ਫਿਲਮ ਨਿਰਮਾਤਾ ਰਾਮ ਮਾਧਵਨੀ ਵੱਲੋਂ ‘ਆਰੀਆ’ ਲੜੀ ਦੇ ਸੀਜ਼ਨ 2 ਦਾ ਐਲਾਨ ਕੀਤਾ ਗਿਆ ਹੈ। ਇਸ ਲੜੀ ਵਿੱਚ ਬਾਲੀਵੁੱਡ ਅਦਾਕਾਰਾ ਸੁਸ਼ਮਿਤਾ ਸੇਨ ਨਵੀਆਂ ਮੁਸ਼ਕਲਾਂ ਦਾ ਸਾਹਮਣਾ ਕਰਦੀ ਦਿੱਸੇਗੀ। ਦਿ ਡਿਜ਼ਨੀ ਹੌਟਸਟਾਰ ਦੀ ਇਹ ਲੜੀ ਮਸ਼ਹੂਰ ਡੱਚ ਅਪਰਾਧਕ ਡਰਾਮਾ ‘ਪੇਨੋਜ਼ਾ’ ਦਾ ਰੀਮੇਕ ਹੈ, ਜੋ ਆਰੀਆ ਸਰੀਨ ਦੁਆਲੇ ਘੁੰਮਦਾ ਹੈ।
ਆਰੀਆ ਸਰੀਨ ਦੀ ਭੂਮਿਕਾ ਸੁਸ਼ਮਿਤਾ ਸੇਨ ਨੇ ਨਿਭਾਈ ਹੈ। ਉਹ ਇੱਕ ਖੁਸ਼ਹਾਲ ਵਿਆਹੁਤਾ ਹੈ, ਜਿਸ ਦੇ ਪਤੀ ਨੂੰ ਗੋਲੀ ਮਾਰ ਦਿੱਤੀ ਜਾਂਦੀ ਹੈ ਤੇ ਇਸ ਕਾਰਨ ਉਸ ਦੀ ਦੁਨੀਆ ਹਿੱਲ ਜਾਂਦੀ ਹੈ। ਉਸ ਨੂੰ ਪਤਾ ਲੱਗਦਾ ਹੈ ਕਿ ਉਸ ਦਾ ਪਤੀ ਗੈਰ ਕਾਨੂੰਨੀ ਨਸ਼ਾ ਤਸਕਰੀ ਦੇ ਧੰਦੇ ਵਿੱਚ ਸ਼ਾਮਲ ਸੀ ਅਤੇ ਨਸ਼ਾ ਤਸਕਰਾਂ ਤੋਂ ਉਸ ਦੇ ਪਰਵਾਰ ਨੂੰ ਵੀ ਖਤਰਾ ਹੈ। ਇਹ ਸ਼ੋਅ ਮਾਧਵਾਨੀ ਤੇ ਸੰਦੀਪ ਮੋਦੀ ਵੱਲੋਂ ਮਿਲ ਕੇ ਬਣਾਇਆ ਗਿਆ ਹੈ ਜਿਸ ਨਾਲ ਸੁਸ਼ਮਿਤਾ ਸੇਨ ਦੀ ਆਖਰੀ ਹਿੰਦੀ ਫਿਲਮ ‘ਨੋ ਪ੍ਰਾਬਲਮ’ ਮਗਰੋਂ ਇੱਕ ਦਹਾਕੇ ਬਾਅਦ ਸਕਰੀਨ 'ਤੇ ਵਾਪਸੀ ਹੋਈ ਹੈ।