* ਰਾਜੀਵ ਗਾਂਧੀ ਦਾ ਰਾਮ ਮੰਦਰ ਲਈ ਯੋਗਦਾਨ ਦੱਸਿਆ
ਨਵੀਂ ਦਿੱਲੀ, 2 ਅਗਸਤ, (ਪੋਸਟ ਬਿਊਰੋ)- ਜਦੋਂ ਅਗਲੀ 5 ਅਗਸਤ ਨੂੰ ਅਯੁੱਧਿਆ ਵਿਚ ਰਾਮ ਮੰਦਰ ਬਣਾਉਣ ਲਈ ਭੂਮੀ ਪੂਜਨ ਸਮਾਗਮ ਦੀ ਤਿਆਰੀ ਹੋ ਚੁੱਕੀ ਹੈ ਅਤੇ ਇਸ ਸਮਾਗਮ ਦੀ ਅਗਵਾਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਕਰਨ ਵਾਲੇ ਹਨ, ਓਦੋਂਭਾਰਤੀ ਜਨਤਾ ਪਾਰਟੀ ਦੇ ਪਾਰਲੀਮੈਂਟ ਮੈਂਬਰ ਸੁਬਰਾਮਨੀਅਮ ਸਵਾਮੀ ਨੇ ਸਿੱਧਾ ਹੀ ਇਹ ਕਹਿ ਦਿੱਤਾ ਹੈ ਕਿ ‘ਰਾਮ ਮੰਦਰ ਬਣਾਉਣ ਵਿਚ ਪ੍ਰਧਾਨ ਮੰਤਰੀ ਮੋਦੀ ਦਾ ਕੋਈ ਯੋਗਦਾਨ ਹੀ ਨਹੀਂ ਹੈ`। ਉਨ੍ਹਾਂ ਇਹ ਵੀ ਕਹਿ ਦਿੱਤਾ ਕਿ ‘ਪੰਜ ਸਾਲਾਂ ਤੋਂ ਰਾਮ ਸੇਤੂ ਦੀ ਫਾਈਲ ਮੋਦੀ ਦੇ ਟੇਬਲ ਉੱਤੇ ਪਈ ਹੋਈ ਹੈ, ਕੁਝ ਨਹੀਂ ਕੀਤਾ ਗਿਆ`।
ਅਸਲ ਵਿੱਚ ਇਕ ਟੀਵੀ ਚੈਨਲ ਨਾਲ ਗੱਲਬਾਤ ਦੌਰਾਨ ਸਵਾਮੀ ਕੋਲੋਂ ਇਹ ਪੁੱਛਿਆ ਗਿਆ ਸੀ ਕਿ ਰਾਮ ਮੰਦਰ ਭੂਮੀ ਪੂਜਨ ਵਿਚ ਹੋਰ ਕਿਸ-ਕਿਸ ਨੂੰ ਸੱਦਿਆ ਜਾਣਾ ਚਾਹੀਦਾ ਸੀ। ਜਵਾਬ ਵਿਚ ਸਵਾਮੀ ਨੇ ਕਿਹਾ ਕਿ‘ਰਾਮ ਮੰਦਰ ਦੀ ਉਸਾਰੀ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਕੋਈ ਯੋਗਦਾਨਨਹੀਂ, ਸਾਰੀ ਬਹਿਸ ਅਸੀਂ ਕੀਤੀ ਸੀ। ਜਿੱਥੋਂ ਤੱਕ ਮੈਂ ਜਾਣਦਾ ਹਾਂ, ਸਰਕਾਰ ਵੱਲੋਂਮੋਦੀ ਨੇ ਏਦਾਂ ਦਾ ਕੋਈ ਕੰਮ ਨਹੀਂ ਕੀਤਾ, ਜਿਸ ਬਾਰੇ ਉਹ ਕਹਿ ਸਕਣ`। ਸਵਾਮੀ ਨੇ ਕਿਹਾ ਕਿ ‘ਜਿਨ੍ਹਾਂ ਲੋਕਾਂ ਨੇ ਇਸ ਲਈ ਕੰਮ ਕੀਤਾ, ਉਨ੍ਹਾਂ ਵਿਚ ਰਾਜੀਵ ਗਾਂਧੀ, ਪੀ ਵੀ ਨਰਸਿਮਹਾ ਰਾਓ ਤੇ ਅਸ਼ੋਕ ਸਿੰਘਲ ਦਾ ਨਾਮ ਹੈ। ਅਟਲ ਬਿਹਾਰੀ ਵਾਜਪਾਈ ਨੇ ਵੀ ਇਸ ਵਿਚ ਰੁਕਾਵਟ ਪਾਈ ਸੀ।’ ਭਾਜਪਾ ਐੱਮ ਪੀ ਸੁਬਰਾਮਨੀਅਮ ਸਵਾਮੀ ਨੇ ਕਿਹਾ ਕਿ ਸ੍ਰੀਲੰਕਾ ਵਾਲੇ ਸਮੁੰਦਰ ਵਿੱਚ ਰਾਮ ਸੇਤੂ ਨੂੰ ਰਾਸ਼ਟਰੀ ਵਿਰਾਸਤ ਐਲਾਨਣ ਦੀ ਫਾਈਲ 5 ਸਾਲਾਂ ਤੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਟੇਬਲ ਉੱਤੇ ਹੈ, ਉਨਾਂ ਨੇ ਹਾਲੇ ਦਸਖ਼ਤ ਨਹੀਂ ਕੀਤੇ। ਸਵਾਮੀ ਨੇ ਕਿਹਾ ਕਿ ਮੈਂ ਕੋਰਟ ਜਾ ਕੇ ਆਦੇਸ਼ ਵੀ ਦਿਵਾ ਸਕਦਾ ਹਾਂ, ਪਰ ਮੈਨੂੰ ਬੁਰਾ ਲੱਗਦਾ ਹੈ ਕਿ ਸਾਡੀ ਪਾਰਟੀ ਹੋਣ ਦੇ ਬਾਵਜੂਦ ਸਾਨੂੰ ਕੋਰਟ ਜਾਣਾ ਪਵੇ।
ਦੂਸਰੇ ਪਾਸੇ ਖਬਰ ਹੈ ਕਿ ਰਾਮ-ਰੱਥ ਯਾਤਰਾ ਚਲਾ ਕੇ ਰਾਮ ਮੰਦਰ ਅੰਦੋਲਨ ਨੂੰ ਰਾਸ਼ਟਰੀ ਪੱਧਰੀ ਉੱਤੇ ਉਭਾਰਨ ਵਾਲੇ ਸਾਬਕਾ ਉਪ ਪ੍ਰਧਾਨ ਮੰਤਰੀ ਲਾਲ ਕ੍ਰਿਸ਼ਨ ਅਡਵਾਨੀ ਅਤੇ ਭਾਜਪਾਦੇ ਸਾਬਕਾ ਪ੍ਰਧਾਨ ਡਾ. ਮੁਰਲੀ ਮਨੋਹਰ ਜੋਸ਼ੀ ਪੰਜ ਅਗਸਤ ਨੂੰ ਰਾਮ ਮੰਦਰ ਦੇ ਭੂਮੀ ਪੂਜਨ ਪ੍ਰੋਗਰਾਮ ਵਿਚ ‘ਵਰਚੁਅਲੀ’ ਸ਼ਾਮਲ ਰਹਿਣਗੇ, ਉਨ੍ਹਾਂ ਨੂੰ ਓਥੇ ਪੁੱਜਣ ਦਾ ਕੋਈ ਸੱਦਾ ਨਹੀਂ ਦਿੱਤਾ ਗਿਆ। ਉਂਜ ਉਸ ਦਿਨ ਸਮਾਗਮ ਲਈ ਹਿੰਦੂ ਹੀਨਹੀਂ, ਹੋਰ ਸੰਪਰਦਾਵਾਂ ਤੇ ਪੰਥਾਂ ਦੇ ਧਾਰਮਿਕ ਆਗੂਆਂ ਤੇ ਵਿਸ਼ੇਸ਼ ਹਸਤੀਆਂਨੂੰ ਵੀ ਸੱਦਿਆ ਗਿਆ ਹੈ। ਸ੍ਰੀ ਰਾਮ ਜਨਮਭੂਮੀ ਤੀਰਥ ਖੇਤਰ ਟਰੱਸਟ ਨਾਲ ਜੁੜੇ ਲੋਕਾਂ ਦਾ ਕਹਿਣਾ ਹੈ ਕਿ ਭੂਮੀ ਪੂਜਨ ਪ੍ਰੋਗਰਾਮ ਦਾ ਸੱਦਾਸਾਬਕਾ ਉਪ ਪ੍ਰਧਾਨ ਮੰਤਰੀ ਲਾਲਕ੍ਰਿਸ਼ਨ ਅਡਵਾਨੀ ਅਤੇ ਭਾਜਪਾ ਦੇ ਸਾਬਕਾ ਪ੍ਰਧਾਨ ਡਾ. ਮੁਰਲੀ ਮਨੋਹਰ ਜੋਸ਼ੀ ਨੂੰ ਦਿੱਤਾ ਗਿਆ ਹੈ, ਪਰ ਉਮਰ ਅਤੇ ਖਰਾਬ ਸਿਹਤ ਕਾਰਨ ਉਹ ਪ੍ਰੋਗਰਾਮ ਵਿਚ ਸ਼ਾਮਲ ਨਹੀਂ ਹੋ ਸਕਣਗੇ, ਉਨ੍ਹਾਂ ਦੇ ਵੀਡੀਓ ਕਾਨਫਰੰਸਿੰਗ ਰਾਹੀਂ ਸ਼ਾਮਲ ਹੋਣ ਦੀ ਯੋਜਨਾ ਹੈ।