ਚੰਡੀਗੜ੍ਹ, 4 ਅਗਸਤ (ਪੋਸਟ ਬਿਊਰੋ)- ਸਿਰਫ ਦੋ ਦਿਨ ਦੇ ਬੱਚੇ ਨੂੰ ਚੋਰੀ ਕਰ ਕੇ ਵੇਚਣ ਜਾ ਰਹੇ ਪੰਜਾਬ ਪੁਲਸ ਦੇ ਕਾਂਸਟੇਬਲ ਸਮੇਤ ਪੰਜ ਲੋਕਾਂ ਨੂੰ ਚੰਡੀਗੜ੍ਹ ਪੁਲਸ ਨੇ ਗ੍ਰਿਫਤਾਰ ਕੀਤਾ ਹੈ। ਦੋਸ਼ੀਆਂ ਵਿੱਚ ਬਲੌਂਗੀ ਥਾਂਣੇ ਦੇ ਐੱਸ ਐੱਚ ਓ ਦਾ ਡਰਾਈਵਰ ਅਤੇ ਕਾਂਸਟੇਬਲ ਅਮਰਜੀਤ ਵੀ ਸ਼ਾਮਲ ਹੈ। ਉਨ੍ਹਾ ਕੋਲੋਂ ਇੱਕ ਦਿਨ ਦਾ ਬੱਚਾ, ਜਿਸ ਨੂੰ ਉਹ ਵੇਚਣ ਆਏ ਸਨ, ਬਰਾਮਦ ਹੋ ਗਿਆ ਹੈ। ਦੋਸ਼ੀਆਂ ਦੇ ਖਿਲਾਫ ਪੁਲਸ ਨੇ ਕੇਸ ਦਰਜ ਕਰ ਲਿਆ ਹੈ। ਇਸ ਵਿੱਚ ਪੰਜਾਬ ਅਤੇ ਚੰਡੀਗੜ੍ਹ ਦੇ ਇੱਕ-ਇੱਕ ਡਾਕਟਰ ਦਾ ਨਾਂਅ ਵੀ ਹੈ। ਦੋਸ਼ੀ ਇਹ ਬੱਚਾ ਚਾਰ ਲੱਖ ਵਿੱਚ ਚੰਡੀਗੜ੍ਹ ਦੇ ਇੱਕ ਵਪਾਰੀ ਨੂੰ ਵੇਚਣ ਆਏ ਤਾਂ ਪੁਲਸ ਨੇ ਗੁਪਤ ਸੂਚਨਾ 'ਤੇ ਕਾਰਵਾਈ ਇਨ੍ਹਾਂ ਸਭ ਨੂੰ ਗ੍ਰਿਫਤਾਰ ਕੀਤਾ ਹੈ। ਦੋਸ਼ੀਆਂ ਵਿੱਚ ਕਾਂਸਟੇਬਲ ਅਮਰਜੀਤ, ਮਨਦੀਪ ਸਿੰਘ, ਸਰਬਜੀਤ ਕੌਰ, ਕੁਲਦੀਪ ਕੌਰ ਅਤੇ ਸਰਬਜੀਤ ਕੌਰ ਸ਼ਾਮਲ ਹਨ।
ਪੁਲਸ ਨੇ ਦੱਸਿਆ ਕਿ ਸੈਕਟਰ 37 ਦੇ ਰਵਿੰਦਰ ਸਿੰਘ ਨੇ ਪੁਲਸ ਨੂੰ ਦੱਸਿਆੀ ਕਿ ਬੱਚਿਆਂ ਦੀ ਖਰੀਦ-ਫਰੋਖਤ ਹੋ ਰਹੀ ਹੈ ਅਤੇ ਸੰਗਰੂਰ ਤੋਂ ਪੰਜਾਬ ਪੁਲਸ ਦੇ ਕਾਂਸਟੇਬਲ ਦੀ ਕਾਰ ਵਿੱਚ ਦੋਸ਼ੀ ਆ ਰਹੇ ਹਨ। ਰਵਿੰਦਰ ਨੇ ਪੁਲਸ ਨੂੰ ਦੱਸਿਆ ਕਿ ਉਸ ਨੇ ਗ੍ਰਾਹਕ ਬਣ ਕੇ ਡੀਲ ਕੀਤੀ ਅਤੇ ਕਰੀਬ ਚਾਰ ਲੱਖ ਰੁਪਏ ਵਿੱਚ ਇਹ ਬੱਚਾ ਨੂੰ ਉਸ ਨੂੰ ਵੇਚਿਆ ਜਾਏਗਾ। ਇਸ ਦੇ ਬਾਅਦ ਸੈਕਟਰ 31 ਥਾਣੇ ਦੀ ਐੱਸ ਐੱਚ ਓ ਪਰਮਜੀਤ ਕੌਰ ਸੇਖੋਂ ਨੇ ਟ੍ਰੈਪ ਲਾਇਆ ਤੇ ਜਦੋਂ ਕਾਰ ਪਹੁੰਚੀ ਤਾਂ ਦੋਸ਼ੀਆਂ ਨੂੰ ਦਬੋਚ ਲਿਆ। ਇਸ ਵਿੱਚ ਕਈ ਹਸਪਤਾਲ ਮੁਲਾਜ਼ਮਾਂ ਅਤੇ ਸ਼ਹਿਰ ਦੇ ਇੱਕ ਡਾਕਟਰ ਦਾ ਨਾਂਅ ਵੀ ਆ ਰਿਹਾ ਹੈ। ਪੁਲਸ ਨੂੰ ਸ਼ੱਕ ਹੈ ਕਿ ਦੋਸ਼ੀਆਂ ਨੇ ਕਰੀਬ 10 ਬੱਚਿਆਂ ਨੂੰ ਚੋਰੀ ਕਰ ਕੇ ਵੇਚਿਆ ਹੈ, ਜਿਸ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਪੁੱਛਗਿੱਛ ਵਿੱਚ ਦੋਸ਼ੀਆਂ ਨੇ ਕਰੀਬ ਸੱਤ ਬੱਚਿਆਂ ਨੂੰ ਚੋਰੀ ਕਰ ਕੇ ਵੇਚਣ ਦੀ ਗੱਲ ਕਬੂਲੀ ਹੈ।
ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਦੋਸ਼ੀ ਹੈਲਥ ਮੁਲਾਜ਼ਮਾਂ ਨਾਲ ਮਿਲ ਕੇ ਬੱਚਿਆਂ ਦੇ ਪਰਵਾਰ ਨੂੰ ਐਡਮਿਟ ਹੁੰਦੇ ਸਮੇਂ ਹੀ ਕਹਿ ਦਿੰਦੇ ਸਨ ਕਿ ਬੱਚੇ ਨੂੰ ਬਚਾਉਣਾ ਬਹੁਤ ਮੁਸ਼ਕਲ ਹੈ। ਬਾਅਦ ਵਿੱਚ ਕਹਿ ਦਿੰਦੇ ਸਨ ਕਿ ਮਰਿਆ ਹੋਇਆ ਬੱਚਾ ਪੈਦਾ ਹੋਇਆ ਹੈ। ਇਸ ਦੇ ਇਲਾਵਾ ਕਈ ਮਾਮਲਿਆਂ ਵਿੱਚ ਬੱਚਾ ਚੋਰੀ ਕਰਨ ਦੀ ਗੱਲ ਵੀ ਕਹਿ ਦਿੰਦੇ ਸਨ।