ਨਵੀਂ ਦਿੱਲੀ, 5 ਅਗਸਤ (ਪੋਸਟ ਬਿਊਰੋ)- ਫੁੱਟਬਾਲ ਖਿਡਾਰੀ ਕ੍ਰਿਸਟੀਆਨੋ ਰੋਨਾਲਡੋ ਨੇ ਪਿੱਛੇ ਜਿਹੇ ਆਪਣੇ ਲਈ ਇੱਕ ਨਵੀਂ ਹਾਈਪਰ ਕਾਰ ਖਰੀਦੀ ਹੈ। ਇਸ ਹਾਈਪਰ ਕਾਰ ਦਾ ਨਾਂ ਬੁਗਾਤੀ ਸੇਟੋਡਿਸੀ ਹੈ ਤੇ ਰੋਨਾਲਡੋ ਨੇ ਇਹ ਸੁਪਰ ਕਾਰ ਆਪਣੀ ਟੀਮ ਦੀ ਜਿੱਤ ਦੀ ਖ਼ੁਸ਼ੀ ਵਿੱਚ ਖਰੀਦੀ ਹੈ।
ਪੰਜ ਵਾਰ ਦੇ ‘ਬੈਲੇਨ ਡੀ ਓਰ' ਜੇਤੂ ਰੋਨਾਲਡੋ ਨੇ ਜੁਵੈਂਟਸ ਦੇ 9ਵੇਂ ਸੀਰੀਜ਼-ਏ ਖਿਤਾਬ ਦਾ ਜਸ਼ਨ ਆਪਣੀ ਕਾਰ ਕਲੈਕਸ਼ਨ ਵਿੱਚ ਇਹ ਨਵੀਂ ਹਾਈਪਰ ਕਾਰ ਜੋੜ ਕੇ ਮਨਾਇਆ। ਰੋਨਾਲਡੋ ਦੇ ਕੋਲ ਪਹਿਲਾਂ ਤੋਂ ਹੀ ਸੁਪਰ ਕਾਰ ਸ਼ਿਰੌਨ, ਵੇਰਾਨ ਅਤੇ ਲਾ ਵੋਵਰ ਨੋਇਰ ਵੀ ਹਨ। ਰੋਨਾਲਡੋ ਦੀ ਨਵੀਂ ਕਾਰ ਦੇ ਲਿਮਟਿਡ ਐਡੀਸ਼ਨ ਹਨ। ਇਸ ਦੇ ਅਜੇ ਸਿਰਫ 10 ਮਾਡਲ ਬਣੇ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਰੋਨਾਲਡੋ ਕੋਲ ਹੈ। ਕਾਰ ਦੀ ਟਾਪ ਸਪੀਡ 380 ਕਿਲੋਮੀਟਰ ਪ੍ਰਤੀ ਘੰਟਾ ਹੈ ਤੇ ਇਸਦੀ ਕੀਮਤ 8.5 ਮਿਲੀਅਨ ਯੂਰੋ ਹੈ, ਜਿਹੜੀ ਭਾਰਤੀ ਕਰੰਸੀ ਅਨੁਸਾਰ 75 ਕਰੋੜ 7.50 ਲੱਖ ਰੁਪਏ ਹੈ। ਦੁਨੀਆ ਵਿੱਚ ਦੂਜੇ ਸਭ ਤੋਂ ਵੱਧ ਕਮਾਈ ਕਰਨ ਵਾਲੇ ਫੁੱਟਬਾਲਰ ਰੋਨਾਲਡੋ ਕੋਲ ਹੋਰ ਵੀ ਵਿਦੇਸ਼ੀ ਸੁਪਰ ਕਾਰਾਂ ਹਨ, ਜਿਨ੍ਹਾਂ ਵਿੱਚ ਰੋਲਸ-ਰਾਇਸ ਫੈਂਟਮ, ਲੇ ਬੋਰਗਿਨੀ ਏਵੇਂਟਾਡੋਰ, ਫੇਰਾਰੀ ਐਫ 430, ਮਾਸੇਰਾਤੀ ਗੈ੍ਰਨਕੈਬ੍ਰੀਓ ਤੇ ਵੇਂਟਲੇ ਕਾਂਟੀਨੈਂਟਲ ਜੀ ਟੀ ਸੀ। ਉਸ ਨੇ ਆਪਣੀ ਕਾਰ ਕਲੈਕਸ਼ਨ ਵਿੱਚ 16 ਮਿਲੀਅਨ ਯੂਰੋ ਦੀ ਮੈਕਲਾਰੇਨ ਸੇਨਾ ਵੀ ਰੱਖੀ ਹੋਈ ਹੈ।