ਨਵੀਂ ਦਿੱਲੀ/ ਬੀਜਿੰਗ, 6 ਜੁਲਾਈ, (ਪੋਸਟ ਬਿਊਰੋ)- ਪੂਰਬੀ ਲੱਦਾਖ ਵਿੱਚ ਬੀਤੇ ਦੋ ਮਹੀਨਿਆਂ ਤੋਂ ਭਾਰਤ-ਚੀਨ ਵਿੱਚ ਚੱਲਦੇ ਫੌਜੀ ਤਣਾਅ ਨੂੰ ਦੂਰ ਕਰਨ ਲਈ ਕੋਰ ਕਮਾਂਡਰਾਂ ਦੀ ਪਿਛਲੇ ਹਫਤੇ ਹੋਈ ਗੱਲਬਾਤ ਤੋਂ ਬਾਅਦ ਭਾਰਤ ਅਤੇ ਚੀਨ ਨੇ ਸਹਿਮਤੀ ਮੁਤਾਬਕ ਆਪਣੇ ਫੌਜੀਆਂ ਨੂੰ ਪਿੱਛੇ ਹਟਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਅੱਜ ਚੀਨ ਨੇ ਆਪਣੀ ਫੌਜ ਕਰੀਬ ਡੇਢ ਕਿਲੋਮੀਟਰ ਪਿੱਛੇ ਹਟਾ ਲਈ ਹੈ ਤੇ ਇਸ ਦੀ ਪੁਸ਼ਟੀ ਚੀਨ ਸਰਕਾਰ ਨੇ ਵੀ ਕੀਤੀ ਹੈ।
ਭਾਰਤ ਸਰਕਾਰ ਦੇ ਰੱਖਿਆ ਮਹਿਕਮੇ ਦੇ ਸੂਤਰਾਂ ਨੇ ਦੱਸਿਆ ਕਿ ਗਲਵਾਨ ਘਾਟੀ ਵਿੱਚ ਪੈਟਰੋਲ ਪੁਆਇੰਟ-14 ਤੋਂ ਚੀਨੀ ਫੌਜੀਆਂ ਨੂੰ ਟੈਂਟ ਅਤੇ ਹੋਰ ਚੀਜਾਂ ਨੂੰ ਹਟਾਉਂਦੇ ਦੇਖਿਆ ਗਿਆ ਹੈ। ਇਸ ਇਲਾਕੇ ਦੇ ਨਾਲ ਹੀ ਹਾਟਸਪ੍ਰਿੰਗ ਅਤੇ ਗੋਗਰਾ ਖੇਤਰਾਂ ਵਿੱਚ ਵੀ ਚੀਨੀ ਫੌਜਾਂ ਅਤੇ ਵਾਹਨਾਂ ਦੀਆਂ ਗਤੀਵਿਧੀਆਂ ਦੇਖੀਆਂ ਗਈਆਂ, ਜਿਹੜੇ ਪਿੱਛੇ ਹਟ ਰਹੇ ਸਨ। ਇਨ੍ਹਾਂ ਉੱਚ ਪੱਧਰੀ ਸੂਤਰਾਂ ਨੇ ਕਿਹਾ ਕਿ ਗਲਵਾਨ ਘਾਟੀ ਵਿੱਚ ਪੈਟਰੋਲ ਪੁਆਇੰਟ-14 ਤੋਂ ਤੰਬੂਆਂ ਅਤੇ ਹੋਰ ਢਾਂਚਿਆਂ ਅਤੇ ਫੌਜਾਂ ਦੇ ਪਿੱਛੇ ਹਟਣ ਤੋਂ ਸੰਕੇਤ ਹੈ ਕਿ ਉਹ ਇਲਾਕੇ ਵਿੱਚ ਡੇਢ ਕਿਲੋਮੀਟਰ ਤੋਂ ਵੱਧ ਪਿੱਛੇ ਹਟ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਅਜੇ ਇਹ ਪਤਾ ਲਾਉਣਾ ਸੰਭਵ ਨਹੀਂ ਕਿ ਚੀਨੀ ਫੌਜੀ ਕਿੰਨੇ ਦੂਰ ਪਿੱਛੇ ਹਟੇ ਹਨ, ਕਿਉਂਕਿ ਸਮੁੱਚੀ ਜਾਣਕਾਰੀ ਇਸ ਪ੍ਰਕਿਰਿਆ ਦੇ ਪੂਰੀ ਹੋਣ ਤੋਂ ਬਾਅਦ ਮਿਲੇਗੀ। ਗਲਵਾਨ ਘਾਟੀ ਵਿੱਚ ਹਿੰਸਕ ਝੜਪ ਪੈਟਰੋਲ ਪੁਆਇੰਟ-14 ਕੋਲ ਚੀਨ ਵਲੋਂ ਸਰਵੇਲਾਂਸ ਚੌਕੀ ਬਣਾਉਣ ਵੇਲੇ ਭਾਰਤੀ ਫੌਜੀਆਂ ਦੇ ਵਿਰੋਧ ਕਰਨ ਕਰ ਕੇ ਹੋਈ ਸੀ। ਇਸ ਦਾ ਹਾਲੇ ਪਤਾ ਨਹੀਂ ਲੱਗ ਸਕਿਆ ਕਿ ਤਣਾਅ ਘੱਟ ਕਰਨ ਦੀ ਇਹ ਪਹਿਲ ਪੈਂਗੋਂਗ ਤਸੋ ਇਲਾਕੇ, ਅਤੇ ਖਾਸ ਕਰਕੇ ਫਿੰਗਰ ਫੋਰ ਅਤੇ ਫਿੰਗਰ 8 ਖੇਤਰ ਵਿਚ, ਜਿੱਥੇ ਚੀਨ ਨੇ ਕਾਫੀ ਹੱਦ ਤੱਕ ਆਪਣੀ ਫੌਜ ਵਧਾ ਲਈ ਸੀ, ਵਿੱਚ ਵੀ ਸ਼ੁਰੂ ਹੋਈ ਹੈ ਜਾਂ ਨਹੀਂ।
ਦੂਸਰੇ ਪਾਸੇ ਅੱਜ ਚੀਨ ਨੇ ਇਹ ਮੰਨਿਆ ਹੈ ਕਿ ਭਾਰਤ ਦੇ ਕੇਂਦਰੀ ਸ਼ਾਸਤ ਰਾਜ ਲੱਦਾਖ ਦੇ ਨੇੜੇ ਅਸਲ ਕੰਟਰਲ ਰੇਖਾ ਉੱਤੇ ਦੋਵਾਂ ਦੇਸ਼ਾਂ ਵੱਲੋਂ ਫੌਜਾਂ ਦਾ ਤਨਾਅ ਘਟਾਉਣ ਦੀ ਮਹੱਤਵ ਪੂਰਨ ਪਹਿਲ ਹੋਈ ਹੈ। ਚੀਨੀ ਵਿਦੇਸ਼ ਮੰਤਰਾਲਾ ਨੇ ਇਕ ਬਿਆਨ ਜਾਰੀ ਕਰ ਕੇ ਕਿਹਾ ਕਿ ਭਾਰਤ ਅਤੇ ਚੀਨ ਦੇ ਫੌਜੀ ਕਮਾਂਡਰਾਂ ਵਿਚਾਲੇ ਗੱਲਬਾਤ ਹੋਈ ਹੈ ਅਤੇ ਤਣਾਅ ਨੂੰ ਘਟਾਉਣ ਦੀ ਦਿਸ਼ਾ ਵਿੱਚ ਪ੍ਰਭਾਵੀ ਕਦਮ ਚੁੱਕੇ ਜਾ ਰਹੇ ਹਨ।