ਬੋਸਟਨ, 15 ਨਵੰਬਰ (ਪੋਸਟ ਬਿਊਰੋ)- ਇਨਸਾਨ ਦੀ ਉਮਰ ਪੀੜ੍ਹੀ-ਦਰ-ਪੀੜ੍ਹੀ ਵਧ ਰਹੀ ਹੈ। ਹਰ ਪੀੜ੍ਹੀ ਦੀ ਉਮਰ ਪਿਛਲੀ ਪੀੜ੍ਹੀ ਨਾਲੋਂ ਕਰੀਬ ਤਿੰਨ ਸਾਲ ਵੱਧ ਹੈ। ਅੱਗੇ ਵੀ ਅਜਿਹੀ ਸੂਚੀ ਬਣੇ ਰਹਿਣ ਦੀ ਆਸ ਹੈ।
ਅਮਰੀਕਾ ਦੀ ਸਟੈਨਫੋਰਡ ਯੂਨੀਵਰਸਿਟੀ ਵਿੱਚ ਹੋਏ ਅਧਿਐਨ ਵਿੱਚ ਇਹ ਗੱਲ ਸਾਹਮਣੇ ਆਈ ਹੈ। ਖੋਜਕਾਰਾਂ ਨੇ ਪਿਛਲੇ 50 ਸਾਲ ਦੇ ਅੰਕੜਿਆਂ ਦਾ ਅਧਿਐਨ ਕੀਤਾ ਅਤੇ ਇਸ ਵਿੱਚ ਪਾਇਆ ਕਿ ਜੋ ਲੋਕ 65 ਸਾਲ ਦੀ ਉਮਰ ਪਾਰ ਕਰ ਲੈਂਦੇ ਹਨ, ਉਨ੍ਹਾਂ ਦੀ ਉਮਰ ਉਨ੍ਹਾਂ ਦੇ ਮਾਤਾ-ਪਿਤਾ ਦੇ ਨਾਲੋਂ ਵੱਧ ਰਹਿੰਦੀ ਹੈ। ਸਟੈਨਫੋਰਡ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਸ੍ਰੀਪਦ ਤੁਲਜਾਪੁਰਕਰ ਨੇ ਕਿਹਾ ਕਿ ਅੰਕੜੇ ਦੱਸਦੇ ਹਨ ਕਿ ਉਮਰ ਵਧ ਰਹੀ ਹੈ ਅਤੇ ਇਸ ਸੂਚੀ ਵਿੱਚ ਕੋਈ ਬਦਲਾਅ ਹੁੰਦਾ ਵੀ ਨਹੀਂ ਦਿੱਸ ਰਿਹਾ। ਉਮਰ ਦੀ ਕੋਈ ਵੱਧ ਤੋਂ ਵੱਧ ਸੀਮਾ ਫਿਲਹਾਲ ਨਹੀਂ ਦਿਖਾਈ ਦੇ ਰਹੀ। ਪਹਿਲਾਂ ਦੇ ਕੁਝ ਅਧਿਐਨਾਂ ਵਿੱਚ ਕਿਹਾ ਗਿਆ ਸੀ ਕਿ ਇਨਸਾਨ ਉਮਰ ਦੀ ਆਖਰੀ ਸੀਮਾ ਵੱਲ ਵਧ ਰਿਹਾ ਹੈ। ਨਵੀਂ ਖੋਜ ਵਿੱਚ ਇਸ ਗੱਲ ਨੂੰ ਰੱਦ ਕੀਤਾ ਗਿਆ ਹੈ। ਜਰਨਲ ਪੀ ਐੱਨ ਏ ਐੱਸ ਵਿੱਚ ਛਪੇ ਇਸ ਅਧਿਐਨ ਦੇ ਲਈ 1960 ਤੋਂ 2010 ਦੇ ਵਿਚਕਾਰ ਦੇ ਅਜਿਹੇ ਲੋਕਾਂ ਦੇ ਜਨਮ ਅਤੇ ਮੌਤ ਦਾ ਆਂਕੜਾ ਇਕੱਠਾ ਕੀਤਾ ਗਿਆ, ਜਿਨ੍ਹਾਂ ਦੀ ਉਮਰ 65 ਸਾਲ ਤੋਂ ਜ਼ਿਆਦਾ ਸੀ। ਖੋਜ ਵਿੱਚ ਪਾਇਆ ਗਿਆ ਕਿ ਹਰ 25 ਸਾਲ ਵਿੱਚ ਅਜਿਹੇ ਲੋਕਾਂ ਦੀ ਵੱਧ ਤੋਂ ਵੱਧ ਔਸਤ ਉਮਰ ਤਿੰਨ ਸਾਲ ਤੱਕ ਵਧ ਜਾਂਦੀ ਹੈ। ਇਸ ਦਾ ਅਰਥ ਹੈ ਕਿ ਲੋਕ ਆਪਣੇ ਦਾਦਾ ਤੋਂ ਛੇ ਸਾਲ ਜ਼ਿਆਦਾ ਜਿਊਂਦੇ ਹਨ।