ਇਸ ਫਰਵਰੀ ਵਿੱਚ ਕਾਰਤਿਕ ਆਰੀਆ ਨੇ ਫਿਲਮ ‘ਤਾਨਾਜੀ-ਦ ਅਨਸੰਗ ਵਾਰੀਅਰ' ਦੇ ਡਾਇਰੈਕਟਰ ਓਮ ਰਾਉਤ ਨਾਲ ਆਪਣੀ ਪਹਿਲੀ ਐਕਸ਼ਨ ਫਿਲਮ ਦਾ ਐਲਾਨ ਕੀਤਾ ਸੀ। ‘ਪਤੀ-ਪਤਨੀ ਔਰ ਵੋ’, ‘ਲਵ ਆਜਕੱਲ੍ਹ’ ਅਤੇ ‘ਲੁਕਾਛਿਪੀ’ ਵਰਗੀਆਂ ਫਿਲਮਾਂ ਨਾਲ ਲਵ ਬੁਆਏ ਦਾ ਅਕਸ ਬਣਾ ਚੁੱਕੇ ਕਾਰਤਿਕ ਦੀ ਇਸ ਐਕਸ਼ਨ ਫਿਲਮ ਉੱਤੇ ਕੋਰੋਨਾ ਦਾ ਗ੍ਰਹਿਣ ਲੱਗਦਾ ਦਿਖਾਈ ਦੇ ਰਿਹਾ ਹੈ। ਖਬਰ ਹੈ ਕਿ ਇਸ ਫਿਲਮ ਨੂੰ ਠੰਢੇ ਬਸਤੇ ਵਿੱਚ ਪਾ ਦਿੱਤਾ ਗਿਆ ਹੈ। ਫਿਲਮ ਨੂੰ ਰੋਕਣ ਦਾ ਮੁੱਖ ਕਾਰਨ ਇਸ ਵਿੱਚ ਵਿਦੇਸ਼ ਦੀਆਂ ਬਹੁਤ ਸਾਰੀਆਂ ਲੋਕੇਸ਼ਨਾਂ ਸਨ। ਮੌਜੂਦਾ ਸਥਿਤੀ ਨੂੰ ਦੇਖਦੇ ਹੋਏ ਵਿਦੇਸ਼ ਵਿੱਚ ਲੋਕੇਸ਼ਨ 'ਤੇ ਸ਼ੂਟਿੰਗ ਕਰ ਸਕਣੀ ਮੁਸ਼ਕਲ ਹੈ। ਇਸ ਲਈ ਫਿਲਮ ਦੇ ਨਿਰਮਾਤਾ ਭੂਸ਼ਣ ਕੁਮਾਰ ਅਤੇ ਡਾਇਰੈਕਟਰ ਓਮ ਨੇ ਹਾਲਾਤ ਨਾਰਮਲ ਹੋਣ ਤੱਕ ਇਸ ਦਾ ਕੰਮ ਰੋਕਣ ਦਾ ਫੈਸਲਾ ਕੀਤਾ ਹੈ।
ਜਾਣਕਾਰ ਸੂਤਰਾਂ ਮੁਤਬਾਕ ਫਿਲਮ ਦੇ ਕੁਝ ਹਿੱਸਿਆਂ ਨੂੰ ਹਾਂਗਕਾਂਗ ਅਤੇ ਕੁਝ ਹੋਰਨਾਂ ਦੇਸ਼ਾਂ ਵਿੱਚ ਫਿਲਮਾਇਆ ਜਾਣਾ ਸੀ। ਡਾਇਰੈਕਟਰ ਓਮ ਫਿਲਮ ਦੀ ਗੁਣਵੱਤਾ ਦੇ ਨਾਲ ਕੋਈ ਸਮਝੌਤਾ ਨਹੀਂ ਕਰਨਾ ਚਾਹੁੰਦੇ, ਇਸ ਲਈ ਫਿਲਹਾਲ ਇਹ ਕੰਮ ਰੋਕ ਦਿੱਤਾ ਗਿਆ ਹੈ। ਬਦਲੇ ਹੋਏ ਮਾਹੌਲ ਨੂੰ ਦੇਖ ਕੇ ਇੱਕ ਵਾਰ ਫਿਰ ਫਿਲਮ ਦੀ ਸਕ੍ਰਿਪਟ ਵਿੱਚ ਬਦਲਾਅ ਕੀਤਾ ਜਾ ਰਿਹਾ ਹੈ। ਕਾਰਤਿਕ ਦੀ ਇਹ ਪਹਿਲੀ ਥ੍ਰੀ ਡੀ ਐਕਸ਼ਨ ਫਿਲਮ ਹੋਵੇਗੀ। ਉਹ ਫਿਲਮ ‘ਭੂਲ ਭੁਲੱਈਆਂ 2’ ਅਤੇ ‘ਦੋਸਤਾਨਾ 2’ ਵਰਗੀਆਂ ਫਿਲਮਾਂ ਵਿੱਚ ਨਜ਼ਰ ਆਉਣਗੇ।