ਜੁਰਮ ਨਾਲ ਸਿੱਝਣ ਲਈ ਓਨਟਾਰੀਓ ਸਰਕਾਰ
ਕਰੇਗੀ 6 ਮਿਲੀਅਨ ਡਾਲਰ ਦਾ ਨਿਵੇਸ਼
ਟੋਰਾਂਟੋ, 6 ਅਗਸਤ (ਪੋਸਟ ਬਿਊਰੋ) : ਓਨਟਾਰੀਓ ਸਰਕਾਰ ਵੱਲੋਂ ਪ੍ਰੋਵਿੰਸ ਵਿੱਚ ਜੁਰਮ ਨਾਲ ਸਿੱਝਣ ਲਈ 6 ਮਿਲੀਅਨ ਡਾਲਰ ਦਾ ਨਿਵੇਸ਼ ਕਰਨ ਦਾ ਐਲਾਨ ਕੀਤਾ ਹੈ|
ਪ੍ਰੀਮੀਅਰ ਡੱਗ ਫੋਰਡ ਨੇ ਵੀਰਵਾਰ ਨੂੰ ਇੱਕ ਨਿਊਜ਼ ਕਾਨਫਰੰਸ ਵਿੱਚ ਓਨਟਾਰੀਓ ਵਿੱਚ ਮੁਜਰਮਾਨਾਂ ਗਤੀਵਿਧੀਆਂ ਵਿੱਚ ਪਿੱਛੇ ਜਿਹੇ ਹੋਏ ਵਾਧੇ ਦੇ ਸਬੰਧ ਵਿੱਚ ਇਹ ਐਲਾਨ ਕੀਤਾ| ਫੋਰਡ ਨੇ ਆਖਿਆ ਕਿ ਟੋਅ ਟਰੱਕ ਇੰਡਸਟਰੀ, ਘਰੇਲੂ ਹਿੰਸਾਂ ਤੇ ਸ਼ੂਟਿੰਗਜ਼ ਵਿੱਚ ਹੋਏ ਵਾਧੇ ਕਾਰਨ ਉਨ੍ਹਾਂ ਦਾ ਦਿਲ ਟੁੱਟ ਗਿਆ ਹੈ| ਜ਼ਿਕਰਯੋਗ ਹੈ ਕਿ ਪਿਛਲੇ ਮਹੀਨੇ ਟੋਰਾਂਟੋ ਵਿੱਚ 24 ਘੰਟਿਆਂ ਤੋਂ ਵੀ ਘੱਟ ਸਮੇਂ ਵਿੱਚ ਸ਼ੂਟਿੰਗ ਦੀਆਂ ਛੇ ਘਟਨਾਵਾਂ ਘਟੀਆਂ| ਉਨ੍ਹਾਂ ਆਖਿਆ ਕਿ ਇਹ ਗਲਤ ਤੇ ਅਸਵੀਕਾਰਯੋਗ ਹੈ| ਇਸ ਰੁਝਾਨ ਨੂੰ ਰੋਕਣਾ ਹੋਵੇਗਾ|
ਉਨ੍ਹਾਂ ਆਖਿਆ ਕਿ ਉਹ ਮੁਜਰਮਾਂ ਨੂੰ ਇਹ ਸੁਨੇਹਾ ਦੇਣਾ ਚਾਹੁੰਦੇ ਹਨ ਕਿ ਅਸੀਂ ਤੁਹਾਨੂੰ ਕਿਤੋਂ ਵੀ ਲੱਭ ਲਵਾਂਗੇ ਤੇ ਤੁਹਾਨੂੰ ਕੈਦਖਾਨੇ ਵਿੱਚ ਡੱਕ ਕੇ ਹੀ ਸਾਹ ਲਵਾਂਗੇ| ਉਨ੍ਹਾਂ ਆਖਿਆ ਕਿ ਸਰਕਾਰ ਪ੍ਰੋਵਿੰਸ ਵਿੱਚ ਵੱਖ ਵੱਖ ਤਰ੍ਹਾਂ ਦੇ ਜੁਰਮ ਨੂੰ ਰੋਕਣ ਲਈ ਅਗਲੇ ਤਿੰਨ ਸਾਲਾਂ ਵਿੱਚ 6 ਮਿਲੀਅਨ ਡਾਲਰ ਨਿਵੇਸ਼ ਕਰੇਗੀ| ਫੋਰਡ ਨੇ ਆਖਿਆ ਕਿ ਮੁਜਰਮਾਂ ਕੋਲੋਂ ਬਰਾਮਦ ਕੀਤਾ ਗਿਆ ਪੈਸਾ ਪ੍ਰੋਵਿੰਸ ਭਰ ਦੀਆਂ 16 ਪੁਲਿਸ ਸੇਵਾਵਾਂ ਨੂੰ ਮੁਹੱਈਆ ਕਰਵਾਇਆ ਜਾਵੇਗਾ ਤਾਂ ਕਿ ਉਹ ਗੰਨ ਤੇ ਗੈਂਗ ਹਿੰਸਾ, ਹਿਊਮਨ ਟਰੈਫਿਕਿੰਗ, ਜਿਨਸੀ ਹਿੰਸਾ ਤੇ ਤੰਗ ਪਰੇਸ਼ਾਨ ਕਰਨ ਵਰਗੇ ਜੁਰਮਾਂ ਨਾਲ ਨਜਿੱਠਣ ਲਈ ਆਪਣੀ ਰਣਨੀਤੀ ਲਾਗੂ ਕਰ ਸਕਣ|
ਫੰਡਿੰਗ ਦਾ ਬਹੁਤਾ ਹਿੱਸਾ ਵਾਟਰਲੂ ਰੀਜਨਲ ਪੁਲਿਸ ਸਰਵਿਸ ਨੂੰ ਐਂਟੀ-ਹਿਊਮਨ ਟਰੈਫਿਕਿੰਗ ਯੂਨਿਟ ਕਾਇਮ ਕਰਨ ਲਈ ਦਿੱਤਾ ਜਾਵੇਗਾ| ਫੰਡਾਂ ਵਿੱਚੋਂ 300,000 ਡਾਲਰ ਟੋਰਾਂਟੋ ਪੁਲਿਸ ਸਰਵਿਸ, 300,000 ਡਾਲਰ ਯੌਰਕ ਰੀਜਨਲ ਪੁਲਿਸ ਨੂੰ ਵੀ ਦਿੱਤਾ ਜਾਵੇਗਾ|