ਨਵੀਂ ਦਿੱਲੀ, 7 ਜੁਲਾਈ (ਪੋਸਟ ਬਿਊਰੋ)- ਸੂਰਜੀ ਊਰਜਾ ਨਾਲ ਦੇਸ਼ ਦੇ ਕਈ ਰੇਲਵੇ ਸਟੇਸ਼ਨਾਂ ਦੀ ਬਿਜਲੀ ਦੀ ਲੋੜ ਪੂਰੀ ਕਰਨ ਦੇ ਬਾਅਦ ਰੇਲਵੇ ਜਲਦੀ ਹੀ ਇਸ ਦਾ ਇਸਤੇਮਾਲ ਰੇਲ ਗੱਡੀਆਂ ਚਲਾਉਣ ਵਿੱਚ ਕਰਨ ਜਾ ਰਿਹਾ ਹੈ। ਮੱਧ ਪ੍ਰਦੇਸ਼ ਦੇ ਬੀਨਾ ਵਿੱਚ ਰੇਲਵੇ ਨੇ ਆਪਣੀ ਖਾਲੀ ਪਈ ਜ਼ਮੀਨ 'ਤੇ 1.7 ਮੈਗਾਵਾਟ ਦਾ ਸੂਰਜੀ ਊਰਜਾ ਪਲਾਂਟ ਲਗਾਉਣ ਦਾ ਕੰਮ ਪੂਰਾ ਕਰ ਲਿਆ ਹੈ। ਇਸ ਨੂੰ 25 ਕੇ ਵੀ ਦੀ ਓਵਰਹੈੱਡ ਲਾਈਨ ਨਾਲ ਜੋੜ ਕੇ ਰੇਲ ਗੱਡੀ ਚਲਾਉਣ ਦੀ ਯੋਜਨਾ ਹੈ। ਪਹਿਲੀ ਵਾਰ ਦੇਸ਼ ਵਿੱਚ ਸੂਰਜੀ ਊਰਜਾ ਦੇ ਇਸਤੇਮਾਲ ਨਾਲ ਰੇਲ ਗੱਡੀਆਂ ਚਲਾਈਆਂ ਜਾਣਗੀਆਂ।
ਰੇਲਵੇ ਅਧਿਕਾਰੀਆਂ ਨੇ ਦੱਸਿਆ ਕਿ ਭਾਰਤ ਹੈਵੀ ਇਲੈਕਟ੍ਰੀਕਲਸ ਲਿਮਟਿਡ (ਭੇਲ) ਅਤੇ ਭਾਰਤੀ ਰੇਲਵੇ ਦੀ ਸਾਂਝੀ ਪਹਿਲ ਨਾਲ ਲਾਏ ਗਏ ਪਲਾਂਟ ਦੇ ਟਰਾਇਲ ਦਾ ਕੰਮ ਸ਼ੁਰੂ ਹੋ ਗਿਆ ਹੈ। ਅਗਲੇ 15 ਦਿਨ ਵਿੱਚ ਏਥੋਂ ਬਿਜਲੀ ਉਤਪਾਦਨ ਸ਼ੁਰੂ ਹੋ ਜਾਏਗਾ। ਪਲਾਂਟ ਵਿੱਚ ਡੀ ਸੀ ਧਾਰਾ ਨੂੰ ਇੱਕ ਫੇਜ਼ ਵਾਲੀ ਏ ਸੀ ਧਾਰਾ ਵਿੱਚ ਬਦਲਣ ਲਈ ਵਿਸ਼ੇਸ਼ ਤਕਨੀਕ ਵਰਤੀ ਗਈ ਹੈ। ਇਸ ਨਾਲ ਸਿੱਧਾ ਓਵਰਲੋਡ ਲਾਈਨ ਨੂੰ ਸਪਲਾਈ ਹੋਵੇਗੀ। ਪਲਾਂਟ ਦੀ ਸਾਲਾਨਾ ਉਤਪਾਦਨ ਸਮਰੱਥਾ 25 ਲੱਖ ਯੂਨਿਟ ਹੋਵੇਗੀ। ਇਸ ਨਾਲ 1.37 ਕਰੋੜ ਰੁਪਏ ਦੀ ਬਚਤ ਹੋਵੇਗੀ। ਰੇਲਵੇ ਛੱਤੀਸਗੜ੍ਹ ਦੇ ਭਿਲਾਈ ਵਿੱਚ ਵੀ ਆਪਣੀ ਖਾਲੀ ਜ਼ਮੀਨ 'ਤੇ 50 ਮੈਗਾਵਾਟ ਦਾ ਸੂਰਜੀ ਊਰਜਾ ਪਲਾਂਟ ਲਾ ਰਿਹਾ ਹੈ। ਇਸ ਨੂੰ ਵੀ ਕੇਂਦਰ ਦੀ ਟ੍ਰਾਂਸਮਿਸ਼ਨ ਯੂਟੀਲਿਟੀ ਨਾਲ ਜੋੜਿਆ ਜਾਏਗਾ। ਇਥੇ ਮਾਰਚ 2021 ਤੱਕ ਉਤਪਾਦਨ ਸ਼ੁਰੂ ਹੋਣ ਦੀ ਆਸ ਹੈ। ਹਰਿਆਣਾ ਦੇ ਦੀਵਾਨਾ ਵਿੱਚ ਦੋ ਮੈਗਾਵਾਟ ਦੇ ਸੂਰਜੀ ਊਰਜਾ ਪਲਾਂਟ ਵਿੱਚ ਉਤਪਾਦਨ ਇਸ ਸਾਲ 31 ਅਗਸਤ ਤੱਕ ਸ਼ੁਰੂ ਹੋਣ ਦੀ ਉਮੀਦ ਹੈ।