ਨਵੀਂ ਦਿੱਲੀ, 8 ਜੁਲਾਈ (ਪੋਸਟ ਬਿਊਰੋ)- ਆਪਣੇ ਮਿੱਤਰ ਚੀਨ ਦੀ ਮਦਦ ਨਾਲ ਕੁਝ ਭਾਰਤੀਆਂ ਨੂੰ ਯੂ ਐੱਨ ਓ ਦੀ ਅੱਤਵਾਦੀ ਸੂਚੀ ਵਿੱਚ ਸ਼ਾਮਲ ਕਰਨ ਦੀ ਕੋਸ਼ਿਸ਼ ਵਿੱਚ ਲੱਗੇ ਪਾਕਿਸਤਾਨ ਦਾ ਭਾਰਤ ਨੇ ਯੂ ਐੱਨ ਦੀ ਬੈਠਕ ਵਿੱਚ ਇੱਕ ਵਾਰ ਫਿਰ ਪੂਰੀ ਤਰ੍ਹਾਂ ਪਰਦਾ ਫਾਸ਼ ਕਰ ਦਿੱਤਾ ਹੈ।
ਯੂ ਐੱਨ ਓ ਦੇ ਅੱਤਵਾਦੀ ਵਿਰੋਧੀ ਦਫਤਰ (ਯੂ ਐੱਨ ਓ ਸੀ ਟੀ) ਦੀ ਬੇਹੱਦ ਖੁਫੀਆ ਵਰਚੁਅਲ ਬੈਠਕ ਵਿੱਚ ਭਾਰਤੀ ਵਫਦ ਨੇ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ ਅਗਵਾਈ ਵਿੱਚ ਓਥੋਂ ਦੀ ਸਰਕਾਰ ਵੱਲੋਂ ਚਲਾਈ ਜਾਂਦੀ ਅੱਤਵਾਦ ਦੀ ਫੈਕਟਰੀ ਨਾਲ ਜੁੜੀਆਂ ਸਭ ਸਰਗਰਮੀਆਂ ਨੂੰ ਅੰਤਰਰਾਸ਼ਟਰੀ ਭਾਈਚਾਰੇ ਸਾਹਮਣੇ ਰੱਖ ਦਿੱਤਾ ਹੈ। ਕੋਵਿਡ 19 ਦੀ ਮਹਾਮਾਰੀ ਦੌਰਾਨ ਹਾਲਾਤ ਦਾ ਲਾਭ ਉਠਾਉਣ ਲਈ ਪਾਕਿਸਤਾਨ ਵੱਲੋਂ ਚਲਾਏ ਜਾਂਦੇ ਅੱਤਵਾਦੀ ਸੰਗਠਨਾਂ ਦੀਆਂ ਕਰਤੂਤਾਂ ਨੂੰ ਵੀ ਸੰਸਾਰ ਮੂਹਰੇ ਭਾਰਤੀ ਦਲ ਦੇ ਆਗੂ ਮਹਾਵੀਰ ਸਿੰਘਵੀ ਨੇ ਪੇਸ਼ ਕੀਤਾ ਹੈ। ਉਨ੍ਹਾ ਨੇ ਜਿਸ ਤਰ੍ਹਾਂ ਸਬੂਤਾਂ ਅਤੇ ਦਲੀਲਾਂ ਨਾਲ ਪਾਕਿਸਤਾਨ ਸਰਕਾਰ ਦੇ ਸਾਏ ਹੇਠ ਪਲਦੇ ਅੱਤਵਾਦ ਨੂੰ ਸਾਹਮਣੇ ਲਿਆਂਦਾ, ਉਸ ਦਾ ਅਸਰ ਐੱਫ ਏ ਟੀ ਐੱਫ (ਫਾਈਨੈਂਸ਼ਲ ਐਕਸ਼ਨ ਟਾਸਕ ਫੋਰਸ) ਦੇ ਫੈਸਲਿਆਂ ਉੱਤੇ ਵੀ ਅਗਲੇ ਦਿਨਾਂ ਵਿੱਚ ਪੈ ਸਕਦਾ ਹੈ।
