ਓਨਟਾਰੀਓ, 8 ਜੁਲਾਈ (ਪੋਸਟ ਬਿਊਰੋ) : ਐਲਨ ਰੋਡ ਤੇ ਲਾਰੈਂਸ ਐਵਨਿਊ ਵੈਸਟ ਨੇੜੇ ਚੱਲੀਆਂ ਕਈ ਗੋਲੀਆਂ ਦੇ ਮਾਮਲੇ ਦੀ ਪੁਲਿਸ ਜਾਂਚ ਕਰ ਰਹੀ ਹੈ।

ਬੱੁਧਵਾਰ ਨੂੰ 12:30 ਵਜੇ ਫਲੈਮਿੰਗਟਨ ਤੇ ਰੈਪਲਿਨ ਰੋਡਜ਼ ਦੁਆਲੇ ਵਾਪਰੀ ਇਸ ਘਟਨਾ ਦੇ ਸਬੰਧ ਵਿੱਚ ਐਮਰਜੰਸੀ ਅਮਲੇ ਨੂੰ ਮੌਕੇ ਉੱਤੇ ਸੱਦਿਆ ਗਿਆ। ਇਸ ਇਲਾਕੇ ਵਿੱਚ ਪੁਲਿਸ ਅਧਿਕਾਰੀਆਂ ਨੂੰ ਗੋਲੀਆਂ ਦੇ 15 ਖੋਲ ਮਿਲੇ ਪਰ ਕੋਈ ਵੀ ਜ਼ਖ਼ਮੀ ਵਿਅਕਤੀ ਨਹੀਂ ਮਿਲਿਆ। ਪੁਲਿਸ ਦਾ ਇਹ ਵੀ ਮੰਨਣਾ ਹੈ ਕਿ ਮਸ਼ਕੂਕ ਇੱਕ ਵਿਅਕਤੀ ਨੂੰ ਹੀ ਆਪਣਾ ਨਿਸ਼ਾਨਾ ਬਣਾਉਣਾ ਚਾਹ ਰਹੇ ਸਨ, ਜੋ ਕਿ ਮੌਕੇ ਤੋਂ ਫਰਾਰ ਹੋ ਗਿਆ।

ਇਸ ਇਲਾਕੇ ਦੀ ਸਕਿਊਰਿਟੀ ਫੁਟੇਜ ਦੀ ਜਾਂਚ ਕਰਨ ਤੋਂ ਬਾਅਦ ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਚਾਰ ਸਿਆਹ ਨਸਲ ਦੇ ਵਿਅਕਤੀਆਂ ਦੀ ਭਾਲ ਕਰ ਰਹੀ ਹੈ। ਜਿਨ੍ਹਾਂ ਵਿੱਚੋਂ ਤਿੰਨ ਤਾਂ ਗੋਲੀਆਂ ਚਲਾ ਰਹੇ ਸਨ। ਇੱਕ ਨੇ ਚਿੱਟੇ ਰੰਗ ਦੀ ਸ਼ਰਟ ਤੇ ਕਾਲੇ ਰੰਗ ਦੀਆਂ ਸ਼ਾਰਟਸ ਪਾਈਆ ਹੋਈਆਂ ਸਨ। ਪੁਲਿਸ ਇੱਕ ਚਿੱਟੇ ਰੰਗ ਦੀ ਸੇਡਾਨ ਦੀ ਭਾਲ ਵੀ ਕਰ ਰਹੀ ਹੈ ਜਿਸ ਨੂੰ ਆਖਰੀ ਵਾਰੀ ਫਲੈਮਿੰਗਟਨ ਉੱਤੇ ਪੱਛਮ ਵੱਲ ਜਾਂਦਿਆਂ ਵੇਖਿਆ ਗਿਆ।