ਪਟਿਆਲਾ, 15 ਨਵੰਬਰ (ਪੋਸਟ ਬਿਊਰੋ)- ਨਾਭਾ ਵਿੱਚ ਦੋ ਲੁਟੇਰਿਆਂ ਨੇ ਕੱਲ੍ਹ ਸਟੇਟ ਬੈਂਕ ਆਫ ਇੰਡੀਆ ਦੇ ਸੁਰੱਖਿਆ ਗਾਰਡ ਨੂੰ ਗੋਲੀ ਮਾਰ ਕੇ ਮਾਰ ਦਿੱਤਾ ਤੇ 50 ਲੱਖ ਰੁਪਏ ਲੁੱਟ ਲਏ। ਇਹ ਵਾਰਦਾਤ ਨਾਭਾ ਦੀ ਅਨਾਜ ਮੰਡੀ ਵਿੱਚ ਹੋਈ ਜਦ ਐੱਸ ਬੀ ਆਈ ਦਾ ਕਲਰਕ ਅੰਤਰਿਕਸ਼ ਵੈਦ ਤੇ ਸੁਰੱਖਿਆ ਗਾਰਡ ਪ੍ਰੇਮ ਚੰਦ 50 ਲੱਖ ਰੁਪਏ ਦੀ ਨਕਦੀ ਬੈਂਕ ਦੀ ਪਟਿਆਲਾ ਗੇਟ ਵਾਸੀ ਕਰੰਸੀ ਚੈਸਟ ਬ੍ਰਾਂਚ ਤੋਂ ਨਿੱਜੀ ਕਾਰ 'ਚ ਲੈ ਕੇ ਆਪਣੀ ਬ੍ਰਾਂਚ ਆ ਰਹੇ ਸਨ। ਪਿੱਛਾ ਕਰਦੇ ਆ ਰਹੇ ਦੋ ਜਣਿਆਂ ਨੇ ਇਨ੍ਹਾਂ ਨੂੰ ਨਕਦੀ ਵਾਲਾ ਬੈਗ ਉਤਾਰਨ ਸਮੇਂ ਹੀ ਗੋਲੀ ਮਾਰ ਦਿੱਤੀ।
ਪਟਿਆਲਾ ਜ਼ੋਨ ਦੇ ਆਈ ਜੀ, ਏ ਐੱਸ ਰਾਏ ਨੇ ਦੱਸਿਆ ਕਿ ਪੁਲਸ ਨੇ ਫੁਰਤੀ ਵਿਖਾ ਕੇ ਮੁਲਜ਼ਮਾਂ ਨੂੰ ਹਥਿਆਰਾਂ ਅਤੇ ਨਕਦ ਰਾਸ਼ੀ ਸਮੇਤ ਚਾਰ ਘੰਟਿਆਂ ਵਿੱਚ ਕਾਬੂ ਕਰ ਲਿਆ। ਆਈ ਜੀ ਦੇ ਮੁਤਾਬਕ ਐੱਸ ਐੱਸ ਪੀ ਮਨਦੀਪ ਸਿੰਘ ਸਿੱਧੂ ਆਪਣੀ ਪੂਰੀ ਟੀਮ ਸਮੇਤ ਨਾਭਾ ਵਿਖੇ ਸਨ ਕਿਉਂਕਿ ਪਿਛਲੇ ਦੋ ਮਹੀਨਿਆਂ ਦੌਰਾਨ ਨਾਭਾ ਵਿਖੇ ਹੋਏ ਚਾਰ ਕਤਲਾਂ ਅਤੇ ਦੋ ਡਕੈਤੀਆਂ ਦੀਆਂ ਵਾਰਦਾਤਾਂ ਨੂੰ ਇਨ੍ਹਾਂ ਨੇ ਹੱਲ ਕੀਤਾ ਸੀ ਤੇ ਇਸੇ ਲਈ ਨਾਭਾ ਦੀਆਂ ਸਮਾਜ ਸੇਵੀ ਜਥੇਬੰਦੀਆਂ ਨੇ ਸਿੱਧੂ ਦਾ ਸਨਮਾਨ ਕਰਨਾ ਸੀ। ਸਿੱਧੂ ਤੁਰੰਤ ਮੌਕੇ ਉਤੇ ਪੁੱਜੇ ਅਤੇ ਟੀਮਾਂ ਦਾ ਗਠਨ ਕੀਤਾ। ਦੋਵਾਂ ਮੁਲਜ਼ਮਾਂ ਨੂੰ ਸੰਗਰੂਰ ਤੋਂ ਫੜ ਲਿਆ ਗਿਆ। ਇਨ੍ਹਾਂ ਦੋਵਾਂ ਦੀ ਪਛਾਣ 35 ਸਾਲਾ ਜਗਦੇਵ ਸਿੰਘ ਤਾਰੀ ਪੁੱਤਰ ਕਰਨੈਲ 37 ਸਾਲਾ ਅਮਨਜੀਤ ਸਿੰਘ ਗੁਰੀ ਪੁੱਤਰ ਗੁਰਜੰਟ ਸਿੰਘ ਵਾਸੀ ਸੰਗਰੂਰ ਵੱਜੋਂ ਹੋਈ ਹੈ। ਲੁੱਟ ਦੇ 50 ਲੱਖ ਰੁਪਏ, 32 ਬੋਰ ਦਾ ਰਿਵਾਲਵਰ, ਸੁਰੱਖਿਆ ਗਾਰਡ ਤੋਂ ਖੋਹੀ 12 ਬੋਰ ਦੀ ਬੰਦੂਕ, ਵਾਰਦਾਤ ਵਾਲਾ ਬੂਲੇਟ ਮੋਟਰ ਸਾਈਕਲ, ਕੱਪੜੇ ਬਰਾਮਦ ਹੋਏ ਹਨ।