ਸਕੂਲਾਂ ਵਿੱਚ ਐਂਟੀ ਬਲੈਕ ਨਸਲਵਾਦ ਖ਼ਤਮ ਕਰਨ ਦੀ
ਮੰਗ ਨੂੰ ਲੈ ਕੇ ਸੈਂਕੜੇ ਲੋਕਾਂ ਨੇ ਕੀਤਾ ਮਾਰਚ
ਟੋਰਾਂਟੋ, 3 ਅਗਸਤ (ਪੋਸਟ ਬਿਊਰੋ) : ਸਕੂਲਾਂ ਵਿੱਚ ਐਂਟੀ ਬਲੈਕ ਨਸਲਵਾਦ ਨੂੰ ਖਤਮ ਕਰਨ ਦੀ ਮੰਗ ਨੂੰ ਲੈ ਕੇ ਸੈਂਕੜੇ ਲੋਕਾਂ ਨੇ ਸੋਮਵਾਰ ਨੂੰ ਡਾਊਨਟਾਊਨ ਟੋਰਾਂਟੋ ਦੀਆਂ ਸੜਕਾਂ ਉੱਤੇ ਮਾਰਚ ਕੀਤਾ|
ਪੇਰੈਂਟਸ ਆਫ ਬਲੈਕ ਚਿਲਡਰਨ ਤੇ ਵਾਅਨ ਐਫਰੀਕਨ ਕੈਨੇਡੀਅਨ ਐਸੋਸਿਏਸ਼ਨ ਵੱਲੋਂ ਆਯੋਜਿਤ ਇਹ ਮਾਰਚ ਦੁਪਹਿਰੇ 2:00 ਵਜੇ ਨਥਾਨ ਫਿਲਿਪਜ਼ ਸਕੁਏਅਰ ਉੱਤੇ ਸ਼ੁਰੂ ਹੋਇਆ| ਫਿਰ ਯੂਨੀਵਰਸਿਟੀ ਐਵਨਿਊ ਤੋਂ ਹੁੰਦਾ ਹੋਇਆ ਇਹ ਮਾਰਚ ਕੁਈਨਜ਼ ਪਾਰਕ ਵੱਲ ਵਧਿਆ| ਇਸ ਦੌਰਾਨ ਲੋਕਾਂ ਨੇ-ਬਲੈਕ ਹੋਣ ਉਤੇ ਮਾਣ ਹੈ,ਨਸਲੀ ਸੋਚ ਰੱਖਣ ਵਾਲੇ ਅਧਿਆਪਕਾਂ ਨੂੰ ਜਾਣਾ ਹੋਵੇਗਾ, ਇਨਸਾਫ ਤੋਂ ਬਿਨਾਂ ਸ਼ਾਂਤੀ ਨਹੀਂ, ਬਲੈਕ ਯੂਥ ਮੈਟਰ, ਵਰਗੇ ਸਾਈਨ ਬੋਰਡ ਚੁੱਕੇ ਹੋਏ ਸਨ|
ਮਾਰਚ ਦੇ ਪ੍ਰਬੰਧਕਾਂ ਨੇ ਆਖਿਆ ਕਿ ਗ੍ਰੇਡ 9 ਵਿੱਚ ਐਕੇਡੈਮਿਕ ਸਕ੍ਰੀਨਿੰਗ ਖਤਮ ਕਰਨ ਤੇ ਕਿੰਡਰਗਾਰਟਨ ਤੋਂ ਗ੍ਰੇਡ 3 ਦੇ ਵਿਦਿਆਰਥੀਆਂ ਲਈ ਡਿਸਕ੍ਰੀਸ਼ਨਰੀ ਸਸਪੈਂਸ਼ਨ ਦੇ ਖਾਤਮੇ ਕਾਰਨ ਪ੍ਰਤੀਕਿਰਿਆ ਵਜੋਂ ਵੀ ਇਹ ਮਾਰਚ ਕੀਤਾ ਗਿਆ| ਪ੍ਰਬੰਧਕਾਂ ਨੇ ਆਖਿਆ ਕਿ ਭਾਵੇਂ ਇਹ ਤਬਦੀਲੀਆਂ ਕਾਰਗਰ ਹਨ ਪਰ ਇਹ ਬਹੁਤਾ ਚਿਰ ਨਹੀਂ ਚੱਲ ਸਕਣਗੀਆਂ|
ਇਸ ਦੌਰਾਨ ਲੋਕਾਂ ਨੇ ਐਜੂਕੇਸ਼ਨ ਐਕਟ ਵਿੱਚ ਸੋਧ ਕਰਕੇ ਬਲੈਕ ਹਿਸਟਰੀ ਨੂੰ ਪਾਠਕ੍ਰਮ ਵਿੱਚ ਸ਼ਾਮਲ ਕਰਨ ਦੀ ਮੰਗ ਵੀ ਕੀਤੀ| ਇਸ ਦੇ ਨਾਲ ਹੀ ਨਸਲੀ ਅਧਾਰ ਉੱਤੇ ਪੱਖਪਾਤ ਕਰਨ ਵਾਲੇ ਅਧਿਆਪਕਾਂ ਦੀ ਛੁੱਟੀ ਕਰਨ ਦੀ ਮੰਗ ਵੀ ਰੱਖੀ|