ਜੰਮੂ, 15 ਨਵੰਬਰ (ਪੋਸਟ ਬਿਊਰੋ)- ਜੰਮੂ-ਸ੍ਰੀਨਗਰ ਰਾਸ਼ਟਰੀ ਹਾਈਵੇ ਉੱਤੇ ਬੈਟਰੀ ਚਸ਼ਮਾ ਵਿੱਚ ਪੰਜ ਨਵੰਬਰ ਨੂੰ ਜ਼ਮੀਨ ਖਿਸਕਣ ਨਾਲ ਲਾਪਤਾ ਹੋਏ ਟਰੱਕ ਚਾਲਕ ਸਮੇਤ ਤਿੰਨ ਜਣਿਆਂ ਦੀਆਂ ਲਾਸ਼ਾਂ ਨੂੰ ਕੱਲ੍ਹ ਬਰਾਮਦ ਕੀਤਾ ਗਿਆ ਹੈ। ਬਰਾਮਦ ਹੋਈਆਂ ਲਾਸ਼ਾਂ ਦੀ ਪਛਾਣ ਚਾਲਕ ਕਰਜ ਸਿੰਘ (26) ਪੁੱਤਰ ਮਨਜੀਤ ਸਿੰਘ ਵਾਸੀ ਨਵਾ ਪਿੰਡ ਮਿਲਖੀਵਾਲ ਗੁਰਦਾਸਪੁਰ, ਪੰਜਾਬ, ਜੋਗਿੰਦਰ ਲਾਲ (56) ਪੁੱਤਰ ਗੁਰਚਰਨ ਲਾਲ ਅਤੇ ਕਸ਼ਮੀਰੀ ਲਾਲ (21) ਪੁੱਤਰ ਜੋਗਿੰਦਰ ਲਾਲ ਵਾਸੀ ਮੱਲੀਆਂ ਖੁਰਦ, ਗੁਰਦਾਸਪੁਰ ਦੇ ਰੂਪ ਵਿੱਚ ਕੀਤੀ ਗਈ ਹੈ।
ਵਰਨਣ ਯੋਗ ਹੈ ਕਿ ਪੰਜ ਨਵੰਬਰ ਨੂੰ ਬੈਟਰੀ ਚਸ਼ਮਾ ਵਿੱਚ ਜ਼ਮੀਨ ਖਿਸਕਣ ਨਾਲ ਸੇਬ ਲੈ ਕੇ ਜਾ ਰਿਹਾ ਪੰਜਾਬ ਦਾ ਇੱਕ ਟਰੱਕ ਲਾਪਤਾ ਹੋ ਗਿਆ ਸੀ। ਜ਼ਮੀਨ ਖਿਸਕਣ ਉਤੇ ਮਲਬੇ ਹੇਠਾਂ ਦੱਬੇ ਇਸ ਟਰੱਕ ਦੇ ਲਾਪਤਾ ਹੋਣ ਦਾ ਪਤਾ ਉਦੋਂ ਲੱਗਾ ਜਦੋਂ ਟਰੱਕ ਦਾ ਮਾਲਕ ਤੇ ਉਸ ਵਿੱਚ ਸਵਾਰ ਤਿੰਨ ਜਣਿਆਂ ਦੇ ਘਰਦਿਆਂ ਨੇ ਟਰੱਕ ਅਤੇ ਆਪਣੇ ਪਰਵਾਰਕ ਮੈਂਬਰਾਂ ਦੇ ਲਾਪਤਾ ਹੋਣ ਦੀ ਗੱਲ ਦੱਸੀ। ਇਸ ਦੇ ਬਾਅਦ ਪੁਲਸ ਨੇ ਐੱਨ ਡੀ ਆਰ ਐੱਫ, ਐੱਸ ਡੀ ਆਰ ਐੱਫ, ਆਰਮੀ ਅਤੇ ਸਿਵਲ ਕਿਊ ਆਰ ਟੀ ਦੀਆਂ ਟੀਮਾਂ ਨੂੰ ਮੌਕੇ 'ਤੇ ਸੱਦਿਆ ਅਤੇ ਬਚਾਅ ਮੁੁਹਿੰਮ ਸ਼ੁਰੂ ਕਰ ਦਿੱਤੀ। ਫਿਰ ਮੰਗਲਵਾਰ ਨੂੰ ਟਰੱਕ ਦੀ ਚੈਸੀ ਬਰਾਮਦ ਕਰ ਲਈ ਗਈ। ਇਸ ਦੇ ਬਾਅਦ ਕੱਲ੍ਹ ਬਚਾਅ ਮੁੁਹਿੰਮ ਦੇ ਤਹਿਤ ਟਰੱਕ ਵਿੱਚ ਸਵਾਰ ਸਾਰੇ ਲੋਕਾਂ ਦੀਆਂ ਲਾਸ਼ਾਂ ਨੂੰ ਕਾਫੀ ਜੱਦੋ ਜਹਿਦ ਦੇ ਬਾਅਦ ਬਰਾਮਦ ਕੀਤਾ ਗਿਆ।