ਜੈਤੋ, 6 ਜੁਲਾਈ (ਪੋਸਟ ਬਿਊਰੋ)- ਭਾਰਤ ਦੇ ਵੱਖ-ਵੱਖ ਕਪਾਹ ਉਤਪਾਦਨ ਸੂਬਿਆਂ ਦੀਆਂ ਮੰਡੀਆਂ 'ਚ ਚਾਲੂ ਕਪਾਹ ਸੀਜ਼ਨ ਸਾਲ 2019-20 'ਚ ਹਾਲੇ ਤੱਕ ਕਰੀਬ 3.52 ਕਰੋੜ ਗੰਢ ਦੀ ਆਮਦ ਦੀ ਸੂਚਨਾ ਮਿਲੀ ਹੈ। ਦੇਸ਼ ਵਿੱਚ ਅੱਜ ਤੱਕ ਆਈ ਕੁਲ ਕਪਾਹ ਵਿੱਚ ਪੰਜਾਬ ਦੀਆਂ 9,51,000 ਗੰਢਾਂ, ਹਰਿਆਣਾ ਵਿੱਚ 24,46,900, ਸ਼੍ਰੀਗੰਗਾਨਗਰ-ਹਨੁਮਾਨਗੜ੍ਹ ਸਰਕਲ 18,67,000 ਤੇ ਲੋਅਰ ਰਾਜਸਥਾਨ ਭੀਲਵਾੜਾ ਖੇਤਰ ਸਮੇਤ 14,21,400 ਗੰਢਾਂ ਸ਼ਾਮਲ ਹਨ। ਭਾਰਤ ਵਿੱਚ ਰੋਜ਼ਾਨਾ ਕਪਾਹ ਆਮਦ ਦੇ ਵੱਖ-ਵੱਖ ਅੰਕੜੇ 40000 ਤੋਂ 60000 ਗੰਢਾਂ ਦੇ ਆ ਰਹੇ ਹਨ। ਏਥੇ ਕਪਾਹ ਦੀ ਕੋਈ ਕਮੀ ਨਹੀਂ, ਸਗੋਂ ਮਿੱਲਾਂ ਦੀ ਖਪਤ ਨਾਲੋਂ ਲੱਖਾਂ ਗੰਢਾਂ ਸਰਪਲੱਸ ਹਨ।
ਸਮਝਿਆ ਜਾਂਦਾ ਹੈ ਕਿ ਭਾਰਤ ਵਿੱਚ 30-32 ਲੱਖ ਗੰਢਾਂ ਦੀ ਆਮਦ ਹੋਰ ਮੰਡੀਆਂ 'ਚ ਹੋ ਸਕਦੀ ਹੈ, ਪਰ ਇਹ ਗੱਲ ਰੂੰ ਵਪਾਰ ਦੇ ਤੇਜੜੀਆਂ ਦੇ ਗਲੇ ਨਹੀਂ ਉਤਰ ਰਹੀ। ਇਸ 'ਤੇ ਰੂੰ ਬਾਜ਼ਾਰ ਨੇ ਰੇਟ ਘਟਾ ਕੇ ਰਾਜਸਥਾਨ ਵਿਚਲੇ ਰੂੰ ਦਾ ਕਾਰੋਬਾਰ 3430 ਅਤੇ 3380 ਰੁਪਏ ਪ੍ਰਤੀ ਮਣ ਹੋਣ ਨਾਲ ਰੂੰ ਤੇਜੜੀਆਂ (ਸਟਾਕਿਸਟਾਂ) ਵਿੱਚ ਹਲਚਲ ਮੱਚ ਗਈ ਹੈ, ਪਰ ਇਹ ਮੰਦੀ ਜ਼ਿਆਦਾ ਦਿਨ ਨਹੀਂ ਟਿਕ ਸਕੀ ਅਤੇ ਭਾਅ ਫਿਰ ਕੁਝ ਸੁਧਰ ਗਏ।
ਕਤਾਈ ਮਿੱਲਾਂ ਦੀ ਮੰਗ ਕਈ ਮਹੀਨਿਆਂ ਤੋਂ ਢਿੱਲੀ ਹੈ ਕਿਉਂਕਿ ਮਿੱਲਾਂ ਦਾ ਧਾਗਾ ਖੁੱਲ੍ਹ ਕੇ ਨਹੀਂ ਵਿਕ ਰਿਹਾ। ਇਸ ਨਾਲ ਟੈਕਸਟਾਈਲਜ਼ ਉਦਯੋਗ ਨੂੰ ਪੈਸੇ ਦੀ ਤੰਗੀ ਸਤਾ ਰਹੀ ਹੈ, ਜਿਸ ਨਾਲ ਇਸ ਉਦਯੋਗ ਦੀ ਹਾਲਤ ਪਤਲੀ ਹੋ ਗਈ ਹੈ। ਜਾਣਕਾਰ ਸੂਤਰਾਂ ਅਨੁਸਾਰ ਕਤਾਈ ਮਿੱਲਾਂ ਦੀ ਇੰਨੀ ਖਸਤਾ ਆਰਥਿਕ ਹਾਲਤ ਹੋਈ ਹੈ ਕਿ 75-80 ਫੀਸਦੀ ਮਿੱਲਾਂ ਉਧਾਰ 'ਤੇ ਚਲਣ ਦੀ ਸੂਚਨਾ ਹੈ। ਕੱਪੜਾ ਮੰਤਰਾਲਾ ਅਨੁਸਾਰ ਦੇਸ਼ 'ਚ ਸਭ ਤੋਂ ਵੱਧ ਰੋਜ਼ਗਾਰ ਟੈਕਸਟਾਈਲਜ਼ ਉਦਯੋਗ ਦਿੰਦਾ ਹੈ ਪਰ ਵੱਡੀ ਅਫਸੋਸ ਅਤੇ ਹੈਰਾਨੀ ਜਨਕ ਗੱਲ ਹੈ ਕਿ ਦੇਸ਼ 'ਚ ਸਭ ਤੋਂ ਜ਼ਿਆਦਾ ਰੋਜ਼ਗਾਰ ਦੇਣ ਵਾਲਾ ਉਦਯੋਗ ਖੁਦ ਬੀਮਾਰ ਹੋ ਚੁੱਕਾ ਹੈ। ਪੀ ਐਮ ਓ ਅਤੇ ਕੱਪੜਾ ਮੰਤਰਾਲਾ ਟੈਕਸਟਾਈਲਜ਼ ਉਦਯੋਗ ਦੀ ਮੌਜੂਦਾ ਹਾਲਤ ਨਾਲ ਸਭ ਕੁਝ ਜਾਣਦੇ ਹੋਏ ਵੀ ਅਣਜਾਣ ਬਣੇ ਹੋਏ ਹਨ।