ਗੋਲੀਕਾਂਡ ਦੇ ਸਬੰਧ ਵਿੱਚ 16 ਸਾਲਾ ਲੜਕੇ
ਨੂੰ ਕੀਤਾ ਗਿਆ ਚਾਰਜ
ਸਕਾਰਬੌਰੋ, 4 ਅਗਸਤ (ਪੋਸਟ ਬਿਊਰੋ) : ਪਿਛਲੇ ਮਹੀਨੇ ਸਕਾਰਬੌਰੋ ਵਿੱਚ ਵਾਪਰੇ ਘਾਤਕ ਗੋਲੀਕਾਂਡ ਦੇ ਸਬੰਧ ਵਿੱਚ ਇੱਕ 16 ਸਾਲਾ ਲੜਕੇ ਨੂੰ ਪੁਲਿਸ ਵੱਲੋਂ ਚਾਰਜ ਕੀਤਾ ਗਿਆ ਹੈ|
ਜ਼ਿਕਰਯੋਗ ਹੈ ਕਿ 4 ਜੁਲਾਈ ਨੂੰ ਵਿਕਟੋਰੀਆ ਪਾਰਕ ਐਵਨਿਊ ਨੇੜੇ ਮੋਰਕੈਂਬ ਗੇਟ ਅਤੇ ਚੈਸਟਰ ਲੀ ਬੋਲੀਵੀਆਰਡ ਇਲਾਕੇ ਦੇ ਪਾਰਕਿੰਗ ਲੌਟ ਵਿੱਚ ਚੱਲੀ ਗੋਲੀ ਦੀਆਂ ਰਿਪੋਰਟਾਂ ਮਿਲਣ ਤੋਂ ਬਾਅਦ ਪੁਲਿਸ ਮੌਕੇ ਉੱਤੇ ਪਹੁੰਚੀ ਸੀ| ਜਦੋਂ ਪੁਲਿਸ ਪਹੁੰਚੀ ਤਾਂ ਉਨ੍ਹਾਂ ਉੱਥੇ ਗੋਲੀ ਲੱਗਣ ਕਾਰਨ ਇੱਕ ਵਿਅਕਤੀ ਨੂੰ ਜ਼ਖ਼ਮੀ ਹਾਲਤ ਵਿੱਚ ਪਾਇਆ|
ਉਸ ਵਿਅਕਤੀ ਨੂੰ ਹਸਪਤਾਲ ਪਹੁੰਚਾਇਆ ਗਿਆ, ਜਿੱਥੇ ਥੋੜ੍ਹੀ ਦੇਰ ਬਾਅਦ ਹੀ ਉਸਦੀ ਮੌਤ ਹੋ ਗਈ| ਮ੍ਰਿਤਕ ਦੀ ਪਛਾਣ ਟੋਰਾਂਟੋ ਦੇ 43 ਸਾਲਾ ਆਂਦਰੇ ਚਾਰਲਸ ਵਜੋਂ ਹੋਈ| ਮੰਗਲਵਾਰ ਨੂੰ ਇਸੇ ਮਾਮਲੇ ਦੇ ਸਬੰਧ ਵਿੱਚ ਪੁਲਿਸ ਵਲੋਂ 16 ਸਾਲਾ ਲੜਕੇ ਨੂੰ ਗ੍ਰਿਫਤਾਰ ਕਰਕੇ ਫਰਸਟ ਡਿਗਰੀ ਮਰਡਰ ਦੇ ਸਬੰਧ ਵਿੱਚ ਚਾਰਜ ਕੀਤਾ ਗਿਆ ਹੈ| ਉਸ ਨੂੰ 1911 ਐਗਲਿੰਟਨ ਐਵਨਿਊ ਈਸਟ ਸਥਿਤ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਣਾ ਹੈ| ਉਸ ਦੀ ਪਛਾਣ ਜਾਹਰ ਨਹੀਂ ਕੀਤੀ ਗਈ ਹੈ ਕਿਉਂਕਿ ਅਜੇ ਉਹ ਨਾਬਾਲਗ ਹੈ|
ਇਸ ਦੌਰਾਨ 29 ਜੁਲਾਈ ਨੂੰ ਵਾਪਰੇ ਗੋਲੀਕਾਂਡ ਦੇ ਸਬੰਧ ਵਿੱਚ ਟੋਰਾਂਟੋ ਦੇ 21 ਸਾਲਾ ਸਮਰ ਬੇਲੇ ਨੂੰ ਫਰਸਟ ਡਿਗਰੀ ਮਰਡਰ ਲਈ ਚਾਰਜ ਕੀਤਾ ਗਿਆ ਹੈ| ਤੀਜੇ ਮਸ਼ਕੂਕ ਦੀ ਵੀ ਪੁਲਿਸ ਅਜੇ ਭਾਲ ਕਰ ਰਹੀ ਹੈ| ਪੁਲਿਸ ਨੇ ਦੱਸਿਆ ਕਿ ਟੋਰਾਂਟੋ ਦੇ 21 ਸਾਲਾ ਕਵਾਮੀ ਗਾਰਵੁਡ ਦੀ ਵੀ ਫਰਸਟ ਡਿਗਰੀ ਮਰਡਰ ਦੇ ਸਬੰਧ ਵਿੱਚ ਭਾਲ ਕੀਤੀ ਜਾ ਰਹੀ ਹੈ| ਉਨ੍ਹਾਂ ਆਖਿਆ ਕਿ ਉਹ ਹਥਿਆਰਬੰਦ ਵੀ ਹੋ ਸਕਦਾ ਹੈ|