ਵਾਸਿ਼ੰਗਟਨ, 16 ਨਵੰਬਰ (ਪੋਸਟ ਬਿਊਰੋ) : ਕੈਨੇਡਾ, ਅਮਰੀਕਾ ਤੇ ਮੈਕਸਿਕੋ ਦਰਮਿਆਨ ਨਵੇਂ ਵਪਾਰਕ ਸਮਝੌਤੇ ਨੂੰ ਲੈ ਕੇ ਡੀਲ ਸਿਰੇ ਚੜ੍ਹ ਚੁੱਕੀ ਹੈ।
ਪਰ ਇਸ ਤੋਂ ਇਹ ਭਾਵ ਨਹੀਂ ਹੈ ਕਿ ਇਹ ਗੱਲਬਾਤ ਮੁੱਕ ਚੁੱਕੀ ਹੈ। ਇਸ ਨਵੇਂ ਯੂਐਸ-ਮੈਕਸਿਕੋ-ਕੈਨੇਡਾ ਅਗਰੀਮੈਂਟ ਨੂੰ ਲਾਗੂ ਕਰਨ ਲਈ ਤਿੰਨਾਂ ਮੁਲਕਾਂ ਦੀ ਸੰਸਦ ਵੱਲੋਂ ਇਸ ਨੂੰ ਮਨਜ਼ੂਰੀ ਦੇਣੀ ਜ਼ਰੂਰੀ ਹੋਵੇਗੀ। ਇਹ ਵੀ ਦੱਸਣਾ ਬਣਦਾ ਹੈ ਕਿ ਹਾਊਸ ਆਫ ਰਿਪ੍ਰਜ਼ੈਂਟੇਟਿਵਜ਼ ਉੱਤੇ ਵੀ ਮੁੜ ਡੈਮੋਕ੍ਰੈਟਸ ਦਾ ਕਬਜਾ ਹੋ ਗਿਆ ਹੈ। ਡੈਮੋਕ੍ਰੈਟਸ ਨੇ ਵੀ ਪਿਛਲੇ ਹਫਤੇ ਇਹ ਸੰਕੇਤ ਦਿੱਤਾ ਹੈ ਕਿ ਉਹ ਇਸ ਡੀਲ ਦੇ ਹੱਕ ਵਿੱਚ ਵੋਟ ਪਾਉਣ ਲਈ ਤਿਆਰ ਨਹੀਂ ਹਨ।
ਵੀਰਵਾਰ ਨੂੰ ਵਾਸਿ਼ੰਗਟਨ ਵਿੱਚ ਯੂਐਸਐਮਸੀਏ ਦੀ ਸੁਣਵਾਈ ਦੌਰਾਨ ਟਰੇਡ ਬਾਰੇ ਹਾਊਸ ਦੀ ਸਬਕਮੇਟੀ ਦੇ ਉੱਘੇ ਡੈਮੋਕ੍ਰੈਟ ਬਿੱਲ ਪਾਸਰੈੱਲ ਨੇ ਆਖਿਆ ਕਿ ਇਸ ਵਿੱਚ ਕੋਈ ਸੱ਼ਕ ਨਹੀਂ ਕਿ ਯੂਐਸਐਮਸੀਏ ਵਿੱਚ ਨਾਫਟਾ ਨਾਲੋਂ ਕੁੱਝ ਸੋਧਾਂ ਤਾਂ ਯਕੀਨਨ ਹੋਈਆਂ ਹਨ ਪਰ ਇਸ ਡੀਲ ਬਾਰੇ ਅਜੇ ਵੀ ਇਹ ਤੈਅ ਕੀਤਾ ਜਾਣਾ ਬਾਕੀ ਹੈ ਕਿ ਕੀ ਇਹ ਅਮਰੀਕੀ ਕਾਮਿਆਂ ਲਈ ਬਿਹਤਰ ਤੇ ਮਿਆਰੀ ਹੈ। ਟਰੰਪ ਦੀ ਟੀਮ ਦਾ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਅਜਿਹੀ ਡੀਲ ਤਿਆਰ ਕੀਤੀ ਗਈ ਹੈ ਜਿਹੜੀ ਅਮਰੀਕਾ ਦੀ ਲੇਬਰ ਮੂਵਮੈਂਟ ਦਾ ਵੀ ਸਮਰਥਨ ਹਾਸਲ ਕਰੇਗੀ। ਪਰ ਏਐਫਐਲ-ਸੀਆਈਓ ਲੇਬਰ ਗੱਠਜੋੜ ਨੇ ਵੀਰਵਾਰ ਨੂੰ ਸਪਸ਼ਟ ਕੀਤਾ ਕਿ ਉਹ ਅਜੇ ਆਪਣਾ ਫੈਸਲਾ ਸਾਂਭ ਕੇ ਰੱਖਣਗੇ ਤੇ ਉਜਾਗਰ ਨਹੀਂ ਕਰਨਗੇ।
ਏਐਫਐਲ-ਸੀਆਈਓ ਟਰੇਡ ਪਾਲਿਸੀ ਮਾਹਿਰ ਸੈਲੈਸਤੇ ਡਰੇਕ ਨੇ ਵੀ ਇਸ ਮੌਕੇ ਆਖਿਆ ਕਿ ਇਸ ਵਿੱਚ ਤਿੰਨ ਸਕਾਰਾਤਮਕ ਤਬਦੀਲੀਆਂ ਹਨ ਜਿਵੇਂ ਕਿ ਲੇਬਰ ਤੇ ਉਤਪਾਦਨ ਸਬੰਧੀ ਨਿਯਮਾਂ ਲਈ ਸੋਧੀਆਂ ਹੋਈਆਂ ਟਰਮਜ਼ ਪਰ ਇਹ ਸਪਸ਼ਟ ਨਹੀਂ ਹੋਇਆ ਕਿ ਇਹ ਸੋਧਾਂ ਰੋਜ਼ਗਾਰ ਤੇ ਭੱਤਿਆਂ ਆਦਿ ਲਈ ਅਰਥਭਰਪੂਰ ਫਰਕ ਲਈ ਕਾਫੀ ਹੋਣਗੀਆਂ। ਹੋਰਨਾਂ ਨਿਯਮਾਂ ਵਿੱਚ ਕੰਮਕਾਜੀ ਪਰਿਵਾਰਾਂ ਦੇ ਹਿਤਾਂ ਦੀ ਅਣਦੇਖੀ ਕੀਤੀ ਗਈ ਹੈ। ਜਿ਼ਕਰਯੋਗ ਹੈ ਕਿ ਜਦੋਂ ਤੱਕ ਯੂਐਸਐਮਸੀਏ ਬਾਰੇ ਬਹਿਸ ਜਾਰੀ ਰਹੇਗੀ ਉਦੋਂ ਤੱਕ ਨਾਫਟਾ ਹੀ ਪ੍ਰਭਾਵੀ ਰਹੇਗਾ।