਚ ਮੌਤ ਹੋ ਗਈ, ਓਦੋਂ ਅਜੇ ਪੌਣੇ ਤਿੰਨ ਸੌ ਕਿਲੋਮੀਟਰ ਦੀ ਯਾਤਰਾ ਰਹਿੰਦੀ ਸੀ। ਇਸ ਘਟਨਾ ਦੇ ਬਾਅਦ ਐਂਬੂਲੈਂਸ ਦੇ ਦੋਵੇਂ ਡਰਾਈਵਰ ਫਰਾਰ ਹੋ ਗਏ। ਇਸ ਕਾਰਨ ਤਿ੍ਰਵੇਣੀਗੰਜ ਵਿੱਚ ਚਾਰ ਘੰਟੇ ਤੱਕ ਲਾਸ਼ ਐਂਬੂਲੈਂਸ ਵਿੱਚ ਪਈ ਰਹੀ। ਮ੍ਰਿਤਕ ਦੀ ਪਛਾਣ ਅਰਰੀਆ ਜ਼ਿਲੇ ਦੇ ਨਰਪਤਗੰਜ ਦੇ ਮਧੁਰਾ ਦੱਖਣੀ ਪੰਚਾਇਤ ਦੇ ਵਾਰਡ ਨੰਬਰ ਚਾਰ ਵਾਸੀ ਬਲਦੇਵ ਲਾਲ ਦੇਵ ਦੇ ਰੂਪ ਵਿੱਚ ਕੀਤੀ ਗਈ ਹੈ।
ਮ੍ਰਿਤਕ ਦੇ ਪੋਤਰੇ ਆਯੁਸ਼ ਦੇਵ ਨੇ ਦੱਸਿਆ ਕਿ ਉਸ ਦੇ 85 ਸਾਲਾ ਦਾਦਾ ਨੂੰ 29 ਜੁਲਾਈ ਨੂੰ ਕੋਰੋਨਾ ਪਾਜ਼ੀਟਿਵ ਦੱਸਿਆ ਗਿਆ ਸੀ। ਉਹ ਸ਼ੂਗਰ ਦੇ ਮਰੀਜ਼ ਸਨ। ਇਸ ਪਿੱਛੋਂ ਉਨ੍ਹਾਂ ਨੂੰ ਫਾਰਬਿਸਗੰਜ ਆਈਸੋਲੇਸ਼ਨ ਸੈਂਟਰ ਵਿੱਚ ਭਰਤੀ ਕਰਾਇਆ ਗਿਆ, ਪਰ ਉਥੇ ਕਿਹਾ ਗਿਆ ਕਿ ਮਰੀਜ਼ ਨੂੰ ਵੈਂਟੀਲੇਟਰ ਦੀ ਲੋੜ ਪੈ ਸਕਦੀ ਹੈ, ਇਸ ਲਈ ਮਧੇਪੁਰਾ ਮੈਡੀਕਲ ਕਾਲਜ ਰੈਫਰ ਕਰ ਦਿੱਤਾ ਗਿਆ। ਆਯੁਸ਼ ਨੇ ਦੱਸਿਆ ਕਿ ਦਾਦਾ ਨੂੰ ਦੋ ਅਗਸਤ ਨੂੰ ਮੈਡੀਕਲ ਕਾਲਜ ਭਰਤੀ ਕਰਾਇਆ ਗਿਆ। ਇਸ ਦੌਰਾਨ ਛੇ ਅਤੇ ਸੱਤ ਅਗਸਤ ਨੂੰ ਉਨ੍ਹਾਂ ਦੀ ਰਿਪੋਰਟ ਨੈਗੇਟਿਵ ਆਈ, ਪਰ ਕੱਲ੍ਹ ਸਿਹਤ ਵੱਧ ਖਰਾਬ ਹੋ ਗਈ ਤਾਂ ਉਨ੍ਹਾਂ ਨੂੰ ਪਟਨਾ ਲਈ ਰੈਫਰ ਕੀਤਾ ਗਿਆ। ਉਨ੍ਹਾਂ ਨੇ ਦੱਸਿਆ ਕਿ ਮੈਡੀਕਲ ਕਾਲਜ ਦੇ ਐਂਬੂਲੈਂਸ ਦੇ ਡਰਾਈਵਰ ਨੇ ਕਿਹਾ ਕਿ ਆਕਸੀਜਨ ਦਾ ਵੱਡਾ ਸਿਲੰਡਰ ਹੈ, 12 ਘੰਟੇ ਚੱਲੇਗਾ ਹੀ। ਸਵੇਰੇ ਲਗਭਗ ਨੌਂ ਵਜੇ ਉਹ ਲੋਕ ਦਾਦਾ ਨੂੰ ਲੈ ਕੇ ਐਂਬੂਲੈਂਸ ਤੋਂ ਤਿ੍ਰਵੇਣੀਗੰਜ, ਜਦੀਆ ਹੁੰਦੇ ਹੋਏ ਫੋਰਲੇਨ ਰਸਤੇ ਪਟਨਾ ਜਾ ਰਹੇ ਸਨ ਤਾਂ ਤਿ੍ਰਵੇਣੀਗੰਜ ਦੁਰਗਾ ਸਥਾਨ ਪਹੁੰਚ ਕੇ ਉਹ ਲੋਕ ਇੱਕ ਅਟੈਂਡੈਂਟ ਨੂੰ ਲੈਣ ਲੱਗੇ ਤਾਂ ਐਂਬੂਲੈਂਸ ਦੇ ਡਰਾਈਵਰ ਨੇ ਕਿਹਾ ਕਿ ਆਕਸੀਜਨ ਖਤਮ ਹੋ ਗਈ ਹੈ। ਫਿਰ ਉਹ ਲੋਕ ਮਰੀਜ਼ ਨੂੰ ਲੈ ਕੇ ਤਿ੍ਰਵੇਣੀਗੰਜ ਦੇ ਹਸਪਤਾਲ ਗਏ, ਪਰ ਉਥੇ ਪਹੁੰਚਣ ਤੋਂ ਪਹਿਲਾਂ ਹੀ ਮਰੀਜ਼ ਦੀ ਮੌਤ ਹੋ ਚੁੱਕੀ ਸੀ। ਇਸ ਗੱਲ ਦੀ ਭਣਕ ਲੱਗਦੇ ਹੀ ਐਂਬੂਲੈਂਸ ਦੇ ਦੋਵੇਂ ਡਰਾਈਵਰ ਫਰਾਰ ਹੋ ਗਏ।