ਦੁਬਈ, 7 ਜੁਲਾਈ (ਪੋਸਟ ਬਿਊਰੋ)- ਆਰਥਿਕ ਨੀਤੀਆਂ 'ਤੇ ਵਧਦੀ ਅਸੰਤੁਸ਼ਟੀ ਕਾਰਨ ਈਰਾਨੀ ਪਾਰਲੀਮੈਂਟ ਦੇ ਕੁਝ ਕੱਟੜਪੰਥੀ ਮੈਂਬਰਾਂ ਨੇ ਰਾਸ਼ਟਰਪਤੀ ਹਸਨ ਰੂਹਾਨੀ ਨੂੰ ਪੁੱਛਗਿੱਛ ਲਈ ਬੁਲਾਉਣ ਦੀ ਯੋਜਨਾ ਬਣਾਈ ਹੈ।
ਵਿਸ਼ਲੇਸ਼ਕਾਂ ਦੇ ਮੁਤਾਬਕ ਇਹ ਕਦਮ ਅੱਗੇ ਚੱਲ ਕੇ ਰਾਸ਼ਟਰਪਤੀ ਰੂਹਾਨੀ ਦੇ ਖਿਲਾਫ ਮਹਾਦੋਸ਼ ਦਾ ਰੂਪ ਧਾਰਨ ਕਰ ਸਕਦਾ ਹੈ। ਵਰਨਣ ਯੋਗ ਹੈ ਕਿ 2018 ਵਿੱਚ ਅਮਰੀਕੀ ਪਾਬੰਦੀਆਂ ਫਿਰ ਲਾਗੂ ਹੋਣ ਦੇ ਨਾਲ ਈਰਾਨੀ ਲੋਕਾਂ ਦੀ ਰੋਜ਼ਾਨਾ ਦੀ ਜ਼ਿੰਦਗੀ ਕਾਫੀ ਮੁਸ਼ਕਲ ਹੋ ਗਈ ਹੈ। ਇਹੀ ਨਹੀਂ ਵਧਦੀ ਮਹਿੰਗਾਈ, ਬੇਰੁਜ਼ਗਾਰੀ ਤੇ ਮੰਦੀ ਨਾਲ ਦੇਸ਼ ਦੀ ਅਰਥ ਵਿਵਸਥਾ ਦਾ ਵੀ ਕਾਫੀ ਨੁਕਸਾਨ ਹੋਇਆ ਹੈ। ਈਰਾਨ ਦੀ ਅਰਧ ਸਰਕਾਰੀ ਨਿਊਜ਼ ਏਜੰਸੀ ਤਸਨੀਮ ਮੁਤਾਬਕ ਰਾਸ਼ਟਰਪਤੀ ਹਸਨ ਰੂਹਾਨੀ ਨੂੰ ਪੁੱਛਗਿੱਛ ਲਈ ਬੁਲਾਉਣ ਵਾਲੇ ਮਤੇ ਉੱਤੇ 290 ਵਿੱਚੋਂ 120 ਪਾਰਲੀਮੈਂਟ ਮੈਂਬਰਾਂ ਨੇ ਦਸਖਤ ਕੀਤੇ ਹਨ ਅਤੇ ਇਹ ਪਾਰਲੀਮੈਂਟ ਦੇ ਪ੍ਰਧਾਨਗੀ ਬੋਰਡ ਨੂੰ ਸੌਂਪ ਦਿੱਤਾ ਗਿਆ ਹੈ। ਜੇ ਬੋਰਡ ਇਸ ਨੂੰ ਮਨਜ਼ੂਰੀ ਦੇ ਦਿੰਦਾ ਹੈ ਤਾਂ ਰਾਸ਼ਟਰਪਤੀ ਰੂਹਾਨੀ ਨੂੰ ਪਾਰਲੀਮੈਂਟ 'ਚ ਪੇਸ਼ ਹੋ ਕੇ ਮੈਂਬਰਾਂ ਵੱਲੋਂ ਪੁੱਛੇ ਸਵਾਲਾਂ ਦੇ ਜਵਾਬ ਦੇਣੇ ਪੈਣਗੇ। ਮਾਹਰਾਂ ਦਾ ਕਹਿਣਾ ਹੈ ਕਿ ਸਰਬਉਚ ਨੇਤਾ ਅਯਾਤੁੱਲਾ ਖੁਮੇਨੀ ਵੱਲੋਂ ਸਰਕਾਰ ਦੇ ਸਾਰੇ ਅੰਗਾਂ 'ਚ ਏਕਤਾ ਦੇ ਸੱਦੇ ਦੌਰਾਨ ਇਸ ਗੱਲ ਦੀ ਉਮੀਦ ਘੱਟ ਹੈ ਕਿ ਪ੍ਰਧਾਨਗੀ ਬੋਰਡ ਇਸ ਮਤੇ ਨੂੰ ਮਨਜ਼ੂਰੀ ਦੇਵੇਗਾ।
ਪਾਰਲੀਮੈਂਟ ਨੇ ਇਸੇ ਤਰ੍ਹਾਂ ਦਾ ਇਕ ਕਦਮ ਰੂਹਾਨੀ ਤੋਂ ਪਹਿਲੇ ਨੇਤਾ ਖਿਲਾਫ ਵੀ ਚੁੱਕਿਆ ਸੀ, ਪਰ ਖੁਮੇਨੀ ਨੇ ਆਪਣੀਆਂ ਸ਼ਕਤੀਆਂ ਦੀ ਵਰਤੋਂ ਕਰ ਕੇ ਇਸ ਨੂੰ ਰੋਕ ਦਿੱਤਾ ਸੀ। ਪਹਿਲੀ ਵਾਰ ਹਸਨ ਰੂਹਾਨੀ ਸਾਲ 2013 ਵਿੱਚ ਰਾਸ਼ਟਰਪਤੀ ਚੁਣੇ ਗਏ ਸਨ ਤੇ ਸਾਲ 2017 ਵਿੱਚ ਉਨ੍ਹਾਂ ਨੂੰ ਫਿਰ ਤੋਂ ਇਸ ਅਹੁਦੇ ਲਈ ਚੁਣ ਲਿਆ ਗਿਆ। ਮਾਹਰਾਂ ਦਾ ਕਹਿਣਾ ਹੈ ਕਿ ਕੱਟੜਪੰਥੀ ਖਾਮਨੇਈ ਰੂਹਾਨੀ ਦੇ ਕਮਜ਼ੋਰ ਹੋਣ ਤੋਂ ਖੁਸ਼ ਹੋ ਸਕਦੇ ਹਨ, ਪਰ ਉਹ ਰਾਸ਼ਟਰਪਤੀ ਨੂੰ ਅਹੁਦੇ ਤੋਂ ਹਟਾ ਕੇ ਇਸਲਾਮੀ ਗਣਤੰਤਰ ਨੂੰ ਨੁਕਸਾਨ ਪਹੁੰਚਾਉਣਾ ਚਾਹੁਣਗੇ।