ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਆਖਰੀ ਫਿਲਮ ‘ਦਿਲ ਬੇਚਾਰਾ’ ਨਾਲ ਅਭਿਨੇਤਰੀ ਸੰਜਨਾ ਸਾਂਘੀ ਅਭਿਨੈ ਕਰੀਅਰ ਸ਼ੁਰੂ ਕਰ ਰਹੀ ਹੈ। ਸੁਸ਼ਾਂਤ ਦੇ ਬਾਰੇ ਉਸ ਨੇ ਆਪਣੇ ਦਿਲ ਦੀ ਗੱਲ ਕਹੀ ਹੈ। ਸੰਜਨਾ ਨੇ ਦੱਸਿਆ ਕਿ ਸੁਸ਼ਾਂਤ ਅਤੇ ਉਨ੍ਹਾਂ ਵਿੱਚ ਕਈ ਗੱਲਾਂ ਇੱਕੋ ਜਿਹੀਆਂ ਸਨ। ਪਹਿਲੇ ਹੀ ਦਿਨ ਸੈਟ 'ਤੇ ਦੋਵਾਂ ਦੀ ਚੰਗੀ ਦੋਸਤੀ ਹੋ ਗਈ ਸੀ। ਸੁਸ਼ਾਂਤ ਦੀ ਤਰ੍ਹਾਂ ਸੰਜਨਾ ਵੀ ਆਪਣੇ ਕਾਲਜ ਦੀ ਟਾਪਰ ਰਹਿ ਚੁੱਕੀ ਹੈ। ਸੁਸ਼ਾਂਤ ਨੇ ਭੌਤਿਕ ਵਿਗਿਆਨ ਵਿੱਚ ਟਾਪ ਕੀਤਾ ਸੀ, ਤਾਂ ਸੰਜਨਾ ਪਾਲੀਟੀਕਲ ਸਾਇੰਸ ਦੀ ਟਾਪਰ ਰਹੀ ਹੈ। ਸੈਟ 'ਤੇ ਦੋਵੇਂ ਕਿਤਾਬਾਂ ਨਾਲ ਜੁੜੀਆਂ ਕਈ ਗੱਲਾਂ ਸਾਂਝੀਆਂ ਕਰਦੇ ਸਨ।
ਸੰਜਨਾ ਦੱਸਦੀ ਹੈ ਕਿ ਸੁਸ਼ਾਂਤ ਹਮੇਸ਼ਾ ਉਸ ਨੂੰ ਅੱਗੇ ਵਧਣ ਲਈ ਪ੍ਰੇਰਿਤ ਕਰਦੇ ਤੇ ਕਹਿੰਦੇ ਕਿ ਤੂੰ ਜ਼ਿੰਦਗੀ ਵਿੱਚ ਬਹੁਤ ਅੱਗੇ ਜਾਏਂਗੀ। ਅਸੀਂ ਦੋਵੇਂ ਬਹੁਤ ਪੜ੍ਹਾਕੂ ਸੀ। ਸਕ੍ਰਿਪਟ ਸਾਨੂੰ ਅਜਿਹੀ ਦਿਸਦੀ ਸੀ, ਜਿਵੇਂ ਉਹ ਕੋਈ ਫਟਿਆ-ਪੁਰਾਣਾ ਨਾਵਲ ਹੋਵੇ। ਮੈਂ ਨਰਵਸ ਰਹਿੰਦੀ ਸੀ, ਡਾਇਰੈਕਟਰ ਮੁਕੇਸ਼ ਛਾਬੜਾ ਸਹਿਜ ਕਰ ਦਿੰਦੇ ਸਨ। ਸੁਸ਼ਾਂਤ ਖਾਣੇ ਦੇ ਬੜੇ ਸ਼ੌਕੀਨ ਸਨ। ਲੰਚ ਦੌਰਾਨ ਪੂਰਾ ਟੇਬਲ ਖਾਣੇ ਨਾਲ ਭਰ ਜਾਂਦਾ ਸੀ, ਪਰ ਅਸੀਂ ਤਿੰਨੇ ਖਾਣਾ ਫਰਸ਼ 'ਤੇ ਬੈਠ ਕੇ ਖਾਂਦੇ ਸੀ। ਸੁਸ਼ਾਂਤ ਅਕਸਰ ਮੇਰਾ ਮਜ਼ਾਕ ਉਡਾਉਂਦੇ ਸਨ ਕਿ ਮੈਂ ਕਿੰਨਾ ਬਹੁਤ ਖਾਂਦੀ ਹਾਂ। ਇੱਕ ਵਾਰ ਖਾਣੇ ਦੌਰਾਨ ਮੇਰੇ ਪਾਪਾ ਦਾ ਮੈਸੇਜ ਆਇਆ ਕਿ ਮੈਂ ਪਾਲੀਟੀਕਲ ਸਾਇੰਸ ਵਿੱਚ ਗੋਲਡ ਮੈਡਲ ਹਾਸਲ ਕੀਤਾ ਹੈ। ਇਹ ਖਬਰ ਸੁਣ ਕੇ ਸੁਸ਼ਾਂਤ ਤੇ ਡਾਇਰੈਕਟਰ ਮੁਕੇਸ਼ ਛਾਬੜਾ ਕਾਫੀ ਖੁਸ਼ ਹੋਏ ਤੇ ਢੇਰ ਸਾਰੀ ਮੁਬਾਰਕਵਾਦ ਦਿੱਤੀ। ਸਿਖਿਆ ਅਤੇ ਸਿਨੇਮਾ ਲਈ ਸੁਸ਼ਾਂਤ ਦੀਆਂ ਕਹੀਆਂ ਗੱਲਾਂ ਅਨਮੋਲ ਹਨ, ਜਿਨ੍ਹਾਂ ਨੂੰ ਮੈਂ ਆਪਣੇ ਕੋਲ ਸੰਭਾਲ ਕੇ ਰੱਖਿਆ ਹੈ। ‘ਦਿਲ ਬੇਚਾਰਾ’ 24 ਜੁਲਾਈ ਨੂੰ ਡਿਜ਼ਨੀ ਪਲੱਸ ਹੌਟਸਟਾਰ ਪਲੇਟਫਾਰਮ 'ਤੇ ਰਿਲੀਜ਼ ਹੋਵੇਗੀ।