ਨਾਈਟਸਨ, ਕੈਲੇਫੋਰਨੀਆ, 10 ਜੁਲਾਈ (ਪੋਸਟ ਬਿਊਰੋ) : ਉੱਤਰੀ ਕੈਲੇਫੋਰਨੀਆ ਵਿੱਚ ਕਈ ਘੰਟੇ ਚੱਲੇ ਮੁਕਾਬਲੇ ਵਿੱਚ ਤਿੰਨ ਸ਼ੈਰਿਫ ਡਿਪਟੀਜ਼ ਨੂੰ ਗੋਲੀ ਲੱਗੀ ਤੇ ਮਸ਼ਕੂਕ ਮਾਰਿਆ ਗਿਆ। ਇਹ ਜਾਣਕਾਰੀ ਸ਼ੈਰਿਫ ਦੇ ਆਫਿਸ ਵੱਲੋਂ ਦਿੱਤੀ ਗਈ।
ਨਾਈਟਸਨ ਦੇ ਇੱਕ ਘਰ ਵਿੱਚ ਕੱਲ੍ਹ ਇਹ ਗੋਲੀਕਾਂਡ ਵਾਪਰਿਆ। ਕੌਂਟਰਾ ਕੌਸਟਾ ਦੇ ਸੈ਼ਰਿਫ ਆਫਿਸ ਵੱਲੋਂ ਜਾਰੀ ਕੀਤੀ ਗਈ ਨਿਊਜ਼ ਰਲੀਜ਼ ਵਿੱਚ ਆਖਿਆ ਗਿਆ ਕਿ ਇਹ ਇਲਾਕਾ ਸੈਨ ਫਰਾਂਸਿਸਕੋ ਦੇ ਉੱਤਰਪੂਰਬ ਵੱਲ 50 ਮੀਲ ਦੀ ਦੂਰੀ ੳੱੁਤੇ ਸਥਿਤ ਹੈ। ਸਵੇਰੇ 10:00 ਵਜੇ ਘਰੇਲੂ ਹਿੰਸਾ ਕਾਰਨ ਪੁਲਿਸ ਨੂੰ ਸੱਦਿਆ ਗਿਆ। ਇੱਕ ਮਹਿਲਾ ਨੇ ਦੱਸਿਆ ਕਿ ਉਸ ਨੂੰ ਰਾਤ ਭਰ ਬੰਦੀ ਬਣਾ ਕੇ ਘਰ ਵਿੱਚ ਰੱਖਿਆ ਗਿਆ ਤੇ ਸਵੇਰੇ ਉਹ ਕਿਸੇ ਤਰ੍ਹਾਂ ਬਚ ਨਿਕਲਣ ਵਿੱਚ ਕਾਮਯਾਬ ਹੋ ਗਈ ਜਦਕਿ ਉਸ ਨੇ ਇੱਕ ਵਿਅਕਤੀ ਨੂੰ ਅੰਦਰ ਹੀ ਬੰਦ ਕਰ ਦਿੱਤਾ।
ਰਲੀਜ਼ ਵਿੱਚ ਆਖਿਆ ਗਿਆ ਕਿ ਮਸ਼ਕੂਕ ਨੇ ਦਿਨ ਭਰ ਕਿਸੇ ਪੁਲਿਸ ਵਾਲੇ ਨੂੰ ਘਰ ਦੇ ਅੰਦਰ ਨਹੀਂ ਆਉਣ ਦਿੱਤਾ ਤੇ ਉਨ੍ਹਾਂ ਉੱਤੇ ਗੋਲੀਆਂ ਚਲਾਉਂਦਾ ਰਿਹਾ। ਕਾਊਂਟੀ ਦੀ ਸਵੈਟ ਟੀਮ ਤੇ ਇੱਕ ਹੋਰ ਟੀਮ ਨੇ ਉਸ ਨੂੰ ਸਮਝਾਉਣ ਦੀ ਬਹੁਤ ਕੋਸਿ਼ਸ਼ ਕੀਤੀ ਪਰ ਉਹ ਨਹੀਂ ਸਮਝਿਆ। ਮਸ਼ਕੂਕ ਨੂੰ ਆਤਮ ਸਮਰਪਣ ਕਰਨ ਲਈ ਵੀ ਆਖਿਆ ਗਿਆ ਪਰ ਗੱਲ ਨਹੀਂ ਬਣੀ।
ਮਸ਼ਕੂਕ, ਜਿਸ ਦੀ ਅਜੇ ਪਛਾਣ ਨਹੀਂ ਹੋਈ, ਘਰ ਵਿੱਚੋਂ ਰਾਤੀਂ 9:00 ਵਜੇ ਬਾਹਰ ਆਇਆ ਤੇ ਉਸ ਨੇ ਸਵੈਟ ਟੀਮ ਦੇ ਤਿੰਨ ਮੈਂਬਰਾਂ ਨੂੰ ਗੋਲੀ ਮਾਰ ਦਿੱਤੀ ਤੇ ਡਿਪਟੀਜ਼ ਵੱਲੋਂ ਵੀ ਜਵਾਬੀ ਕਾਰਵਾਈ ਕੀਤੀ ਗਈ। ਮਸ਼ਕੂਕ ਨੂੰ ਮੌਕੇ ਉੱਤੇ ਹੀ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਦੋ ਡਿਪਟੀਜ਼ ਨੂੰ ਹਸਪਤਾਲ ਲਿਜਾਇਆ ਗਿਆ। ਉਨ੍ਹਾਂ ਦੀ ਹਾਲਤ ਬਾਰੇ ਅਜੇ ਕੁੱਝ ਪਤਾ ਨਹੀਂ ਲੱਗ ਸਕਿਆ ਹੈ।