ਨਵੀਂ ਦਿੱਲੀ, 15 ਨਵੰਬਰ (ਪੋਸਟ ਬਿਊਰੋ)- ਦਿੱਲੀ `ਚ ਬੁੱਧਵਾਰ ਰਾਤ ਫੈਸ਼ਨ ਡਿਜ਼ਾਈਨਰ ਮਾਲਾ ਲਖਾਨੀ ਤੇ ਉਨ੍ਹਾਂ ਦੇ ਘਰੇਲੂ ਸਹਾਇਕ ਬਹਾਦੁਰ ਦੀ ਹੱਤਿਆ ਕਰ ਦਿੱਤੀ ਗਈ ਹੈ। ਉਸ ਆਲੀਸ਼ਾਨ ਘਰ ਵਿਚ ਉਨ੍ਹਾਂ ਦੇ ਟੇਲਰ (ਸਿਲਾਈ ਕਰਨ ਵਾਲਾ) ਰਾਹੁਲ ਉਰਫ਼ ਅਨਵਰ ਨੇ ਦੋ ਹੋਰ ਸਾਥੀਆਂ ਨਾਲ ਵਾਰਦਾਤ ਕੀਤੀ ਹੈ। ਪਹਿਲਾਂ ਮਾਲਾ ਲਖਾਨੀ ਦੀ ਹੱਤਿਆ ਕੀਤੀ ਗਈ। ਉਥੇ ਘਰੇਲੂ ਸਹਾਇਕ ਬਹਾਦੁਰ ਦੇ ਆ ਜਾਣ ਉਤੇ ਉਸ ਦੀ ਵੀ ਹੱਤਿਆ ਕਰ ਦਿੱਤੀ ਗਈ। ਵਾਰਦਾਤ ਤੋਂ ਬਾਅਦ ਗਹਿਣੇ ਲੁੱਟ ਕੇ ਅਤੇ ਘਰ ਦੀ ਸਫ਼ਾਈ ਕਰਨ ਤੋਂ ਬਾਅਦ ਤਿੰਨੋਂ ਪਹਿਲਾਂ ਫ਼ਰਾਰ ਹੋ ਗਏ। ਫਿਰ ਕੁਝ ਘੰਟੇ ਬਾਅਦ ਥਾਣੇ ਵਿਚ ਆਤਮ ਸਮਰਪਣ ਕਰ ਦਿੱਤਾ।
ਦੋਸ਼ੀ ਰਾਹੁਲ ਮਾਲਾ ਦੇ ਕੋਲ ਕੱਪੜਿਆਂ ਦੀ ਸਿਲਾਈ ਦਾ ਕੰਮ ਕਰਦਾ ਸੀ। ਉਸ ਨੇ ਪੁਲਿਸ ਨੂੰ ਦੱਸਿਆ ਕਿ ਮਾਲਾ ਡੇਢ ਮਹੀਨੇ ਤੋਂ ਉਸ ਨੂੰ ਪੈਸੇ ਦੇਣ ਵਿਚ ਆਨਾਕਾਨੀ ਕਰ ਰਹੀ ਸੀ ਜਿਸ ਤੋਂ ਉਹ ਪਰੇਸ਼ਾਨ ਸੀ। ਹੱਤਿਆ ਤੋਂ ਪਹਿਲਾਂ ਵੀ ਪੈਸਿਆਂ ਬਾਰੇ ਰਾਹੁਲ ਦਾ ਮਾਲਾ ਨਾਲ ਝਗੜਾ ਹੋਇਆ ਸੀ। ਪੁਲਿਸ ਨੇ ਤਿੰਨਾਂ ਖ਼ਿਲਾਫ਼ ਹੱਤਿਆ, ਲੁੱਟ-ਖੋਹ, ਅਪਰਾਧਕ ਸਾਜ਼ਿਸ਼ ਰਚਣ ਅਤੇ ਆਮਰਜ਼ ਐਕਟ ਦਾ ਕੇਸ ਦਰਜ ਕੀਤਾ ਹੈ। ਜਾਇੰਟ ਪੁਲਿਸ ਕਮਿਸ਼ਨਰ (ਨਵੀਂ ਦਿੱਲੀ) ਰੇਂਜ ਅਜੈ ਚੌਧਰੀ ਮੁਤਾਬਿਕ ਗ੍ਰਿਫ਼ਤਾਰ ਮੁਲਜ਼ਮਾਂ ਦੇ ਨਾਂ ਰਾਹੁਲ ਉਰਫ਼ ਅਨਵਰ, ਰਹਿਮਤ ਤੇ ਵਸੀਮ ਹਨ। ਤਿੰਨੋਂ ਮੂਲ ਰੂਪ ਨਾਲ ਝਾਰਖੰਡ ਦੇ ਵਾਸੀ ਹਨ, ਪਰ ਚਿਰਾਂ ਤੋਂ ਵਸੰਤ ਕੁੰਜ ਇਲਾਕੇ ਦੀ ਰੰਗਪੁਰੀ ਪਹਾੜੀ `ਤੇ ਰਹਿ ਰਹੇ ਹਨ। ਰਹਿਮਤ, ਰਾਹੁਲ ਉਰਫ਼ ਅਨਵਰ ਦੀ ਭੂਆ ਦਾ ਬੇਟਾ ਹੈ। ਰਾਹੁਲ ਸਾਢੇ ਤਿੰਨ ਸਾਲ ਤੋਂ ਮਾਲਾ ਲਖਾਨੀ ਦੇ ਕੋਲ ਕੱਪੜਿਆਂ ਦੀ ਸਿਲਾਈ ਦਾ ਕੰਮ ਕਰ ਰਿਹਾ ਸੀ। ਰਹਿਮਤ ਅਤੇ ਵਸੀਮ ਟੇਲਰ ਹਨ। ਮਾਲਾ ਨੇ ਕੋਠੀ ਵਿਚ ਹੀ ਇਕ ਵੱਡੇ ਕਮਰੇ ਨੂੰ ਵਰਕਸ਼ਾਪ ਵਿਚ ਤਬਦੀਲ ਕਰ ਦਿੱਤਾ ਸੀ। ਵਸੰਤ ਕੁੰਜ ਐਨਕਲੇਵ ਦੇ ਏ-82 ਵਿਚ ਮਾਲਾ ਲਖਾਨੀ (53) ਇਕੱਲੀ ਰਹਿੰਦੀ ਸੀ। ਉਹ ਅਣਵਿਆਹੀ ਸੀ। ਉਸ ਨਾਲ 50 ਸਾਲ ਦਾ ਬਹਾਦੁਰ ਨਾਂ ਦਾ ਘਰੇਲੂ ਸਹਾਇਕ ਵੀ ਰਹਿੰਦਾ ਸੀ ਜਿਹੜਾ ਮੂਲ ਰੂਪ ਨਾਲ ਨੇਪਾਲ ਦਾ ਨਿਵਾਸੀ ਸੀ। ਬੁੱਧਵਾਰ ਰਾਤ ਕਰੀਬ 11 ਵਜੇ ਰਾਹੁਲ ਨੇ ਕੱਪੜੇ ਵੇਖਣ ਦੇ ਬਹਾਨੇ ਮਾਲਾ ਨੂੰ ਫੋਨ ਕਰਕੇ ਘਰ ਵਿਚ ਬਣੀ ਵਰਕਸ਼ਾਪ ਵਿਚ ਸੱਦਿਆ। ਉਥੇ ਪਹਿਲਾਂ ਤੋਂ ਉਸ ਨੇ ਰਹਿਮਤ ਤੇ ਵਸੀਮ ਨੂੰ ਸੱਦਿਆ ਹੋਇਆ ਸੀ। ਮਾਲਾ ਦੇ ਆਉਣ `ਤੇ ਰਾਹੁਲ ਨੇ ਪੈਸੇ ਮੰਗਣੇ ਸ਼ੁਰੂ ਕਰ ਦਿੱਤੇ। ਬਹਿਸ ਹੋਣ `ਤੇ ਰਾਹੁਲ ਨੇ ਗੁੱਸੇ ਵਿਚ ਆ ਕੇ ਪਹਿਲਾਂ ਇਕੱਲੇ ਹੀ ਉਨ੍ਹਾਂ ਦੇ ਮੂੰਹ `ਤੇ ਹੱਥ ਰੱਖ ਕੇ ਜ਼ੋਰ ਨਾਲ ਕੁਝ ਦੇਰ ਤਕ ਦਬਾ ਰੱਖਿਆ। ਫਿਰ ਰਹਿਮਤ ਤੇ ਵਸੀਮ ਨੇ ਚਾਕੂਆਂ ਨਾਲ ਵਾਰ ਕਰਕੇ ਮਾਲਾ ਦੀ ਹੱਤਿਆ ਕਰ ਦਿੱਤੀ। ਉਸੇ ਦੌਰਾਨ ਬਹਾਦੁਰ ਉਥੇ ਆ ਗਿਆ। ਭੇਦ ਖੁੱਲ੍ਹਣ ਦੇ ਡਰ ਨਾਲ ਤਿੰਨਾਂ ਨੇ ਉਸ ਦੀ ਵੀ ਹੱਤਿਆ ਕਰ ਦਿੱਤੀ। ਇਸ ਤੋਂ ਬਾਅਦ ਤਿੰਨਾਂ ਨੇ ਘਰ ਵਿਚ ਲੁੱਟਮਾਰ ਕੀਤੀ।