ਪੁਲਿਸ ਨੇ ਵ੍ਹਿਟਬੀ ਹਮਲੇ ਨਾਲ ਸਬੰਧਤ
ਮਸ਼ਕੂਕ ਦੀ ਜਾਰੀ ਕੀਤੀ ਵੀਡੀਓ

ਦਰਹਾਮ, 5 ਅਗਸਤ (ਪੋਸਟ ਬਿਊਰੋ) : ਪਿਛਲੇ ਹਫਤੇ ਵ੍ਹਿਟਬੀ ਵਿੱਚ 50 ਸਾਲਾ ਮਹਿਲਾ Aੁੱਤੇ ਹਿੰਸਕ ਹਮਲਾ ਕਰਨ ਵਾਲੇ ਸ਼ੱਕੀ ਵਿਅਕਤੀ ਦਾ ਵੀਡੀਓ ਦਰਹਾਮ ਰੀਜਨਲ ਪੁਲਿਸ ਜਾਂਚਕਾਰਾਂ ਵੱਲੋਂ ਜਾਰੀ ਕੀਤਾ ਗਿਆ ਹੈ|
ਜ਼ਿਕਰਯੋਗ ਹੈ ਕਿ 28 ਜੁਲਾਈ ਨੂੰ ਇਸ ਮਹਿਲਾ ਦੇ ਲਾਪਤਾ ਹੋਣ ਦੀ ਰਿਪੋਰਟ ਕਰਵਾਈ ਗਈ ਸੀ ਤੇ ਪੁਲਿਸ ਅਧਿਕਾਰੀਆਂ ਨੂੰ ਇਹ ਮਹਿਲਾ ਜ਼ਖ਼ਮੀ ਹਾਲਤ ਵਿੱਚ ਟੌਂਟਨ ਰੋਡ ਈਸਟ ਤੇ ਐਂਡਰਸਨ ਸਟਰੀਟ ਇਲਾਕੇ ਵਿੱਚ ਨਾਲੇ ਦੇ ਕੋਲੋਂ ਮਿਲੀ ਸੀ| ਉਸ ਦੀ ਹਾਲਤ ਕਾਫੀ ਨਾਜ਼ੁਕ ਸੀ| ਉਸ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ ਜਿੱਥੇ ਅੱਜ ਵੀ ਉਹ ਲਾਈਫ ਸਪੋਰਟ ਸਿਸਟਮ ਉੱਤੇ ਹੈ|
ਕੱਲ੍ਹ ਜਾਰੀ ਕੀਤੇ ਗਏ ਇਸ ਵੀਡੀਓ ਵਿੱਚ ਕਥਿਤ ਹਮਲਾਵਰ ਨਜ਼ਰ ਆ ਰਿਹਾ ਹੈ| 28 ਜੁਲਾਈ ਨੂੰ ਰਾਤੀਂ 8:50 ਅਤੇ 9:00 ਵਜੇ ਦਰਮਿਆਨ ਇਹ ਵਿਅਕਤੀ ਹੀ ਐਂਡਰਸਨ ਸਟਰੀਟ ਨੇੜੇ ਟੌਂਟਨ ਰੋਡ ਉੱਤੇ ਸਬੰਧਤ ਮਹਿਲਾ ਦਾ ਪਿੱਛਾ ਕਰਦਾ ਹੋਇਆ ਪੱਛਮ ਵੱਲ ਜਾਂਦਾ ਨਜ਼ਰੀਂ ਪੈ ਰਿਹਾ ਹੈ| ਇਹ ਅਣਪਛਾਤਾ ਵਿਅਕਤੀ ਉਸ ਮਹਿਲਾ ਤੋਂ 150 ਫੁੱਟ ਦੀ ਦੂਰੀ ਉੱਤੇ ਤੁਰ ਰਿਹਾ ਹੈ ਤੇ ਉਸ ਦੀ ਪੂਰੀ ਪੈੜ ਨੱਪਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ|
ਪੁਲਿਸ ਵੱਲੋਂ ਜਾਰੀ ਕੀਤੇ ਵੇਰਵੇ ਅਨੁਸਾਰ ਇਹ ਵਿਅਕਤੀ ਦਰਮਿਆਨੀ ਕੱਦ-ਕਾਠੀ ਵਾਲਾ ਹੈ, ਉਸ ਦੇ ਚਿੱਟੇ ਰੰਗ ਦੀ ਕਾਲੀਆਂ ਬਾਹਾਂ ਵਾਲੀ ਟੀ-ਸ਼ਰਟ ਪਾਈ ਹੋਈ ਹੈ, ਉਸ ਨੇ ਢਿੱਲੀਆਂ ਸ਼ੌਰਟਸ ਪਾਈਆਂ ਹੋਈਆਂ ਹਨ ਤੇ ਪੈਰੀਂ ਗੂੜ੍ਹੇ ਰੰਗ ਦੀਆਂ ਜੁਰਾਬਾਂ ਤੇ ਜੁੱਤੇ ਪਾਏ ਹੋਏ ਹਨ|
ਪੁਲਿਸ ਵੱਲੋਂ ਉਸ ਸਮੇਂ ਉੱਤੇ ਦੋਵਾਂ ਦਿਸ਼ਾਵਾਂ ਤੋਂ ਆ ਜਾ ਰਹੀਆਂ ਗੱਡੀਆਂ ਦੇ ਡਰਾਈਵਰਾਂ ਨੂੰ ਸਾਹਮਣੇ ਆ ਕੇ ਮਦਦ ਲਈ ਅਪੀਲ ਕੀਤੀ ਗਈ ਹੈ| ਪੁਲਿਸ ਦਾ ਕਹਿਣਾ ਹੈ ਕਿ ਜੇ ਕਿਸੇ ਵਿਅਕਤੀ ਦੀ ਗੱਡੀ ਵਿੱਚ ਡੈਸ਼ ਕੈਮ ਹੋਵੇ ਤੇ ਕਿਸੇ ਕੋਲ ਇਸ ਮਾਮਲੇ ਦੀ ਫੁਟੇਜ ਮਿਲ ਸਕੇ ਤਾਂ ਉਹ ਸਾਹਮਣੇ ਆਵੇ|