ਟੋਕੀਉ, 7 ਜੁਲਾਈ (ਪੋਸਟ ਬਿਊਰੋ)- ਦੱਖਣੀ ਜਾਪਾਨ ਵਿੱਚ ਹੜ੍ਹ ਅਤੇ ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਵਿੱਚ ਕੱਲ੍ਹ ਘੱਟੋ-ਘੱਟ 40 ਲੋਕਾਂ ਦੀ ਮੌਤ ਹੋ ਗਈ। ਕਈ ਹਾਲੇ ਵੀ ਹੜ੍ਹਪੀੜਤ ਇਲਾਕਿਆਂ ਵਿੱਚ ਫਸੇ ਹੋਏ ਹਨ ਅਤੇ ਮਦਦ ਦਾ ਇੰਤਜ਼ਾਰ ਕਰ ਰਹੇ ਹਨ। ਕੁਮਾਮੋਟੋ ਤੋਂ ਕਈ ਲੋਕਾਂ ਨੂੰ ਹੈਲੀਕਾਪਟਰ ਅਤੇ ਕਿਸ਼ਤੀਆਂ ਰਾਹੀਂ ਬਾਹਰ ਕਢਿਆ। ਰਖਿਅਕ ਅਤੇ ਫ਼ਾਇਰ ਵਿਭਾਗ ਦੇ 40,000 ਤੋਂ ਵਧੇਰੇ ਕਰਮਚਾਰੀ ਬਚਾਅ ਕੰਮ ਵਿੱਚ ਜੁਟੇ ਹੋਏ ਹਨ। ਮੌਸਮ ਏਜੰਸੀ ਨੇ ਉਤਰੀ ਕਯੂਸ਼ੂ ਦੇ ਤਿੰਨ ਖੇਤਰਾਂ ਵਿੱਚ ਭਾਰੀ ਮੀਂਹ ਦੀ ਚਿਤਾਵਨੀ ਜਾਰੀ ਕੀਤੀ ਹੈ।
ਕੁਮਾ ਨਦੀ ਨਾਲ ਲੱਗਦੇ ਇਲਾਕੇ ਦਾ ਵੱਡਾ ਹਿੱਸਾ ਹੜ੍ਹ ਵਿੱਚ ਰੁੜ੍ਹ ਗਿਆ ਹੈ। ਕੁਮਾ ਦੇ ਇੱਕ ਬਿਰਧ ਆਸ਼ਰਮ ਵਿੱਚ 14 ਲੋਕਾਂ ਦੇ ਮਾਰੇ ਜਾਣ ਦਾ ਖਦਸ਼ਾ ਹੈ। ਇਥੇ ਬਚਾਅ ਮੁਹਿੰਮ ਕੱਲ੍ਹ ਵੀ ਜਾਰੀ ਰਹੀ। ਹੜ੍ਹ ਅਤੇ ਜ਼ਮੀਨ ਖਿਸਕਣ ਕਾਰਨ ਸੇਂਜੁਏਨ ਦੇਖਭਾਲ ਕੇਂਦਰ ਵਿੱਚ ਰਹਿੰਦੇ ਕਰੀਬ 65 ਲੋਕ ਤੇ ਉਨ੍ਹਾਂ ਦੀ ਦੇਖਭਾਲ ਕਰਨ ਵਾਲੇ 30 ਵਿਅਕਤੀ ਉਥੇ ਫਸ ਗਏ ਸਨ। ਇਸ ਤੋਂ ਬਾਅਦ ਉਥੇ ਫਸੇ ਰਹਿ ਗਏ ਬਾਕੀ 51 ਲੋਕਾਂ ਨੂੰ ਕੱਲ੍ਹ ਬਚਾ ਲਿਆ ਗਿਆ। ਸਥਾਨਕ ਰਾਫ਼ਟਿੰਗ ਕੰਪਨੀ ਦੇ ਸੰਚਾਲਕ ਸ਼ੀਗੇਮਿਸਤੋ ਨੇ ਦਸਿਆ ਕਿ ਕੁੱਲ 18 ਲੋਕ ਮਾਰੇ ਗਏ ਹਨ ਜਦਕਿ 16 ਹੋਰ ਲੋਕਾਂ ਦੇ ਮਾਰੇ ਜਾਣ ਦਾ ਖਦਸ਼ਾ ਹੈ। ਉਥੇ ਕੱਲ੍ਹ ਦੁਪਹਿਰ ਤੱਕ ਹੋਰ 14 ਲੋਕ ਲਾਪਤਾ ਸਨ। ਫ਼ਾਇਰ ਅਤੇ ਆਫ਼ਤ ਪ੍ਰਬੰਧਨ ਏਜੰਸੀ ਮੁਤਾਬਕ ਕੋਈ ਲੋਕ ਹਾਲੇ ਵੀ ਹੜ੍ਹਪੀੜਤ ਇਲਾਕਿਆਂ ਵਿੱਚ ਫਸੇ ਹੋਏ ਹਨ ਅਤੇ ਮਦਦ ਦਾ ਇੰਤਜ਼ਾਰ ਕਰ ਰਹੇ ਹਨ।