ਵਾਸ਼ਿੰਗਟਨ, 15 ਨਵੰਬਰ (ਪੋਸਟ ਬਿਊਰੋ)- ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਕ ਅਪੀਲ ਕੋਰਟ 'ਚ ਖਾਲੀ ਹੋਏ ਜੱਜ ਦੇ ਅਹੁਦੇ ਉੱਤੇ ਨਿਯੁਕਤੀ ਲਈ ਭਾਰਤੀ ਮੂਲ ਦੀ ਨਿਓਮੀ ਰਾਓ ਨੂੰ ਨਾਮਜ਼ਦ ਕੀਤਾ ਹੈ। ਇਹ ਅਹੁਦਾ ਅਪੀਲ ਕੋਰਟ ਦੇ ਜੱਜ ਬ੍ਰੈਟ ਕੈਵਨਾਘ ਦੀ ਸੁਪਰੀਮ ਕੋਰਟ 'ਚ ਨਿਯੁਕਤੀ ਦੇ ਬਾਅਦ ਖਾਲੀ ਹੋਇਆ ਹੈ।
ਵ੍ਹਾਈਟ ਹਾਊਸ 'ਚ ਬੀਤੇ ਦਿਨੀਂ ਮਨਾਏ ਗਏ ਦੀਵਾਲੀ ਸਮਾਗਮ ਮੌਕੇ ਟਰੰਪ ਨੇ 45 ਸਾਲਾ ਰਾਓ ਨੂੰ ਵਾਸ਼ਿੰਗਟਨ ਡੀ ਸੀ ਦੇ ਸਰਕਟ ਕੋਰਟ ਦੇ ਜੱਜ ਦੇ ਤੌਰ 'ਤੇ ਨਾਮਜ਼ਦ ਕਰਨ ਦਾ ਐਲਾਨ ਕੀਤਾ। ਅਮਰੀਕਾ 'ਚ ਸੁਪਰੀਮ ਕੋਰਟ ਦੇ ਬਾਅਦ ਇਸ ਅਦਾਲਤ ਨੂੰ ਸਭ ਤੋਂ ਸ਼ਕਤੀਸ਼ਾਲੀ ਮੰਨਿਆ ਜਾਂਦਾ ਹੈ। ਰਾਓ ਦੇ ਨਾਂ ਉੱਤੇ ਸੈਨੇਟ ਦੀ ਮੋਹਰ ਲੱਗਣ 'ਤੇ ਉਹ ਇਸ ਪ੍ਰਭਾਵਸ਼ਾਲੀ ਕੋਰਟ 'ਚ ਨਿਯੁਕਤੀ ਲੈਣ ਵਾਲੀ ਦੂਜੀ ਭਾਰਤਵੰਸ਼ੀ ਹੋਵੇਗੀ। ਇਸ ਤੋਂ ਪਹਿਲਾਂ ਇਸ ਕੋਰਟ 'ਚ ਸ੍ਰੀਨਿਵਾਸਨ ਨੂੰ ਓਬਾਮਾ ਪ੍ਰਸ਼ਾਸਨ ਦੌਰਾਨ ਨਿਯੁਕਤ ਕੀਤਾ ਗਿਆ ਸੀ। ਰਾਓ ਨੂੰ ਨਾਮਜ਼ਦ ਕਰਨ ਦਾ ਐਲਾਨ ਕਰਦੇ ਹੋਏ ਟਰੰਪ ਨੇ ਕਿਹਾ ਕਿ ਉਹ ਖਾਸ ਬਣਨ ਜਾ ਰਹੇ ਹਨ। ਰਾਓ ਨੇ ਰਾਸ਼ਟਰਪਤੀ ਦਾ ਧੰਨਵਾਦ ਕੀਤਾ। ਰਾਓ ਇਸ ਸਮੇਂ ਸੂਚਨਾ ਤੇ ਰੈਗੂਲੇਟਰੀ ਮਾਮਲਿਆਂ ਦੇ ਦਫਤਰ ਦੀ ਪ੍ਰਸ਼ਾਸਕ ਹੈ। ਇਸ ਅਹੁਦੇ 'ਤੇ ਉਨ੍ਹਾਂ ਦੀ ਨਿਯੁਕਤੀ 'ਤੇ ਜੁਲਾਈ, 2017 'ਚ ਸੈਨੇਟ ਨੇ 41 ਦੇ ਮੁਕਾਬਲੇ 54 ਵੋਟਾਂ ਨਾਲ ਮੋਹਰ ਲਾਈ ਸੀ। ਉਹ ਸੁਪਰੀਮ ਕੋਰਟ ਦੇ ਜੱਜ ਕਲੇਰੈਂਸ ਥਾਮਸ ਦੀ ਕਲਰਕ ਵੀ ਰਹਿ ਚੁੱਕੀ ਹੈ।