ਓਨਟਾਰੀਓ, 15 ਨਵੰਬਰ (ਪੋਸਟ ਬਿਊਰੋ) : ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਪਾਰਟੀ ਵਿੱਚੋਂ ਕੱਢੇ ਗਏ ਆਗੂ ਪੈਟ੍ਰਿਕ ਬ੍ਰਾਊਨ ਨੇ ਆਪਣੀ ਸੁ਼ੱਕਰਵਾਰ ਨੂੰ ਰਲੀਜ਼ ਹੋਣ ਜਾ ਰਹੀ ਕਿਤਾਬ ਵਿੱਚ ਆਪਣੇ ਦੋਖੀਆਂ ਉੱਤੇ ਨਿਸ਼ਾਨਾ ਸਾਧਿਆ ਹੈ। ਇੱਥੋਂ ਤੱਕ ਕਿ ਉਨ੍ਹਾਂ ਵਿੱਤ ਮੰਤਰੀ ਵਿੱਕ ਫੈਡੇਲੀ ਨੂੰ ਹੀ ਪਾਰਟੀ ਵਿੱਚੋਂ ਖੁਦ ਨੂੰ ਕੱਢੇ ਜਾਣ ਲਈ ਜਿ਼ੰਮੇਵਾਰ ਠਹਿਰਾਇਆ ਹੈ।
ਉਨ੍ਹਾਂ ਦੀ ਕਿਤਾਬ “ਟੇਕਡਾਊਨ : ਦ ਅਟੈਂਪਟਿਡ ਪੁਲਿਟਿਕਲ ਅਸੈਸੀਨੇਸ਼ਨ ਆਫ ਪੈਟ੍ਰਿਕ ਬ੍ਰਾਊਨ”, ਭਾਵੇਂ ਅਜੇ ਰਲੀਜ਼ ਨਹੀਂ ਹੋਈ ਪਰ ਇਸ ਦੀਆਂ ਕੁੱਝ ਕਾਪੀਆਂ ਮੀਡੀਆ ਵੱਲੋਂ ਅਗਾਊਂ ਹਾਸਲ ਕਰ ਲਈਆਂ ਗਈਆਂ ਹਨ। ਪਿਛਲੇ ਮਹੀਨੇ ਬ੍ਰਾਊਨ ਨੂੰ ਬਰੈਂਪਟਨ ਦਾ ਮੇਅਰ ਚੁਣਿਆ ਗਿਆ। ਜਿ਼ਕਰਯੋਗ ਹੈ ਕਿ ਦੋ ਮਹਿਲਾਵਾਂ ਵੱਲੋਂ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਲਾਏ ਜਾਣ ਕਾਰਨ ਜਨਵਰੀ ਵਿੱਚ ਬ੍ਰਾਊਨ ਨੂੰ ਧੱਕੇ ਨਾਲ ਟੋਰੀ ਆਗੂ ਵਜੋਂ ਅਸਤੀਫਾ ਦੇਣ ਲਈ ਮਜਬੂਰ ਕੀਤਾ ਗਿਆ ਸੀ। ਉਨ੍ਹਾਂ ਇਹ ਦੋਸ਼ ਵੀ ਲਾਇਆ ਕਿ ਪਿਛਲੇ ਸਾਲ ਇੱਕ ਮਹਿਲਾ ਸਟਾਫਰ ਵੱਲੋਂ ਫੈਡੇਲੀ ਉੱਤੇ ਵੀ ਅਨੁਚਿਤ ਵਿਵਹਾਰ ਦਾ ਦੋਸ਼ ਲਾਇਆ ਗਿਆ ਸੀ। ਪਰ ਉਸ ਮਹਿਲਾ ਦੇ ਇਸ ਬਾਬਤ ਕੋਈ ਕਾਰਵਾਈ ਨਾ ਕੀਤੇ ਜਾਣ ਦੇ ਇਰਾਦੇ ਕਾਰਨ ਉਸ ਮਾਮਲੇ ਨੂੰ ਦਬਾਅ ਦਿੱਤਾ ਗਿਆ।
ਬ੍ਰਾਊਨ ਨੇ ਆਪਣੀ ਕਿਤਾਬ ਵਿੱਚ ਲਿਖਿਆ ਕਿ ਇਸ ਤੋਂ ਜਲਦ ਬਾਅਦ ਹੀ ਫੈਡੇਲੀ ਨੂੰ ਪਾਰਟੀ ਦਾ ਅੰਤਰਿਮ ਆਗੂ ਬਣਾ ਦਿੱਤਾ ਗਿਆ ਤੇ ਮਾਮਲਾ ਆਇਆ ਗਿਆ ਹੋ ਗਿਆ। ਇਸ ਦੌਰਾਨ ਬੁੱਧਵਾਰ ਨੂੰ ਬਿਆਨ ਜਾਰੀ ਕਰਕੇ ਫੈਡੇਲੀ ਨੇ ਬ੍ਰਾਊਨ ਵੱਲੋਂ ਲਾਏ ਗਏ ਦੋਸ਼ ਸਰਾਸਰ ਗਲਤ ਹਨ ਤੇ ਇਨ੍ਹਾਂ ਵਿੱਚ ਕੋਈ ਸੱਚਾਈ ਨਹੀਂ ਹੈ। ਉਨ੍ਹਾਂ ਇਹ ਵੀ ਆਖਿਆ ਕਿ ਬ੍ਰਾਊਨ ਬਦਲੇ ਲੈਣ ਲਈ ਆਪਣੀ ਕਿਤਾਬ ਦੀ ਵਰਤੋਂ ਕਰ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਇਸ ਤਰ੍ਹਾਂ ਦੀਆਂ ਝੂਠੀਆਂ ਅਫਵਾਹਾਂ ਫੈਲਾਉਣ ਵਾਲੇ ਖਿਲਾਫ ਉਹ ਵੀ ਕਾਨੂੰਨੀ ਕਾਰਵਾਈ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹਨ।
