ਲੰਡਨ, 16 ਨਵੰਬਰ (ਪੋਸਟ ਬਿਊਰੋ) : ਬ੍ਰਿਟੇਨ ਦੀ ਪ੍ਰਧਾਨ ਮੰਤਰੀ ਥੈਰੇਸਾ ਮੇਅ ਨੇ ਸੁ਼ੱਕਰਵਾਰ ਨੂੰ ਸਿੱਧੇ ਤੌਰ ਉੱਤੇ ਵੋਟਰਾਂ ਨੂੰ ਅਪੀਲ ਕੀਤੀ ਕਿ ਉਹ ਉਨ੍ਹਾਂ ਦੇ ਬ੍ਰੈਗਜਿ਼ੱਟ ਪਲੈਨ ਦਾ ਸਮਰਥਨ ਕਰਨ। ਮੇਅ ਇਸ ਗੱਲ ਦੀ ਵੀ ਉਡੀਕ ਕਰ ਰਹੀ ਹੈ ਕਿ ਉਨ੍ਹਾਂ ਦੀ ਪਾਰਟੀ ਵਿਚਲੇ ਵਿਰੋਧੀ ਕਿਤੇ ਸਮਰਥਨ ਹਾਸਲ ਕਰਕੇ ਉਸ ਨੂੰ ਲੀਡਰਸਿ਼ਪ ਚੁਣੌਤੀ ਹੀ ਨਾ ਦੇਣ।
ਆਪਣੇ ਅਹੁਦੇ ਉੱਤੇ ਕਾਇਮ ਰਹਿਣ ਦਾ ਤਹੱਈਆ ਪ੍ਰਗਟਾਉਣ ਤੋਂ ਇੱਕ ਦਿਨ ਬਾਅਦ ਮੇਅ ਨੇ ਰੇਡੀਓ ਫੋਨ ਉੱਤੇ ਕਾਲਰਜ਼ ਦੇ ਸਵਾਲਾਂ ਦੇ ਜਵਾਬ ਵੀ ਦਿੱਤੇ। ਪਰ ਉਨ੍ਹਾਂ ਲਈ ਇਹ ਗੱਲਬਾਤ ਸੁਖਾਲੀ ਨਹੀਂ ਰਹੀ। ਇੱਕ ਕਾਲਰ ਨੇ ਇਹ ਵੀ ਆਖਿਆ ਕਿ ਮੇਅ ਨੂੰ ਅਸਤੀਫਾ ਦੇ ਦੇਣਾ ਚਾਹੀਦਾ ਹੈ ਤੇ ਕਿਸੇ ਹੋਰ ਦਮਦਾਰ ਤੇ ਬ੍ਰੈਗਜਿ਼ੱਟ ਪੱਖੀ ਸਿਆਸਤਦਾਨ ਨੂੰ ਆਪਣੀ ਥਾਂ ਲੈ ਲੈਣ ਦੇਣੀ ਚਾਹੀਦੀ ਹੈ। ਇੱਕ ਹੋਰ ਕਾਲਰ ਨੇ ਉਨ੍ਹਾਂ ਦੀ ਤੁਲਨਾ 1930ਵਿਆਂ ਦੇ ਪ੍ਰਧਾਨ ਮੰਤਰੀ ਨੈਵਿਲੇ ਚੇਂਬਰਲੇਨ ਨਾਲ ਕੀਤੀ, ਜੋ ਜੰਗ ਟਾਲਣ ਲਈ ਹਮੇਸ਼ਾਂ ਨਾਜ਼ੀਆਂ ਨੂੰ ਖੁਸ਼ ਕਰਨ ਦੀ ਹੀ ਕੋਸਿ਼ਸ਼ ਵਿੱਚ ਲੱਗੇ ਰਹੇ। ਪਰ ਮੇਅ ਆਪਣੇ ਪਲੈਨ ਉੱਤੇ ਹੀ ਕਾਇਮ ਰਹੀ।
ਮੇਅ ਆਪਣੀ ਬ੍ਰੈਗਜਿ਼ੱਟ ਯੋਜਨਾ ਤੇ ਆਪਣੀ ਨੌਕਰੀ ਨੂੰ ਬਚਾਉਣ ਲਈ ਸੰਘਰਸ਼ ਕਰ ਰਹੀ ਹੈ। ਜਿ਼ਕਰਯੋਗ ਹੈ ਕਿ ਬ੍ਰਿਟੇਨ ਤੇ ਯੂਰਪੀਅਨ ਯੂਨੀਅਨ ਦਰਮਿਆਨ ਬ੍ਰੈਗਜਿ਼ੱਟ ਸਬੰਧੀ ਡਰਾਫਟ ਨੂੰ ਵਾਪਿਸ ਲੈਣ ਦੇ ਸਮਝੌਤੇ ਦਾ ਮੇਅ ਦੀ ਹੀ ਕੰਜ਼ਰਵੇਟਿਵ ਪਾਰਟੀ ਵਿੱਚ ਵਿਰੋਧ ਹੋਣ ਨਾਲ ਮੇਅ ਲਈ ਸਥਿਤੀ ਕਾਫੀ ਕਸੂਤੀ ਬਣ ਚੁੱਕੀ ਹੈ। ਕਈ ਕੰਜ਼ਰਵੇਟਿਵ ਨੀਤੀਘਾੜੇ ਮੇਅ ਖਿਲਾਫ ਬੇਭਰੋਸਗੀ ਮਤੇ ਲਈ ਜ਼ੋਰ ਲਾ ਰਹੇ ਹਨ। ਇੱਥੇ ਦੱਸਣਾ ਬਣਦਾ ਹੈ ਕਿ ਜੇ ਮੇਅ ਪਾਰਟੀ ਆਗੂ ਦਾ ਆਪਣਾ ਅਹੁਦਾ ਗੁਆਉਂਦੀ ਹੈ ਤਾਂ ਪ੍ਰਧਾਨ ਮੰਤਰੀ ਦੇ ਅਹੁਦੇ ਤੋਂ ਵੀ ਉਸ ਨੂੰ ਹੱਥ ਧੁਆਉਣੇ ਪੈਣਗੇ।