ਕੋਚੀ, 8 ਜੁਲਾਈ (ਪੋਸਟ ਬਿਊਰੋ)- ਕੇਰਲ ਹਾਈ ਕੋਰਟ ਨੇ ਇੱਕ ਕੇਸ ਦੀ ਸੁਣਵਾਈ ਦੌਰਾਨ ਸਹਿਮਤੀ ਨਾਲ ਸੈਕਸ ਤੇ ਰੇਪ ਦੇ ਫਰਕ ਦੀ ਵਿਆਖਿਆ ਕੀਤੀ ਅਤੇ ਕਿਹਾ ਕਿ ਸੈਕਸ ਲਈ ਜੇ ਮਹਿਲਾ ਸਵਾਗਤ ਕਰਦੀ ਹੈ ਤਾਂ ਉਸ ਨੂੰ ਆਪਸੀ ਸਹਿਮਤੀ ਨਾਲ ਸੈਕਸ ਮੰਨਿਆ ਜਾ ਸਕਦਾ ਹੈ, ਵਰਨਾ ਇਸ ਨੂੰ ਬਲਾਤਕਾਰ ਹੀ ਕਿਹਾ ਜਾਵੇਗਾ।
ਜਸਟਿਸ ਪੀ ਬੀ ਸੁਰੇਸ਼ ਕੁਮਾਰ ਨੇ 1986 ਵਿੱਚ ਅਮਰੀਕੀ ਸੁਪਰੀਮ ਕੋਰਟ ਵਿੱਚ ਚੱਲੇ ਇੱਕ ਕੇਸ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਮਹਿਲਾ ਵੱਲੋਂ ਸੈਕਸ ਲਈ ਖ਼ੁਸ਼ੀ-ਖ਼ੁਸ਼ੀ ਰਾਜ਼ੀ ਹੋਣ ਦਾ ਪੱਧਰ ਹੋਣਾ ਚਾਹੀਦਾ ਹੈ। ਇਸ ਨਾਲ ਉਸ ਦੇ ਅਧਿਕਾਰਾਂ ਦੀ ਸੁਰੱਖਿਆ ਅਤੇ ਲਿੰਗਕ ਬਰਾਬਰੀ ਨੂੰ ਠੇਸ ਨਹੀਂ ਲੱਗੇਗੀ। ਹਾਈ ਕੋਰਟ ਨੇ ਕਿਹਾ ਕਿ ਦੂਜੇ ਸ਼ਬਦਾਂ 'ਚ ਭਾਰਤ ਵਰਗੇ ਦੇਸ਼ ਵਿੱਚ, ਜੋ ਲਿੰਗਕ ਬਰਾਬਰੀ ਨੂੰ ਮਾਨਤਾ ਦੇਂਦਾ ਹੈ, ਵਿੱਚ ਸਿਰਫ ਅਜਿਹਾ ਸਰੀਰਕ ਸਬੰਧ ਹੈ, ਜਿਸ ਦਾ ਖ਼ੁਸ਼ੀ ਨਾਲ ਸਵਾਗਤ ਕੀਤਾ ਜਾਂਦਾ ਹੈ, ਅਜਿਹੇ ਸਬੰਧਾਂ ਨੂੰ ਆਪਸੀ ਸਹਿਮਤੀ ਨਾਲ ਸਵੀਕਾਰ ਕੀਤਾ ਜਾ ਸਕਦਾ ਹੈ।
