ਅਹਿਮਦਾਬਾਦ, 7 ਅਗਸਤ (ਪੋਸਟ ਬਿਊਰੋ)- ਇਥੋਂ ਦੇ ਇਕ ਪ੍ਰਾਈਵੇਟ ਹਸਪਤਾਲ ਵਿਚ ਆਈ ਸੀ ਯੂ ਵਿਚ ਕੱਲ੍ਹ ਤੜਕੇ ਅੱਗ ਲੱਗਣ ਨਾਲ ਕੋਵਿਡ-19 ਦੇ 8 ਮਰੀਜ਼ ਸੜ ਕੇ ਮਰ ਗਏ। ਇਸ ਹਾਦਸੇ ਵਿਚ ਹਸਪਤਾਲ ਦਾ ਇਕ ਸਿਹਤ ਕ੍ਰਮਚਾਰੀ ਵੀ ਜਖਮੀ ਹੋ ਗਿਆ ਹੈ।
ਇੱਕ ਅਧਿਕਾਰੀ ਨੇ ਦਸਿਆ ਕਿ ਕੋਵਿਡ-19 ਦੇ ਮਰੀਜ਼ਾਂ ਦੇ ਇਲਾਜ਼ ਲਈ ਮਿਥੇ ਨਵਰੰਗਪੁਰ ਇਲਾਕੇ ਦੇ ਸ਼ਰੇਯ ਹਾਸਪੀਟਲ ਦੀ ਚੌਥੀ ਮੰਜ਼ਿਲ `ਤੇ ਵੀਰਵਾਰ ਤੜਕੇ ਕਰੀਬ 3.30 ਅੱਗ ਲੱਗ ਗਈ। ਹਾਦਸੇ ਵਿਚ ਆਈ ਸੀ ਯੂ ਵਾਰਡ ਵਿਚ ਭਰਤੀ 8 ਕਰੋਨਾ ਮਰੀਜਾਂ ਦੀ ਮੌਤ ਹੋ ਗਈ। ਸ਼ੁਰੂ ਦੀ ਜਾਂਚ ਤੋਂ ਪਤਾ ਲੱਗਾ ਕਿ ਅੱਗ ਸ਼ਾਰਟ ਸਰਕਟ ਕਾਰਨ ਲੱਗੀ ਹੈ। ਇਸ ਦੌਰਾਨ ਇਕ ਅਟੈਂਡੈਂਟ ਚਿਰਾਗ ਪਟੇਲ ਨੇ ਬੜੀ ਬਹਾਦਰੀ ਨਾਲ ਤਿੰਨ ਮਰੀਜ਼ਾਂ ਨੂੰ ਸੁਰੱਖਿਅਤ ਕੱਢ ਲਿਆ ਹੈ। ਚਿਰਾਗ ਨੇ ਦਸਿਆ ਕਿ ਚੌਥੀ ਮੰਜ਼ਿਲ ਉਪਰ 11 ਮਰੀਜ਼ ਸਨ। ਅੱਗ ਲੱਗੀ ਦੌਰਾਨ 25 ਸਾਲਾਂ ਦੇ ਅਟੈਂਡੈਂਟ ਚਿਰਾਗ ਪਟੇਲ ਨੇ ਬੜੀ ਬਹਾਦਰੀ ਨਾਲ 3 ਬਜੁਰਗ ਮਰੀਜ਼ਾਂ ਨੂੰ ਬਚਾਅ ਲਿਆ। ਜਦੋਂ ਇਹ ਹਾਦਸਾ ਵਾਪਰਿਆ ਉਦੋਂ ਚੌਥੀ ਮੰਜਿਲ ਉਪਰ 11 ਮਰੀਜ਼ ਸਨ। ਕੋਵਿਡ-19 ਨਾਲ ਗੰਭੀਰ ਰੂਪ ਤੋਂ ਪੀੜਤ ਲੋਕਾਂ ਦੇ ਇਲਾਜ਼ ਲਈ ਚੌਥੀ ਮੰਜਿਲ ਉਪਰ ਵਿਸ਼ੇਸ਼ ਆਈ ਸੀ ਯੂ ਚੈਂਬਰ ਬਣਾਇਆ ਹੋਇਆ ਸੀ। ਅਟੈਂਡੈਂਟ ਚਿਰਾਗ ਪਟੇਲ ਨੇ ਦਸਿਆ ਕਿ ਜਦੋਂ ਉਹ ਚੌਥੀ ਮੰਜਿਲ `ਤੇ ਗਿਆ ਤਾਂ ਉਸ ਨੇ ਇਕ ਰੋਗੀ ਦੇ ਕੋਲ ਪਏ ਔਜਾਰ ਵਿਚੋਂ ਅੱਗ ਨਿਕਲਦੀ ਦੇਖੀ, ਜੋ ਤੇਜ਼ੀ ਨਾਲ ਉਸ ਰੋਗੀ ਦੇ ਵਾਲਾਂ ਨੂੰ ਲੱਗ ਗਈ। ਅਟੈਂਡੈਂਟ ਨੇ ਉਸ ਨੂੰ ਫੁਰਤੀ ਨਾਲ ਬੁਝਾ ਦਿਤਾ। ਜਦੋਂ ਉਸ ਨੇ ਉਥੋਂ ਬਿਸਤਰਾ ਹਟਾਇਆ ਤਾਂ ਇਕ ਹੋਰ ਅਟੈਂਡੈਂਟ ਦੇ ਪੀ ਪੀ ਈ ਸੂਟ ਵਿਚ ਅੱਗ ਲੱਗ ਗਈ। ਕਿਸਮਤ ਨਾਲ ਇਕ ਡਾਕਟਰ ਪਾਣੀ ਦੀ ਬਾਲਟੀ ਲੈ ਕੇ ਉਪਰ ਆਇਆ ਤਾਂ ਅਟੈਂਡੈਂਟ ਉਪਰ ਪਾਣੀ ਪਾ ਕੇ ਉਸ ਨੂੰ ਬਚਾਅ ਲਿਆ ਗਿਆ। ਉਸ ਨੇ ਦਸਿਆ ਕਿ ਅਚਾਨਕ ਆਈ ਸੀ ਯੂ ਵਾਰਡ ਵਿਚ ਧਮਾਕਾ ਹੋ ਗਿਆ ਹੈ। ਉਹ ਰੋਗੀਆਂ ਨੂੰ ਬਚਾਉਣ ਲਈ ਫਿਰ ਉਥੇ ਗਏ ਪਰ ਧੂੰਆਂ ਹੋਣ ਕਾਰਨ ਕਾਫੀ ਘੱਟ ਦਿਖਾਈ ਦੇ ਰਿਹਾ ਸੀ ਤੇ ਉਹ ਕਾਮਯਾਬ ਨਹੀਂ ਹੋ ਸਕੇ। ਪਟੇਲ ਅਨੁਸਾਰ ਹੋਰ ਅਟੈਂਡੈਟ ਤੇ ਡਾਕਟਰ ਧੂੰਏ ਕਾਰਨ ਔਖ ਮਹਿਸੂਸ ਕਰਦੇ ਸਨ ਇਸ ਲਈ ਉਸ ਨੇ ਉਥੇ ਰੁਕਣ ਦਾ ਫੈਸਲਾ ਕੀਤਾ ਤੇ ਮਰੀਜ਼ਾਂ ਨੂੰ ਥੱਲੇ ਲਿਆਉਣਾ ਸ਼ੁਰੂ ਕੀਤਾ। ਪਟੇਲ ਨੇ ਚੌਥੀ ਮੰਜਿਲ ਉਪਰ ਸਭ ਤੋਂ ਪਹਿਲਾਂ ਉਸ ਨੇ ਇਕ ਔਰਤ ਨੂੰ ਬਾਹਰ ਕੱਢਿਆ। ਉਸ ਪਿਛੋਂ ਇਕ ਬਜੁਰਗ ਔਰਤ ਤੇ ਇਕ ਮਰਦ ਨੂੰ ਬਾਹਰ ਕੱਢ ਲਿਆਂਦਾ ਗਿਆ। ਇਸ ਪਿਛੋਂ ਧੂੰਆਂ ਕਾਫੀ ਵੱਧ ਜਾਣ ਕਾਰਨ ਉਹ ਅੰਦਰ ਨਹੀਂ ਜਾ ਸਕਿਆ।