ਨਵੀਂ ਦਿੱਲੀ, 3 ਅਗਸਤ (ਪੋਸਟ ਬਿਊਰੋ)- ਭਾਰਤ ਸਰਕਾਰ ਨੇ ਵਿਦੇਸ਼ਾਂ ਤੋਂ ਭਾਰਤ ਆਉਂਦੇ ਲੋਕਾਂ ਲਈ ਕੋਵਿਡ 19 ਮਹਾਮਾਰੀ ਦੇ ਕਾਰਨ ਕੱਲ੍ਹ ਨਵੇਂ ਨਿਰਦੇਸ਼ ਜਾਰੀ ਕੀਤੇ ਹਨ। ਇਸ ਦੇ ਤਹਿਤ ਜ਼ਰੂਰੀ ਸਰਕਾਰੀ ਕਵਾਰੰਟਾਈਨ ਤੋਂ ਛੋਟ ਦੇ ਲਈ ਯਾਤਰਾ ਕਰਨ ਤੋਂ ਪਹਿਲਾਂ ਹੀ ਆਨਲਾਈਨ ਅਪਲਾਈ ਕਰਨ ਹੋਵੇਗਾ।
ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਨੇ ਦੱਸਿਆ ਕਿ ਨਵੇਂ ਨਿਰਦੇਸ਼ ਅੱਠ ਅਗਸਤ ਤੋਂ ਲਾਗੂ ਹੋਣਗੇ। ਇਸ ਵਿੱਚ ਸਿਰਫ ਕੁਝ ਵਰਗਾਂ ਦੇ ਲੋਕਾਂ ਨੂੰ ਜ਼ਰੂਰੀ ਸਰਕਾਰੀਂ ਕਵਾਰੰਟਾਈਨ ਤੋਂ ਛੋਟ ਦਿੱਤੀ ਜਾਏਗੀ, ਜਿਸ ਲਈ ਉਨ੍ਹਾਂ ਨੂੰ ਯਾਤਰਾ ਕਰਨ ਤੋਂ ਘੱਟ ਤੋਂ ਘੱਟ 72 ਘੰਟੇ ਪਹਿਲਾਂ ਆਨਲਾਈਨ ਪੋਰਟਲ 'ਤੇ ਅਪਲਾਈ ਕਰਨਾ ਹੋਵੇਗਾ। ਜੇ ਕੋਈ ਯਾਤਰੀ ਜਹਾਜ਼ ਵਿੱਚ ਸਵਾਰ ਹੋਣ ਤੋਂ 96 ਘੰਟੇ ਪਹਿਲਾਂ ਕੋਵਿਡ 19 ਦੀ ਜਾਂਚ ਕਰਾਉਂਦਾ ਹੈ ਅਤੇ ਉਸ ਦੀ ਰਿਪੋਰਟ ਨੈਗੇਟਿਵ ਆਉਂਦੀ ਹੈ ਤਾਂ ਉਸ ਨੂੰ ਸਰਕਾਰੀ ਕਵਾਰੰਟਾਈਨ ਤੋਂ ਛੋਟ ਮਿਲ ਜਾਏਗੀ, ਪਰ ਘਰ ਵਿੱਚ 14 ਦਿਨ ਤੱਕ ਕਵਾਰੰਟਾਈਨ ਰਹਿਣਾ ਹੋਵੇਗਾ। ਨਵੇਂ ਨਿਰੇਦਸ਼ਾਂ ਮੁਤਾਬਕ ਕਵਾਰੰਟਾਈਨ ਤੋਂ ਛੋਟ ਲਈ ਆਨਲਾਈਨ ਅਪਲਾਈ ਕਰਨ ਪਿੱਛੋਂ ਸਰਕਾਰ ਦਾ ਜੋ ਵੀ ਫੈਸਲਾ ਹੋਵੇਗਾ, ਉਹ ਅੰਤਿਮ ਹੋਵੇਗਾ ਅਤੇ ਫਿਰ ਉਸ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਜਾਏਗਾ।
ਇਸ ਵਕਤ ਜਾਰੀ ਵਿਵਸਥਾ ਹੇਠ ਲੋਕ ਭਾਰਤ ਆਉਣ ਪਿੱਛੋਂ ਇੰਟਰੀ ਸਥਾਨ 'ਤੇ ਕਵਾਰੰਟਾਈਨ ਤੋਂ ਛੋਟ ਲਈ ਅਪਲਾਈ ਕਰਦੇ ਸਨ ਤਾਂ ਇਸ ਵਿੱਚ ਕਾਫੀ ਸਮਾਂ ਲੱਗਦਾ ਸੀ ਅਤੇ ਹਵਾਈ ਅੱਡੇ ਦੇ ਨਿਕਾਸ 'ਤੇ ਲੰਬੀਆਂ ਲਾਈਨਾਂ ਲੱਗ ਜਾਂਦੀਆਂ ਸਨ। ਮੰਤਰਾਲੇ ਨੇ ਦੱਸਿਆ ਕਿ ਉਡਾਣ ਦੇ ਸਮੇਂ ਤੋਂ ਘੱਟ ਤੋਂ ਘੱਟ 72 ਘੰਟੇ ਪਹਿਲਾਂ ਐਫੀਡੇਵਿਟ ਦੇਣਾ ਹੋਵੇਗਾ। ਉਨ੍ਹਾਂ ਨੂੰ ਐਲਾਨ ਕਰਨਾ ਹੋਵੇਗਾ ਕਿ ਉਹ ਭਾਰਤ ਆਉਣ 'ਤੇ 14 ਦਿਨ ਕਵਾਰੰਟਾਈਨ ਦਾ ਪਾਲਣ ਕਰਨਗੇ, ਜਿਸ ਵਿੱਚ ਸੱਤ ਦਿਨ ਜ਼ਰੂਰੀ ਸਰਕਾਰੀ ਕਵਾਰੰਟਾਈਨ ਖਰਚ ਉਹ ਖੁਦ ਝੱਲਣਗੇ। ਨਿਰਦੇਸ਼ਾਂ ਮੁਤਾਬਕ ਹਵਾਈ ਰਸਤੇ ਤੋਂ, ਸਮੁੰਦਰੀ ਰਸਤੇ ਜਾਂ ਸੜਕ ਮਾਰਗ ਰਾਹੀਂ ਭਾਰਤ ਆਉਣ ਵਾਲਿਆਂ ਦੀ ਇਥੇ ਆ ਕੇ ਸਿਹਤ ਜਾਂਚ ਕੀਤੀ ਜਾਏਗੀ। ਜਿਨ੍ਹਾਂ ਲੋਕਾਂ ਨੂੰ ਕੋਵਿਡ 19 ਦੇ ਲੱਛਣ ਜਾਪਣਗੇ, ਉਨ੍ਹਾਂ ਨੂੰ ਵੱਖ ਕਰ ਕੇ ਸਿਹਤ ਸਹੂਲਤ ਕੇਂਦਰ ਲਿਜਾਇਆ ਜਾਏਗਾ। ਸਕਰੀਨਿੰਗ ਦੇ ਬਾਅਦ ਛੋਟ ਪ੍ਰਾਪਤ ਯਾਤਰੀਆਂ ਨੂੰ ਛੱਡ ਕੇ ਬਾਕੀ ਯਾਤਰੀਆਂ ਨੂੰ ਸੰਸਥਾ ਵਿੱਚ ਕਵਾਰੰਟਾਈਨ ਵਿੱਚ ਭੇਜ ਦਿੱਤਾ ਜਾਏਗਾ।