ਇਸ ਮੌਕੇ ਭਾਰਤੀ ਦੂਤ ਨੇ ਕਿਹਾ ਕਿ ਇੱਕ ਪਾਸੇ ਸਾਰੀ ਦੁਨੀਆ ਵਿੱਚ ਕੋਵਿਡ 19 ਤੋਂ ਬਚਣ ਦੇ ਉਪਾਅ ਕਰਦੀ ਪਈ ਹੈ ਅਤੇ ਦੂਸਰੇ ਪਾਸੇ ਪਾਕਿਸਤਾਨ ਆਪਣੀ ਪੂਰੀ ਤਾਕਤ ਭਾਰਤ ਵਿਰੁੱਧ ਬੇਬੁਨਿਆਦ ਦੋਸ਼ ਲਗਾਉਣ ਅਤੇ ਉਸ ਦੇ ਅੰਦਰੂਨੀ ਮਾਮਲਿਆਂ ਵਿੱਚ ਦਖਲ ਦੇਣ ਵਿੱਚ ਲਾ ਰਿਹਾ ਹੈ। ਮੁੰਬਈ, ਪਠਾਨਕੋਟ, ਉੜੀ, ਪੁਲਵਾਮਾ ਦੇ ਅੱਤਵਾਦੀ ਹਮਲੇ ਕਰਵਾਉਣ ਵਾਲਾ ਦੇਸ਼ ਸਾਰੇ ਸੰਸਾਰ ਭਾਈਚਾਰੇ ਨੂੰ ਅੱਤਵਾਦ ਬਾਰੇ ਭਾਸ਼ਣ ਦੇਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਇੱਕ ਪਾਸੇ ਪਾਕਿ ਅਲ ਕਾਇਦਾ ਨੂੰ ਖਤਮ ਕਰਨ ਦੀ ਗੱਲ ਕਰਦਾ ਹੈ ਤਾਂ ਦੂਸਰੇ ਪਾਸੇ ਉਸ ਦੇ ਪ੍ਰਧਾਨ ਮੰਤਰੀ ਆਪਣੀ ਪਾਰਲੀਮੈਂਟ ਵਿੱਚ ਅੱਤਵਾਦੀ ਓਸਾਮਾ ਬਿਨ ਲਾਦੇਨ ਨੂੰ ਸ਼ਹੀਦ ਕਰਾਰ ਦਿੰਦੇ ਹਨ। ਇਹ ਸਾਫ ਸਬੂਤ ਹੈ ਕਿ ਪਾਕਿਸਤਾਨ ਕਿਸ ਹੱਦ ਤੱਕ ਅੱਤਵਾਦ ਨੂੰ ਹੱਲਾਸ਼ੇਰੀ ਦਿੰਦਾ ਹੈ। ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਨੇ ਪਹਿਲਾਂ ਇਹ ਗੱਲ ਮੰਨੀ ਸੀ ਕਿ ਉਸ ਦੇਸ਼ ਵਿੱਚ ਚਾਲੀ ਹਜ਼ਾਰ ਅੱਤਵਾਦੀ ਹਨ, ਜੋ ਗੁਆਂਢੀ ਦੇਸ਼ਾਂ 'ਤੇ ਵੀ ਹਮਲੇ ਕਰਦੇ ਹਨ।
ਇਸ ਤੋਂ ਪਹਿਲਾਂ ਪਾਕਿਸਤਾਨੀ ਦੂਤ ਨੇ ਪਿੱਛੇ ਜਿਹੇ ਕਰਾਚੀ ਵਿੱਚ ਹੋਏ ਹਮਲੇ ਵਿੱਚ ਭਾਰਤ ਦਾ ਹੱਥ ਹੋਣ ਦੀ ਗੱਲ ਕਹੀ ਸੀ। ਇਸ 'ਤੇ ਭਾਰਤੀ ਦਲ ਨੇ ਜਵਾਬ ਦਿੱਤਾ ਕਿ ਭਾਰਤ ਕਿਤੇ ਵੀ ਅੱਤਵਾਦੀ ਘਟਨਾ ਹੋਵੇ, ਉਸ ਵਿੱਚ ਫਰਕ ਨਹੀਂ ਕਰਦਾ, ਅੱਤਵਾਦ ਨੂੰ ਅੱਤਵਾਦ ਕਹਿੰਦਾ ਹੈ, ਏਸੇ ਲਈ ਕਰਾਚੀ ਟਾਸਕ ਐਕਸਚੇਂਜ ਵਿੱਚ ਹੋਏ ਹਮਲੇ ਨੂੰ ਭਾਰਤ ਸਰਕਾਰ ਨੇ ਅੱਤਵਾਦੀ ਹਮਲਾ ਕਰਾਰ ਦਿੱਤਾ ਹੈ ਅਤੇ ਇਸ ਦੀ ਸਖਤ ਸ਼ਬਦਾਂ ਵਿੱਚ ਨਿੰਦਾ ਕੀਤੀ ਹੈ।