ਇਡੁੱਕੀ, 9 ਅਗਸਤ (ਪੋਸਟ ਬਿਊਰੋ)- ਦੱਖਣੀ ਰਾਜ ਕੇਰਲਾ ਵਿੱਚ ਲਗਾਤਾਰ ਪੈ ਰਹੇ ਮੀਂਹ ਕਾਰਨ ਇਡੁੱਕੀ ਜ਼ਿਲ੍ਹੇ ਦੇ ਰਾਜਮਾਲਾ ਵਿੱਚ ਪੇਂਤੀਮੁਦੀ 'ਚ ਕੱਲ੍ਹ ਜ਼ਮੀਨ ਖਿਸਕਣ ਨਾਲ 15 ਮਜ਼ਦੂਰਾਂ ਦੀ ਮੌਤ ਹੋ ਗਈ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਬਹੁਤੇ ਮਜ਼ਦੂਰ ਤਾਮਿਲ ਨਾਡੂ ਦੇ ਰਹਿਣ ਵਾਲੇ ਸਨ ਤੇ ਇੱਥੇ ਰਹਿ ਕੇ ਮਜ਼ਦੂਰੀ ਕਰਦੇ ਸਨ ਅਤੇ ਸ਼ੈਲਟਰ ਬਣਾ ਕੇ ਰਹਿੰਦੇ ਸਨ, ਜ਼ਮੀਨ ਖਿਸਕਣ ਕਾਰਨ ਕਰੀਬ 20 ਮਜ਼ਦੂਰਾਂ ਦੇ ਘਰ ਮਲਬੇ ਹੇਠਾਂ ਦੱਬ ਗਏ। ਪੁਲਸ ਅਤੇ ਫਾਇਰ ਬ੍ਰਿਗੇਡ ਕਰਮਚਾਰੀ ਮੌਕੇ 'ਤੇ ਮੌਜੂਦ ਸਨ।ਕੇਰਲਾ ਦੇ ਸਿਹਤ ਵਿਭਾਗ ਨੇ 15 ਐਂਬਲੈਂਸਾਂ ਅਤੇ ਇੱਕ ਵਿਸ਼ੇਸ਼ ਮੈਡੀਕਲ ਟੀਮ ਨੂੰ ਰਵਾਨਾ ਕੀਤਾ ਹੈ। ਖੇਤਰ ਨਾਲ ਸੰਪਰਕ ਸਥਾਪਤ ਕਰਨ ਵਾਲੇ ਪੁੱਲ ਦੇ ਮੀਂਹ 'ਚ ਰੁੜ੍ਹ ਜਾਣ ਕਾਰਨ ਘਟਨਾ ਸਥਾਨ 'ਤੇ ਪੁੱਜਣ 'ਚ ਪੇ੍ਰਸ਼ਾਨੀ ਆ ਰਹੀ ਹੈ।ਇਸ ਦੌਰਾਨ ਕੇਰਲ ਦੇ ਮੁੱਖ ਮੰਤਰੀ ਪਿਨਰਾਈ ਵਿਜਯਨ ਨੇ ਇੱਕ ਫੇਸਬੁੱਕ ਪੋਸਟ 'ਚ ਕਿਹਾ ਕਿ ਐਨ ਡੀ ਆਰ ਐਫ ਨੂੰ ਇਡੁੱਕੀ 'ਚ ਬਚਾਅ ਮੁਹਿੰਮ 'ਚ ਲਾਇਆ ਗਿਆ ਹੈ।