ਓਟਵਾ, 8 ਜੁਲਾਈ (ਪੋਸਟ ਬਿਊਰੋ) : ਕੈਨੇਡਾ ਵਿੱਚ ਚੀਨ ਦੇ ਅੰਬੈਸਡਰ ਨੇ ਤਾੜਨਾ ਕਰਦਿਆਂ ਹੋਇਆਂ ਆਖਿਆ ਕਿ ਹਾਂਗ ਕਾਂਗ ਵਿੱਚ ਚੀਨ ਵੱਲੋਂ ਕੀਤੇ ਜਾ ਰਹੇ ਫੈਸਲਿਆਂ ਦਾ ਵਿਰੋਧ ਕਰਕੇ ਕੈਨੇਡਾ ਠੀਕ ਨਹੀਂ ਕਰ ਰਿਹਾ। ਜੇ ਕੈਨੇਡਾ ਨੇ ਅਜਿਹਾ ਕਰਨਾ ਬੰਦ ਨਾ ਕੀਤਾ ਤਾਂ ਜਵਾਬੀ ਕਾਰਵਾਈ ਲਈ ਤਿਆਰ ਰਹੇ।
ਇੱਕ ਇੰਟਰਵਿਊ ਵਿੱਚ ਕੈਨੇਡਾ ਵਿੱਚ ਚੀਨ ਦੇ ਅੰਬੈਸਡਰ ਕੌਂਗ ਪੇਅਵੂ ਨੇ ਲਿਬਰਲ ਸਰਕਾਰ ਉੱਤੇ ਦੋਸ਼ ਲਾਇਆ ਕਿ ਉਹ ਚੀਨ ਦੇ ਅੰਦਰੂਨੀ ਮਾਮਲਿਆਂ ਵਿੱਚ ਦਖਲਅੰਦਾਜ਼ੀ ਕਰ ਰਹੀ ਹੈ। ਉਨ੍ਹਾਂ ਆਖਿਆ ਕਿ ਕੈਨੇਡਾ-ਹਾਂਗ ਕਾਂਗ ਹਵਾਲਗੀ ਸੰਧੀ ਤੇ ਸਿਟੀ ਨੂੰ ਮਿਲਟਰੀ ਤੇ ਦੋਹਰੀ ਵਰਤੋਂ ਵਾਲੇ ਐਕਸਪੋਰਟ ਨੂੰ ਸਸਪੈਂਡ ਕਰਕੇ ਕੈਨੇਡਾ ਸਰਕਾਰ ਵਲੋਂ ਸਹੀ ਨਹੀਂ ਕੀਤਾ ਜਾ ਰਿਹਾ।
ਕੌਂਗ ਚੀਨੀ ਸਰਕਾਰ ਦੇ ਬਿਆਨ ਬਾਰੇ ਹੀ ਗੱਲ ਕਰ ਰਹੇ ਸਨ। ਜਿ਼ਕਰਯੋਗ ਹੈ ਕਿ ਚੀਨ ਦੇ ਵਿਦੇਸ਼ ਮੰਤਰਾਲੇ ਦੇ ਇੱਕ ਬੁਲਾਰੇ ਨੇ ਕੈਨੇਡਾ ਵੱਲੋਂ ਪ੍ਰਗਟਾਈ ਪ੍ਰਤੀਕਿਰਿਆ ਦੀ ਨਿਖੇਧੀ ਕੀਤੀ ਸੀ। ਇਸ ਪ੍ਰਤੀਕਿਰਿਆ ਵਿੱਚ ਕੈਨੇਡਾ ਨੇ ਆਖਿਆ ਸੀ ਕਿ ਅਗਲੇਰੀ ਪ੍ਰਤੀਕਿਰਿਆ ਦੇ ਅਧਿਕਾਰ ਨੂੰ ਬਚਾਅ ਕੇ ਰੱਖੋ। ਬੁਲਾਰੇ ਵੱਲੋਂ ਇਹ ਚੇਤਾਵਨੀ ਵੀ ਦਿੱਤੀ ਗਈ ਸੀ ਕਿ ਕੈਨੇਡਾ ਨੂੰ ਇਸ ਦੇ ਨਤੀਜੇ ਵੀ ਭੁਗਤਣੇ ਪੈਣਗੇ।
ਇਹ ਪੱੁਛੇ ਜਾਣ ੳੱੁਤੇ ਕਿ ਬੀਜਿੰਗ ਵੱਲੋਂ ਕਿਹੜੇ ਨਤੀਜਿਆਂ ਦੀ ਗੱਲ ਕੀਤੀ ਜਾ ਰਹੀ ਹੈ ਤਾਂ ਕੌਂਗ ਨੇ ਆਖਿਆ ਕਿ ਬੱਸ ਤੁਸੀਂ ਦੇਖਦੇ ਜਾਓ। ਉਨ੍ਹਾਂ ਆਖਿਆ ਕਿ ਅਸੀਂ ਆਪਣੀ ਕੌਮੀ ਸਕਿਊਰਿਟੀ ਤੇ ਪ੍ਰਭੂਸਤਾ ਦੀ ਰਾਖੀ ਕਰਨ ਲਈ ਪ੍ਰਤੀਬੱਧ ਹਾਂ। ਅਸੀਂ ਹੱਥ ੳੱੁਤੇ ਹੱਥ ਧਰ ਕੇ ਨਹੀਂ ਬੈਠੇ ਰਹਾਂਗੇ। ਚੀਨ ਦੀ ਸਰਕਾਰ ਵੱਲੋਂ ਕੈਨੇਡਾ ਖਿਲਾਫ ਜਵਾਬੀ ਕਾਰਵਾਈ ਕਰਨ ਦੀ ਇਹ ਦੂਜੀ ਘਟਨਾ ਹੈ।
ਹਾਂਗ ਕਾਂਗ ਵਿੱਚ ਲਾਗੂ ਕੀਤੇ ਗਈ ਨਵੇਂ ਨੈਸ਼ਨਲ ਸਕਿਊਰਿਟੀ ਲਾਅ (national security law) ਦੀ ਕੌਮਾਂਤਰੀ ਪੱਧਰ ੳੱੁਤੇ ਨਿਖੇਧੀ ਕੀਤੀ ਜਾ ਰਹੀ ਹੈ। ਇਹ ਨਵਾਂ ਕਾਨੂੰਨ ਪਿਛਲੇ ਹਫਤੇ ਹੀ ਲਾਗੂ ਕੀਤਾ ਗਿਆ ਹੈ ਤੇ ਇਸ ਨਾਲ ਕਿਸੇ ਵੀ ਸਿਆਸੀ ਵਿਰੋਧ ਨੂੰ ਦਬਾਉਣ ਲਈ ਬੀਜਿੰਗ ਨੂੰ ਹੋਰ ਸ਼ਕਤੀ ਮਿਲ ਜਾਵੇਗੀ। ਇਸ ਤੋਂ ਇਲਾਵਾ ਇਸ ਕਾਨੂੰਨ ਸਦਕਾ ਹਾਂਗ ਕਾਂਗ ਵਿੱਚ ਗੈਰ ਸਰਕਾਰੀ ਸੰਸਥਾਵਾਂ, ਮੀਡੀਆ ਤੇ ਵਿਦੇਸ਼ੀ ਸਰਕਾਰਾਂ ਦੀਆਂ ਗਤੀਵਿਧੀਆਂ ਨੂੰ ਵੀ ਘਟਾਉਣ ਵਿੱਚ ਚੀਨੀ ਸਰਕਾਰ ਨੂੰ ਮਦਦ ਮਿਲੇਗੀ।