ਬੱਸੀ ਪਠਾਣਾਂ, 6 ਜੁਲਾਈ (ਪੋਸਟ ਬਿਊਰੋ)- ਭਾਰਤ ਅਤੇ ਚੀਨ ਵਿਚਾਲੇ ਪਿਛਲੇ ਕਈ ਦਿਨਾਂ ਤੋਂ ਚੱਲਦੇ ਖ਼ਰਾਬ ਸਬੰਧਾਂ ਕਾਰਨ ਨਰਿੰਦਰ ਮੋਦੀ ਸਰਕਾਰ ਨੇ ਚਾਈਨੀਜ਼ ਐਪ ‘ਟਿਕ-ਟਾਕ' ਸਮੇਤ 59 ਐਪਸ 'ਤੇ ਪੰਜਾਬੀ ਲਾ ਦਿੱਤੀ ਸੀ, ਜਿਸ ਤੋਂ ਬਾਅਦ ਟਿਕ-ਟਾਕ ਦੇ ਯੂਜ਼ਰਜ਼ ਦਾ ਦਿਲ ਟੁੱਟ ਗਿਆ ਸੀ।
ਕਈ ਯੂਜ਼ਰਜ਼ ਵੱਲੋਂ ਦੀ ਰੋਂਦਿਆਂ ਦੀਆਂ ਪੋਸਟਾਂ ਵੀ ਦੇਖਣ ਨੂੰ ਮਿਲੀਆਂ ਤੇ ਕਈ ਯੂਜ਼ਰਜ਼ ਨੇ ਕੇਂਦਰ ਸਰਕਾਰ ਤੋਂ ਟਿਕ-ਟਾਕ 'ਤੇ ਪਾਬੰਦੀ ਨਾ ਲਾਉਣ ਦੀ ਫ਼ਰਿਆਦ ਕੀਤੀ ਸੀ। ਭਾਰਤ ਦੀ ਜੁਗਾੜੂ ਤਕਨੀਕ ਤੋਂ ਹਰ ਦੇਸ਼ ਦੇ ਲੋਕ ਵਾਕਿਫ਼ ਹਨ ਤੇ ਇਸੇ ਤਕਨੀਕ ਦਾ ਸਹਾਰਾ ਲੈ ਕੇ ਬੱਸੀ ਪਠਾਣਾਂ ਦੇ ਕੁਝ ਨੌਜਵਾਨਾਂ ਨੇ ਬੰਦ ਪਏ ਟਿਕ-ਟਾਕ ਨੂੰ ਮੁੜ ਚਾਲੂ ਕਰ ਲਿਆ ਹੈ ਅਤੇ ਉਹ ਇਸ ਦੀਆਂ ਵੀਡੀਓਜ਼ ਦਾ ਲੁਤਫ਼ ਉਠਾ ਰਹੇ ਹਨ।
ਬੱਸੀ ਪਠਾਣਾਂ ਦੇ ਕੁਝ ਨੌਜਵਾਨਾਂ ਨੇ ਆਪਣਾ ਨਾਂ ਨਾ ਛਾਪਣ ਦੀ ਸ਼ਰਤ ਉੱਤੇ ਮੀਡੀਆ ਨੂੰ ਦੱਸਿਆ ਕਿ ਜਿਹੜੇ ਯੂਜ਼ਰਜ਼ ਨੇ ਟਿਕ-ਟਾਕ ਅਨਇੰਸਟਾਲ ਜਾਂ ਡਿਲੀਟ ਕਰ ਦਿੱਤਾ ਹੈ, ਉਨ੍ਹਾਂ ਦੇ ਮੋਬਾਈਲ ਵਿੱਚ ਇਹ ਨਹੀਂ ਚੱਲੇਗੀ, ਪਰ ਜਿਨ੍ਹਾਂ ਨੇ ਅਜੇ ਤੱਕ ਟਿਕ-ਟਾਕ ਐਪ ਡਿਲੀਟ ਨਹੀਂ ਕੀਤਾ, ਉਨ੍ਹਾਂ ਦਾ ਇਹ ਐਪ ਫਿਰ ਚੱਲ ਸਕਦਾ ਹੈ, ਜਿਸ ਲਈ ਕੁਝ ਤਬਦੀਲੀਆਂ ਕਰਨੀਆਂ ਪੈਂਦੀਆਂ ਹਨ, ਇਸ ਤੋਂ ਬਾਅਦ ਇਹ ਐਪ ਫ਼ਿਰ ਸ਼ੁਰੂ ਹੋ ਜਾਵੇਗਾ। ਇਹੀ ਨਹੀਂ, ਇਸ 'ਚ ਨਵੇਂ ਵੀਡੀਓਜ਼ ਵੀ ਅਪਲੋਡ ਹੋ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਇਹ ਐਪ ਸ਼ੁਰੂ ਕਰਨ ਦੀ ਪ੍ਰਕਿਰਿਆ ਇਸ ਕਰ ਕੇ ਪੂਰੀ ਨਹੀਂ ਦੱਸ ਸਕਦੇ ਕਿ ਸਰਕਾਰ ਨੇ ਇਸ 'ਤੇ ਪਾਬੰਦੀ ਲਾਈ ਹੈ ਤੇ ਪ੍ਰਕਿਰਿਆ ਦਾ ਪਤਾ ਲੱਗਣ 'ਤੇ ਹਰ ਕੋਈ ਇਸ ਦੀ ਵਰਤੋਂ ਕਰਨ ਲੱਗ ਪਵੇਗਾ, ਜੋ ਦੇਸ਼ ਦੇ ਹਿੱਤ 'ਚ ਨਹੀਂ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੇ ਇੱਕ ਤਰ੍ਹਾਂ ਐਪ ਨਾਲ ਪੰਗਾ ਲੈਂਦੇ ਹੋਏ ਜੁਗਾੜ ਕਰ ਕੇ ਇਸ ਨੂੰ ਚਲਾ ਲਿਆ ਹੈ, ਪਰ ਉਹ ਸਰਕਾਰ ਤੋਂ ਮੰਗ ਕਰਦੇ ਹਨ ਕਿ ਇਸ ਐਪ ਨੂੰ ਏਦਾਂ ਬੰਦ ਕੀਤਾ ਜਾਵੇ ਕਿ ਇਸ ਨੂੰ ਸ਼ੁਰੂ ਕਰਨ 'ਚ ਕੋਈ ਵੀ ਜੁਗਾੜ ਕੰਮ ਨਾ ਕਰ ਸਕੇ ਤੇ ਲੋਕ ਦੇਸ਼ ਹਿੱਤ 'ਚ ਇੱਕਜੁੱਟ ਹੋ ਸਕਣ।