ਇੰਦੌਰ, 3 ਅਗਸਤ (ਪੋਸਟ ਬਿਊਰੋ)- ਮੱਧ ਪ੍ਰਦੇਸ਼ ਹਾਈ ਕੋਰਟ ਦੀ ਇੰਦੌਰ ਬੈਂਚ ਨੇ ਇੱਕ ਵਿਅਕਤੀ ਨੂੰ ਜ਼ਮਾਨਤ ਦਾ ਲਾਭ ਦਿੰਦੇ ਹੋਏ ਇਹ ਸ਼ਰਤ ਰੱਖੀ ਕਿ ਜਿਸ ਮਹਿਲਾ ਨਾਲ ਛਾੜਛਾੜ ਕੀਤੀ, ਉਸ ਦੇ ਘਰ ਜਾ ਕੇ ਰੱਖੜੀ ਬੰਨ੍ਹਵਾਉਣੀ ਤੇ ਉਸ ਦੇ ਬੱਚਿਆਂ ਨੂੰ ਸ਼ਗਨ ਵਜੋਂ ਰੁਪਏ ਵੀ ਦੇਣੇ ਹੋਣਗੇ।
ਬੀਤੇ ਅਪ੍ਰੈਲ ਵਿੱਚ ਵਿਕਰਮ ਬਾਗਰੀ ਨਾਂਅ ਦੇ ਵਿਅਕਤੀ ਨੇ ਇੱਕ ਮਹਿਲਾ ਦੇ ਘਰ ਵੜ ਕੇ ਛੇੜਛਾੜ ਕੀਤੀ ਸੀ। ਪੀੜਤ ਮਹਿਲਾ ਦੇ ਪਰਵਾਰ ਨੇ ਵਿਕਰਮ ਦੇ ਖਿਲਾਫ ਕੇਸ ਦਰਜ ਕੀਤਾ ਸੀ। ਵਿਕਰਮ ਨੇ ਹਾਈ ਕੋਰਟ ਵਿੱਚ ਜ਼ਮਾਨਤ ਲਈ ਅਰਜ਼ੀ ਦਿਤੀ ਸੀ। ਹਾਈ ਕੋਰਟ ਨੇ ਹੁਕਮ ਵਿੱਚ ਕਿਹਾ ਕਿ ਉਹ ਆਪਣੀ ਪਤਨੀ ਨਾਲ ਮਹਿਲਾ ਦੇ ਘਰ ਜਾਵੇ ਅਤੇ ਮਹਿਲਾ ਨੂੰ ਕਹੇ ਕਿ ਉਹ ਉਸ ਨੂੰ ਭਰਾ ਵਜੋਂ ਸਵੀਕਾਰ ਕਰੇ ਤੇ ਵਚਨ ਦੇਵੇ ਕਿ ਉਸ ਦੀ ਸਾਰੀ ਉਮਰ ਰੱਖਿਆ ਕਰੇਗਾ। ਰੱਖੜੀ ਬੰਨ੍ਹਵਾਉਣ 'ਤੇ 11000 ਰੁਪਏ ਵੀ ਦੇਵੇ। ਹਾਈ ਕੋਰਟ ਨੇ ਵਿਕਰਮ ਨੂੰ ਹੁਕਮ ਦਿੱਤੇ ਕਿ ਉਹ ਰੱਖੜੀ ਬੰਨ੍ਹਵਾਉਣ ਦੇ ਬਾਅਦ ਫੋਟੋਗਰਾਫ ਕੋਰਟ ਨੂੰ ਪੇਸ਼ ਕਰੇਗਾ। ਇਸ ਵਿੱਚ ਰੱਖੜੀ ਬੰਨ੍ਹਵਾਉਂਦੇ ਹੋਏ 5000 ਰੁਪਏ ਦਿੰਦੇ ਹੋਏ, ਮਿਠਾਈ ਅਤੇ ਕੱਪੜੇ ਦਿੰਦੇ ਹੋਏ ਫੋਟੋ ਪੇਸ਼ ਕਰਨੀਆਂ ਹੋਣਗੀਆਂ।
ਵਰਨਣ ਯੋਗ ਹੈ ਕਿ ਮਹਿਲਾ ਨੇ ਪੁਲਸ ਨੂੰ ਸਿ਼ਕਾਇਤ ਕੀਤੀ ਸੀ ਕਿ ਉਹ ਰੋਜ਼ ਉਸ ਨੂੰ ਛੇੜਦਾ ਹੈ। ਵਿਆਹੁਤਾ ਹੋਣ ਦੇ ਬਾਅਦ ਵੀ ਉਹ ਭੱਦੇ ਸ਼ਬਦ ਵਰਤਦਾ ਹੈ। ਉਸ ਨੂੰ ਕਈ ਵਾਰ ਘਰ ਦਿਆਂ ਨੇ ਸਮਝਾਉਣ ਦੀ ਕੋਸ਼ਿਸ਼ ਵੀ ਕੀਤੀ, ਪਰ ਉਸ 'ਤੇ ਇਸ ਦਾ ਕੋਈ ਅਸਰ ਨਹੀਂ ਹੋਇਆ।