ਬ੍ਰਾਊਨ ਨੇ ਆਪਣੀ ਕਿਤਾਬ ਵਿੱਚ ਇਹ ਵੀ ਆਖਿਆ ਕਿ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਲੱਗਣ ਦੇ ਬਾਵਜੂਦ ਡੱਗ ਫੋਰਡ ਨੇ ਮਾਰਚ ਵਿੱਚ ਹੋਈਆਂ ਪੀਸੀ ਪਾਰਟੀ ਲੀਡਰਸਿ਼ਪ ਚੋਣਾਂ ਦੌਰਾਨ ਉਨ੍ਹਾਂ ਨਾਲ ਵਾਅਦਾ ਕੀਤਾ ਸੀ ਕਿ ਜੇ ਉਹ ਆਪਣੀ ਸੰਸਥਾ ਨੂੰ ਉਨ੍ਹਾਂ ਨੂੰ ਪੱਕੇ ਪੈਂਰੀਂ ਕਰਨ ਲਈ ਵਰਤਦੇ ਹਨ ਤਾਂ ਉਨ੍ਹਾਂ ਨੂੰ ਸਰਕਾਰ ਬਣਨ ਉੱਤੇ ਪਸੰਦੀਦਾ ਅਹੁਦਾ ਦਿੱਤਾ ਜਾਵੇਗਾ। ਪਰ ਬੁੱਧਵਾਰ ਨੂੰ ਹੀ ਪ੍ਰੀਮੀਅਰ ਨੇ ਵੀ ਟਵੀਟ ਕੀਤਾ ਕਿ ਕਿਤਾਬ ਵਿੱਚ ਬੋਲੇ ਗਏ ਝੂਠਾਂ ਤੋਂ ਘਿਣ ਆਉਂਦੀ ਹੈ।
ਬ੍ਰਾਊਨ ਨੇ ਕਿਤਾਬ ਵਿੱਚ ਜਿ਼ਕਰ ਕੀਤਾ ਕਿ ਉਨ੍ਹਾਂ ਨਾਲ ਖੜ੍ਹੇ ਰਹਿਣ ਦੇ ਦਾਅਵੇ ਕਰਨ ਵਾਲਿਆਂ ਅਲੀਖਾਨ ਵੈਲਸੀ, ਡੈਨ ਰੌਬਰਟਸਨ, ਐਂਡਰਿਊ ਬੌਡਿੰਗਟਨ ਤੇ ਨਿੱਕ ਬਰਗਾਮਿਨੀ ਨੇ ਕਿਸ ਤਰ੍ਹਾਂ ਔਖੇ ਵੇਲੇ ਉਨ੍ਹਾਂ ਦੀ ਪਿੱਠ ਵਿੱਚ ਹੀ ਛੁਰਾ ਖੋਭ ਦਿੱਤਾ ਤੇ ਉਨ੍ਹਾਂ ਦਾ ਸਾਥ ਛੱਡ ਦਿੱਤਾ। ਉਨ੍ਹਾਂ ਆਖਿਆ ਕਿ ਉਸ ਸਮੇਂ ਉਹ ਇੱਕਲੇ ਪੈ ਗਏ ਸਨ। ਬ੍ਰਾਊਨ ਨੇ ਆਪਣੀ ਕਿਤਾਬ ਵਿੱਚ ਆਪਣੇ ਜਾਨਸ਼ੀਨ ਤੇ ਹੁਣ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਉੱਤੇ ਵੀ ਤਿੱਖੇ ਹਮਲੇ ਕੀਤੇ ਹਨ। ਉਨ੍ਹਾਂ ਲਿਖਿਆ ਹੈ ਕਿ ਫੋਰਡ ਦੇ ਦੁਆਲੇ ਹਰਵੇਲੇ ਰਹਿਣ ਵਾਲਿਆਂ ਨੂੰ ਇਹ ਸਮਝ ਕਿਉਂ ਨਹੀਂ ਆਉਂਦੀ ਕਿ ਬਹੁਤੇ ਲੋਕਾਂ ਨੇ ਉਨ੍ਹਾਂ ਨੂੰ ਜਾਂ ਪੀਸੀ ਪਾਰਟੀ ਨੂੰ ਵੋਟ ਨਹੀਂ ਕੀਤਾ ਹੈ ਸਗੋਂ ਲੋਕਾਂ ਨੇ ਵਿੰਨ ਖਿਲਾਫ ਵੋਟ ਕੀਤਾ ਹੈ। ਪਾਰਟੀ ਕਿਸੇ ਵੀ ਉਮੀਦਵਾਰ ਨੂੰ ਖੜ੍ਹਾ ਕਰਦੀ ਤਾਂ ਉਸ ਨੇ ਜਿੱਤ ਹੀ ਜਾਣਾ ਸੀ। ਆਪਣੀ ਕਿਤਾਬ ਵਿੱਚ ਬ੍ਰਾਊਨ ਨੇ ਫੈਡੇਲੀ, ਲੀਜਾ ਮੈਕਲਿਓਡ ਤੇ ਗ੍ਰੈਨਿਕ ਐਲਨ ਦੇ ਭੇਤ ਖੋਲ੍ਹਣ ਦੀ ਵੀ ਕੋਸਿ਼ਸ਼ ਕੀਤੀ ਹੈ।