ਕੀ ਤੁਸੀਂ ਜਾਣਦੇ ਹੋ ਕਿ ਟੀ ਵੀ ਲੜੀਵਾਰ ‘ਫੌਜੀ’ ਲਈ ਚੁਣੇ ਜਾਣ ਤੋਂ ਪਹਿਲਾਂ ਸ਼ਾਹਰੁਖ ਖਾਨ ਦਾ ਡਾਇਰੈਕਟਰ ਨਾਲ ਮੁੱਕੇਬਾਜ਼ੀ ਦਾ ਮੁਕਾਬਲਾ ਹੋਇਆ ਸੀ ਅਤੇ ਕਿਸ਼ੋਰ ਕੁਮਾਰ ਨੇ ਕਾਮੇਡੀ ਲੜੀਵਾਰ ‘ਯੇ ਜੋ ਹੈ ਜ਼ਿੰਦਗੀ’ ਦੇ ਟਾਈਟਲ ਗੀਤ ਲਈ 18 ਹਜ਼ਾਰ ਰੁਪਏ ਲਏ ਸਨ। ਇਸੇ ਤਰ੍ਹਾਂ ਗੋਵਿੰਦ ਨਿਹਲਾਨੀ ਪਹਿਲਾਂ ‘ਤਮਸ’ ਨੂੰ ਵੱਡੇ ਪਰਦੇ 'ਤੇ ਪੇਸ਼ ਕਰਨਾ ਚਾਹੁੰਦੇ ਸਨ ਅਤੇ ਇਸ ਬਾਰੇ ਉਨ੍ਹਾਂ ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ ਤੋਂ ਸਰਕਾਰੀ ਮਦਦ ਮਿਲਣ ਬਾਰੇ ਪੁੱਛਿਆ ਸੀ।
ਅਜਿਹੇ ਕੁਝ ਦਿਲਚਸਪ ਕਿੱਸਿਆਂ ਦਾ ਜ਼ਿਕਰ ਅਨੰਤ ਮਹਾਦੇਵਨ ਦੀ ਕਿਤਾਬ ‘ਵੰਸ ਅਪੋਨ ਏ ਪ੍ਰਾਈਮ ਟਾਈਮ : ਮਾਇ ਜਰਨੀ ਆਨ ਇੰਡੀਅਨ ਟੈਲੀਵਿਜ਼ਨ’ ਵਿੱਚ ਹੈ। ਉਨ੍ਹਾਂ ਥੀਏਟਰ ਤੋਂ ਟੈਲੀਵਿਜ਼ਨ ਅਤੇ ਫਿਰ ਸਿਨੇਮਾ ਤੱਕ ਆਪਣੇ ਸਫਰ ਦਾ ਇਸ ਵਿੱਚ ਬਾਖੂਬੀ ਵਰਣਨ ਕੀਤਾ ਹੈ। ਕਿੰਡਲ 'ਤੇ ਇਹ ਕਿਤਾਬ ਐਂਬੇਸੀ ਬੁੱਕਸ ਵੱਲੋਂ ਪ੍ਰਕਾਸ਼ਿਤ ਕੀਤੀ ਗਈ ਹੈ ਅਤੇ ਕਿਤਾਬੀ ਰੂਪ ਵਿੱਚ ਇਹ 15 ਜੁਲਾਈ ਨੂੰ ਰਿਲੀਜ਼ ਹੋਵੇਗੀ।