ਕੋਰਟ ਨੇ ਫੈਸਲੇ 'ਚ ਕਿਹਾ ਕਿ ਇਹ ਇੱਕ ਸੱਚਾਈ ਹੈ ਕਿ ਜਿਸ ਤਰ੍ਹਾਂ ਦਾ ਸੈਕਸ ਇੱਕ ਮਹਿਲਾ ਚਾਹੁੰਦੀ ਹੈ, ਉਸ ਨੂੰ ਕਦੀ ਆਪਸੀ ਰਜ਼ਾਮੰਦੀ ਨਹੀਂ ਕਿਹਾ ਜਾ ਸਕਦਾ। ਜਦੋਂ ਸੈਕਸੁਅਲ ਇੰਟਰਐਕਸ਼ਨ ਬਰਾਬਰ ਹੋਵੇਗਾ ਤਾਂ ਸਹਿਮਤੀ ਦੀ ਜ਼ਰੂਰਤ ਨਹੀਂ ਤੇ ਜੇ ਇਹ ਦੋਵੇਂ ਪਾਸਿਓਂ ਨਹੀਂ ਹੋਵੇਗਾ ਤਾਂ ਰਾਜ਼ਮੰਦੀ ਨਾਲ ਇਸ ਨੂੰ ਬਰਾਬਰ ਨਹੀਂ ਕੀਤਾ ਜਾ ਸਕਦਾ।
ਹਾਈ ਕੋਰਟ ਨੇ ਸਾਲ 1958 ਅਤੇ 2003 ਦੇ ਸੁਪਰੀਮ ਕੋਰਟ ਦੇ ਫੈਸਲਿਆਂ ਦਾ ਜ਼ਿਕਰ ਕਰਦੇ ਹੋਏ 59 ਸਾਲ ਦੇ ਇੱਕ ਵਿਅਕਤੀ ਦੀ ਅਪੀਲ 'ਤੇ ਫੈਸਲਾ ਦਿੱਤਾ ਹੈ। ਉਸ ਉਤੇ ਗੁਆਂਢ 'ਚ ਰਹਿੰਦੀ 14 ਸਾਲਾ ਲੜਕੀ ਦਾ ਕਈ ਵਾਰ ਰੇਪ ਕਰਨ ਦਾ ਦੋਸ਼ ਹੈ। ਲੜਕੀ ਗਰਭਵਤੀ ਵੀ ਹੋ ਗਈ ਸੀ। ਇਹ ਘਟਨਾ 2009 ਵਿੱਚ ਹੋਈ ਸੀ ਤੇ ਉਸ ਸਮੇਂ ਪਾਕਸੋ ਐਕਟ (ਬੱਚਿਆਂ ਨਾਲ ਬਲਾਤਕਾਰ ਬਾਰੇ ਕਾਨੂੰਨ) ਮੌਜੂਦ ਨਹੀਂ ਸੀ। ਹਾਈ ਕੋਰਟ ਨੇ ਹੇਠਲੀ ਅਦਾਲਤ ਵੱਲੋਂ ਦੋਸ਼ੀ ਕਰਾਰ ਦਿੱਤੇ ਵਿਅਕਤੀ ਬਾਰੇ ਫੈਸਲੇ ਨੂੰ ਕਾਇਮ ਰੱਖਿਆ ਅਤੇ ਉਸਦੀ ਅਪੀਲ ਰੱਦ ਕਰ ਦਿੱਤੀ ਹੈ।
ਦੋਸ਼ੀ ਨੇ ਕੋਰਟ ਵਿੱਚ ਅਪੀਲ ਕਰਨ ਵੇਲੇ ਦਲੀਲ ਦਿੱਤੀ ਸੀ ਕਿ ਉਸ ਨੇ ਪੀੜਤਾ ਨਾਲ ਸਹਿਮਤੀ ਨਾਲ ਸਬੰਧ ਬਣਾਏ ਸਨ। ਉਸ ਨੇ ਕਿਹਾ ਕਿ ਪਹਿਲੀ ਵਾਰ ਸੈਕਸ ਤੋਂ ਬਾਅਦ ਪੀੜਤਾ ਉਸ ਦੇ ਘਰ ਕਈ ਵਾਰ ਆਈ ਸੀ। ਪੀੜਤਾ ਨੇ ਅਦਾਲਤ ਵਿੱਚ ਕਿਹਾ ਕਿ ਉਸ ਨੇ ਅਜਿਹਾ ਇਸ ਲਈ ਕੀਤਾ ਕਿ ਉਸ ਨੂੰ ਆਪਣੀ ਮਾਂ ਤੇ ਭੈਣ ਦੇ ਨੁਕਸਾਨ ਦਾ ਡਰ ਸੀ।