ਵਾਸਿ਼ੰਗਟਨ, 7 ਜੁਲਾਈ (ਪੋਸਟ ਬਿਊਰੋ) : ਟਰੰਪ ਪ੍ਰਸ਼ਾਸਨ ਵੱਲੋਂ ਰਸਮੀ ਤੌਰ ਉੱਤੇ ਸੰਯੁਕਤ ਰਾਸ਼ਟਰ ਨੂੰ ਇਹ ਜਾਣਕਾਰੀ ਦੇ ਦਿੱਤੀ ਗਈ ਹੈ ਕਿ ਵਰਲਡ ਹੈਲਥ ਆਰਗੇਨਾਈਜ਼ੇਸ਼ਨ (ਡਬਲਿਊਐਚਓ) ਤੋਂ ਉਹ ਪਾਸੇ ਹਟ ਰਿਹਾ ਹੈ। ਹਾਲਾਂਕਿ ਇਹ ਫੈਸਲਾ ਅਗਲੇ ਸਾਲ ਤੱਕ ਪ੍ਰਭਾਵੀ ਨਹੀਂ ਹੋਵੇਗਾ। ਇਸ ਤੋਂ ਭਾਵ ਇਹ ਹੈ ਕਿ ਨਵੇਂ ਪ੍ਰਸ਼ਾਸਨ ਜਾਂ ਹਾਲਾਤ ਬਦਲਣ ਤੋਂ ਬਾਅਦ ਇਸ ਫੈਸਲੇ ਨੂੰ ਪਲਟਿਆ ਵੀ ਜਾ ਸਕਦਾ ਹੈ।
ਇੱਥੇ ਦੱਸਣਾ ਬਣਦਾ ਹੈ ਕਿ ਸਾਬਕਾ ਵਾਈਸ ਪ੍ਰੈਜ਼ੀਡੈਂਟ ਜੋਅ ਬਾਇਡਨ, ਜੋ ਕਿ ਰਾਸ਼ਟਰਪਤੀ ਦੇ ਅਹੁਦੇ ਦੀ ਦੌੜ ਵਿੱਚ ਡੈਮੋਕ੍ਰੈਟਿਕ ਪਾਰਟੀ ਦੇ ਉਮੀਦਵਾਰ ਹਨ, ਨੇ ਸਪਸ਼ਟ ਕਰ ਦਿੱਤਾ ਹੈ ਕਿ ਚੁਣੇ ਜਾਣ ਤੋਂ ਬਾਅਦ ਆਪਣੇ ਕਾਰਜਕਾਲ ਦੇ ਪਹਿਲੇ ਦਿਨ ਉਹ ਇਸ ਫੈਸਲੇ ਨੂੰ ਪਲਟਾਉਣਗੇ। ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਮਈ ਦੇ ਅਖੀਰ ਵਿੱਚ ਇਹ ਤਹੱਈਆ ਪ੍ਰਗਟਾਇਆ ਸੀ ਕਿ ਅਮਰੀਕਾ ਡਬਲਿਊਐਚਓ (ੱ੍ਹੌ) ਦੇ ਕੰਮਕਾਜ ਵਿੱਚ ਹਿੱਸਾ ਨਹੀਂ ਲਵੇਗਾ।
ਟਰੰਪ ਵੱਲੋਂ ਕਰੋਨਾਵਾਇਰਸ ਮਹਾਂਮਾਰੀ ਪ੍ਰਤੀ ਮੱਠੀ ਪ੍ਰਤੀਕਿਰਿਆ ਲਈ ਡਬਲਿਊਐਚਓ ਦੀ ਕਾਫੀ ਆਲੋਚਨਾ ਕੀਤੀ ਗਈ ਸੀ। ਇਸ ਤੋਂ ਇਲਾਵਾ ਟਰੰਪ ਨੇ ਡਬਲਿਊਐਚਓ ਉੱਤੇ ਚੀਨ ਦੇ ਪ੍ਰਭਾਵ ਵਿੱਚ ਆਉਣ ਦਾ ਦੋੋਸ਼ ਵੀ ਲਾਇਆ ਸੀ। ਟਰੰਪ ਦੇ ਇਸ ਕਦਮ ਉੱਤੇ ਸਿਹਤ ਅਧਿਕਾਰੀਆਂ ਤੇ ਹੋਰਨਾ ਕ੍ਰਿਟਿਕਸ ਵੱਲੋਂ ਕਾਫੀ ਇਤਰਾਜ਼ ਕੀਤਾ ਗਿਆ। ਕਈ ਡੈਮੋਕ੍ਰੈਟਸ ਨੇ ਤਾਂ ਇੱਥੋਂ ਤੱਕ ਆਖ ਦਿੱਤਾ ਹੈ ਕਿ ਇਸ ਕਦਮ ਨਾਲ ਦੁਨੀਆਂ ਭਰ ਵਿੱਚ ਅਮਰੀਕਾ ਦਾ ਪ੍ਰਭਾਵ ਘਟੇਗਾ।
ਅਮਰੀਕਾ ਵੱਲੋਂ ਡਬਲਿਊਐਚਓ ਤੋਂ ਸਹਿਯੋਗ ਵਾਪਿਸ ਲੈਣ ਬਾਰੇ ਨੋਟਿਸ ਸੋਮਵਾਰ ਨੂੰ ਸੰਯੁਕਤ ਰਾਸ਼ਟਰ ਦੇ ਸਕੱਤਰ ਜਨਰਲ ਐਨਟੋਨੀਓ ਗੁਤੈਰੈਸ ਨੂੰ ਭੇਜ ਦਿੱਤਾ ਗਿਆ। ਇਹ ਫੈਸਲਾ 6 ਜੁਲਾਈ, 2021 ਨੂੰ ਪ੍ਰਭਾਵੀ ਹੋਵੇਗਾ।