ਅੰਮ੍ਰਿਤਸਰ, 7 ਜੁਲਾਈ (ਪੋਸਟ ਬਿਊਰੋ)- ਸੈਂਟਰਲ ਜੀ ਐੱਸ ਟੀ ਕਮਿਸ਼ਨਰੇਟ ਜਲੰਧਰ ਦੇ ਹੈੱਡਕੁਆਰਟਰ ਦੇ ਐਂਟੀ ਐਵੀਏਸ਼ਨ ਵਿੰਗ ਨੇ ਬੋਗਸ ਬਿਲਿੰਗ ਦਾ ਰੈਕੇਟ ਚਲਾ ਰਹੇ ਮਾਸਟਰ ਮਾਈਂਡ ਨੂੰ ਫੜ ਲਿਆ ਹੈ।
ਇਸ ਸੰਬੰਧ ਵਿੱਚ ਸੀ ਜੀ ਐੱਸ ਟੀ ਕਮਿਸ਼ਨਰ ਐੱਨ ਕੇ ਗੁਪਤਾ ਨੇ ਦੱਸਿਆ ਕਿ ਸੀ ਜੀ ਐੱਸ ਟੀ ਵਿਭਾਗ ਨੇ 17 ਕਰੋੜ ਦੀ ਬੋਗਸ ਬਿਲਿੰਗ ਦੇ ਘਪਲੇ ਦਾ ਪਰਦਾ ਫਾਸ਼ ਕਰ ਕੇ ਇਸ ਰੈਕਟ ਦੇ ਮਾਸਟਰ ਮਾਈਂਡ ਵਿਕਾਸ ਅਗਰਵਾਲ ਨੂੰ ਅੰਮ੍ਰਿਤਸਰ ਵਿੱਚ ਉਸ ਦੀ ਰਿਹਾਇਸ਼ ਤੋਂ ਗ੍ਰਿਫਤਾਰ ਕੀਤਾ ਹੈ, ਜੋ ਬਟਾਲਾ ਤੋਂ ਚਲਾਈਆਂ ਜਾਂਦੀਆਂ ਫਰਮਾਂ ਦੇ ਬੋਗਸ ਜੀ ਐੱਸ ਟੀ ਬਿਲਿੰਗ ਰੈਕੇਟ ਚਲਾ ਰਿਹਾ ਸੀ। ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਕਾਰਵਾਈ ਸੈਂਟਰਲ ਜੀ ਐੱਸ ਟੀ ਕਮਿਸ਼ਨਰ ਐੱਨ ਕੇ ਗੁਪਤਾ ਦੇ ਹੁਕਮ 'ਤੇ ਜਾਇੰਟ ਕਮਿਸ਼ਨਰ ਅਮਨ ਗਰਗ ਪ੍ਰੀਵੈਂਟਿਵ ਵਿੰਗ ਦੀ ਨਿਗਰਾਨੀ ਵਿੱਚ ਕੀਤੀ ਗਈ ਤਾਂ ਅਨੁਸਾਰ ਫਰਮਾਂ ਦਾ ਨੈੱਟਵਰਕ ਫਰਜ਼ੀ ਬਿੱਲ ਜਾਰੀ ਕਰਨ ਵਿੱਚ ਲੱਗਾ ਮਿਲਿਆ ਹੈ, ਜਿਸ ਵੱਲੋਂ ਪੰਜਾਬ ਦੀਆਂ ਵੱਖ-ਵੱਖ ਫਰਮਾਂ ਨੂੰ ਇਨਪੁੱਟ ਟੈਕਸ ਕ੍ਰੈਡਿਟ (ਆਈ ਟੀ ਸੀ) ਲਈ ਫਰਜ਼ੀ ਇਨਵਾਇਸ ਦੀ ਚੇਨ ਚਲਾਈ ਜਾ ਰਹੀ ਸੀ। ਵਿਭਾਗ ਨੇ ਆਪਣੀ ਜਾਂਚ ਵਿੱਚ ਪਾਇਆ ਕਿ ਕਈ ਫਰਮਾਂ ਦੀ ਮਿਲੀਭੁਗਤ ਦੇ ਨਾਲ ਇੱਕ ਦੂਜੇ ਵੱਲੋਂ ਫਰਜ਼ੀ ਚਲਾਨ ਜਾਰੀ ਕੀਤੇ ਜਾ ਰਹੇ ਸਨ। ਵਰਨਣ ਯੋਗ ਹੈ ਕਿ ਅਸਲ ਵਿੱਚ ਇਨ੍ਹਾਂ ਫਰਮਾਂ ਵੱਲੋਂ ਅਸਲੀ ਮਾਲ ਦੀ ਨਾ ਪ੍ਰਚੇਜ਼ ਤੇ ਨਾ ਸੇਲ ਕੀਤੀ ਜਾਂਦੀ ਸੀ, ਜਿਸ ਨਾਲ ਸਰਕਾਰ ਦੇ ਰੈਵੇਨਿਊ ਨੂੰ ਸੰਨ੍ਹ ਲਾ ਕੇ ਲਗਾਤਾਰ ਇਨਪੁਟ ਟੈਕਸ ਕ੍ਰੈਡਿਟ (ਆਈ ਟੀ ਸੀ) ਦਾ ਲਾਭ ਲੈ ਰਹੇ ਸਨ। ਵਿਭਾਗ ਵੱਲੋਂ ਬੀਤੇ ਦਿਨੀਂ ਐਂਟੀ ਐਵੀਏਸ਼ਨ ਟੀਮ ਨੇ ਤਲਾਸ਼ੀ ਮੁਹਿੰਮ ਹੇਠ ਕੁਝ ਗੁਪਤ ਦਸਤਾਵੇਜ਼ ਤੇ ਰਿਕਾਰਡ ਬਰਾਮਦ ਕਰ ਕੇ ਕੇਸ ਦਰਜ ਕੀਤੇ ਸਨ।