ਨਵੇਂ ਸਾਲ ਤੱਕ ਬਰਕਰਾਰ ਰਹੇਗਾ ਸੋਸ਼ਲ ਸਰਕਲ ਵਿੱਚ 10 ਵਿਅਕਤੀਆਂ ਦੀ ਸ਼ਮੂਲੀਅਤ ਦਾ ਸਿਲਸਿਲਾ : ਫੋਰਡ

ਟੋਰਾਂਟੋ, 4 ਅਗਸਤ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦਾ ਕਹਿਣਾ ਹੈ ਕਿ ਸੋਸ਼ਲ ਸਰਕਲ ਵਿੱਚ ਸਿਰਫ 10 ਵਿਅਕਤੀਆਂ ਦੀ ਸ਼ਮੂਲੀਅਤ ਦਾ ਇਹ ਸਿਲਸਿਲਾ ਘੱਟੋ ਘੱਟ ਇਸ ਸਾਲ ਦੇ ਖ਼ਤਮ ਹੋਣ ਤੱਕ ਤਾਂ ਬਣਿਆ ਹੀ ਰਹੇਗਾ|
ਮੰਗਲਵਾਰ ਦੁਪਹਿਰ ਨੂੰ ਕੀਤੀ ਨਿਊਜ਼ ਕਾਨਫਰੰਸ ਵਿੱਚ ਫੋਰਡ ਨੇ ਰੈਜ਼ੀਡੈਂਟਸ ਨੂੰ ਚੇਤਾਵਨੀ ਦਿੱਤੀ ਕਿ ਇਹ ਮਹਾਂਮਾਰੀ ਖ਼ਤਮ ਨਹੀਂ ਹੋਈ ਹੈ| ਫੋਰਡ ਨੇ ਆਖਿਆ ਕਿ ਇਹ ਅਜੇ ਜਾਰੀ ਰਹਿਣ ਵਾਲੀ ਹੈ ਤੇ ਉਨ੍ਹਾਂ ਦੀ ਸਾਰਿਆਂ ਨੂੰ ਇਹੋ ਸਲਾਹ ਹੈ ਕਿ ਇਹ ਸੱਭ ਜਨਵਰੀ ਤੱਕ ਇਸ ਤਰ੍ਹਾਂ ਹੀ ਚਲਾਇਆ ਜਾਵੇ| ਉਨ੍ਹਾਂ ਆਖਿਆ ਕਿ ਉਸ ਸਮੇਂ ਤੱਕ ਹੀ ਕਿਸੇ ਵੈਕਸੀਨ ਦੇ ਆਉਣ ਦੀ ਸੰਭਾਵਨਾ ਹੈ|
ਦੋ ਮਹੀਨੇ ਪਹਿਲਾਂ ਪ੍ਰੋਵਿੰਸ ਦੇ 14æ5 ਮਿਲੀਅਨ ਵਾਸੀਆਂ ਨੂੰ ਸਰਕਾਰ ਨੇ ਇਹ ਆਖਿਆ ਸੀ ਕਿ ਉਹ ਆਪਣੇ ਸੋਸ਼ਲ ਸਰਕਲ ਵਿੱਚ ਉਨ੍ਹਾਂ ਨੂੰ ਵੀ ਸ਼ਾਮਲ ਕਰ ਸਕਦੇ ਹਨ, ਜਿਹੜੇ ਉਨ੍ਹਾਂ ਦੇ ਨਾਲ ਨਹੀਂ ਰਹਿੰਦੇ| ਜਿਸ ਤੋਂ ਭਾਵ 10 ਵਿਅਕਤੀਆਂ ਦੇ ਅਜਿਹੇ ਇੱਕ ਸੋਸ਼ਲ ਸਰਕਲ ਵਿੱਚ ਹੋਣ ਤੋਂ ਸੀ| ਇਸ ਨਾਲ ਕਈ ਲੋਕਾਂ ਨੂੰ ਆਪਣੇ ਮਾਪਿਆਂ, ਗ੍ਰੈਂਡਪੇਰੈਂਟਸ ਜਾਂ ਕਈ ਮਹੀਨਿਆਂ ਵਿੱਚ ਪਹਿਲੀ ਵਾਰੀ ਆਪਣੇ ਬੱਚਿਆਂ ਨਾਲ ਗਲੇ ਮਿਲਣ ਦਾ ਮੌਕਾ ਮਿਲ ਸਕਿਆ|
ਇਸ ਐਲਾਨ ਤੋਂ ਪਹਿਲਾਂ ਓਨਟਾਰੀਓ ਹੈਲਥ ਅਧਿਕਾਰੀਆਂ ਵੱਲੋਂ ਪ੍ਰੋਵਿੰਸ ਵਾਸੀਆਂ ਨੂੰ ਆਪਣੇ ਘਰ ਤੋਂ ਬਾਹਰ ਰਹਿਣ ਵਾਲੇ ਕਿਸੇ ਵੀ ਸ਼ਖਸ ਤੋਂ ਸੋਸ਼ਲ ਡਿਸਟੈਂਸਿੰਗ ਬਰਕਰਾਰ ਰੱਖਣ ਦੀ ਸਲਾਹ ਦਿੱਤੀ ਗਈ ਸੀ| ਫੋਰਡ ਨੇ ਇਹ ਵੀ ਆਖਿਆ ਕਿ ਇਨ੍ਹਾਂ ਪਾਬੰਦੀਆਂ ਵਿੱਚ ਛੋਟ ਦੇਣ ਦਾ ਮਤਲਬ ਹੈ ਕਿ ਸਰਹੱਦ ਤੋਂ ਦੱਖਣ ਵਾਲੇ ਪਾਸੇ ਵਾਂਗ ਇੱਥੇ ਵੀ ਲੋਕ ਅਵੇਸਲੇ ਹੋ ਜਾਣਗੇ ਤੇ ਜਿਸ ਦੇ ਸਿੱਟੇ ਬਹੁਤ ਹੀ ਖਤਰਨਾਕ ਹੋ ਸਕਦੇ ਹਨ| ਉਨ੍ਹਾਂ ਆਖਿਆ ਕਿ ਅਸੀਂ ਕਿਸੇ ਤਰ੍ਹਾਂ ਦਾ ਰਿਸਕ ਨਹੀਂ ਲੈ ਸਕਦੇ|