ਯੇਰੂਸ਼ਲਮ, 6 ਜੁਲਾਈ (ਪੋਸਟ ਬਿਊਰੋ)- ਈਰਾਨ ਦੇ ਨਤਾਂਜ ਐਟਮੀ ਕੇਂਦਰ ਵਿੱਚ ਹੋਏ ਧਮਾਕੇ ਬਾਰੇ ਇਜ਼ਰਾਈਲ ਨੇ ਸਫਾਈ ਦਿੱਤੀ ਕਿ ਈਰਾਨ ਵਿੱਚ ਹੁੰਦੀ ਹਰ ਰਹੱਸਮਈ ਘਟਨਾ ਲਈ ਉਸ ਨੂੰ ਦੋਸ਼ੀ ਠਹਿਰਾਉਣਾ ਠੀਕ ਨਹੀਂ।
ਅਸਲ ਵਿੱਚ ਈਰਾਨੀ ਅਧਿਕਾਰੀਆਂ ਦਾ ਕਹਿਣਾ ਸੀ ਕਿ ਇਹ ਧਮਾਕਾ ਇੱਕ ਸਾਈਬਰ ਹਮਲੇ ਦਾ ਨਤੀਜਾ ਸੀ। ਕੱਲ੍ਹ ਇਸ ਅੰਡਰਗਰਾਊਂਡ ਯੂਰੇਨੀਅਮ ਵਿਕਾਸ ਕੇਂਦਰ ਦੇ ਇੱਕ ਹਿੱਸੇ ਵਿੱਚ ਧਮਾਕੇ ਤੋਂ ਬਾਅਦ ਅੱਗ ਲੱਗ ਗਈ ਸੀ। ਇਜ਼ਰਾਈਲੀ ਰੇਡੀਓ ਵੱਲੋਂ ਇੱਕ ਸਵਾਲ ਦੇ ਜਵਾਬ ਵਿੱਚ ਰੱਖਿਆ ਮੰਤਰੀ ਬੇਨੀ ਗੇਟਜ ਨੇ ਕਿਹਾ, ਈਰਾਨ ਵਿੱਚ ਹੋਣ ਵਾਲੀ ਹਰ ਘਟਨਾ ਦੇ ਪਿੱਛੇ ਸਾਡਾ ਹੱਥ ਹੋਣਾ ਜ਼ਰੂਰੀ ਨਹੀਂ। ਐਟਮੀ ਟੈਕਨਾਲੋਜੀ ਦੀਆਂ ਆਪਣੀਆਂ ਮੁਸ਼ਕਲਾਂ ਹਨ ਅਤੇ ਉਨ੍ਹਾਂ ਦੇ ਸੁਰੱਖਿਆ ਮਾਪਦੰਡਾਂ ਵਿੱਚ ਭਾਰੀ ਕਮੀ ਹੈ। ਮੈਂ ਇਹ ਪੱਕੇ ਤੌਰ 'ਤੇ ਨਹੀਂ ਕਹਿ ਸਕਦਾ ਕਿ ਉਹ ਇਸ ਨੂੰ ਤਰੀਕੇ ਨਾਲ ਚਲਾਉਣ ਦੇ ਸਮਰੱਥ ਵੀ ਹਨ।
ਦੂਸਰੇ ਪਾਸੇ ਰਾਈਟਰ ਨਾਲ ਗੱਲਬਾਤ ਵਿੱਚ ਤਿੰਨ ਈਰਾਨੀ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਨਤਾਂਜ ਵਿੱਚ ਹੋਇਆ ਧਮਾਕਾ ਸਾਈਬਰ ਹਮਲੇ ਦਾ ਨਤੀਜਾ ਸੀ, ਪਰ ਇਸ ਦਾ ਕੋਈ ਸਬੂਤ ਨਹੀਂ ਹੈ। ਇਨ੍ਹਾਂ ਵਿੱਚੋਂ ਦੋ ਅਧਿਕਾਰੀਆਂ ਨੇ ਇਸ ਪਿੱਛੇ ਇਜ਼ਰਾਈਲ ਦਾ ਹੱਥ ਹੋਣ ਦਾ ਸ਼ੱਕ ਜ਼ਾਹਿਰ ਕੀਤਾ ਸੀ। ਈਰਾਨ ਦੀ ਸਰਕਾਰੀ ਨਿਊਜ਼ ਏਜੰਸੀ ਇਰਨਾ ਵਿੱਚ ਛਪੇ ਇੱਕ ਲੇਖ ਵਿੱਚ ਕਿਹਾ ਗਿਆ ਹੈ ਕਿ ਇਸ ਹਮਲੇ ਪਿੱਛੇ ਇਜ਼ਰਾਈਲ ਅਤੇ ਅਮਰੀਕਾ ਵਰਗੇ ਦੁਸ਼ਮਣਾਂ ਦਾ ਹੱਥ ਹੋ ਸਕਦਾ ਹੈ, ਪਰ ਇਸ ਲਈ ਸਿੱਧੇ ਤੌਰ 'ਤੇ ਕਿਸੇ ਨੂੰ ਜ਼ਿੰਮੇਵਾਰ ਨਹੀਂ ਕਿਹਾ ਗਿਆ। ਮੰਨਿਆ ਜਾਂਦਾ ਹੈ ਕਿ ਪੱਛਮੀ ਏਸ਼ੀਆ ਵਿੱਚ ਇਜ਼ਰਾਈਲ ਇੱਕੋ-ਇੱਕ ਐਟਮੀ ਤਾਕਤ ਹੈ ਤੇ ਉਸ ਨੇ ਇਹ ਧਾਰਿਆ ਹੋਇਆ ਹੈ ਕਿ ਈਰਾਨ ਨੂੰ ਕਿਸੇ ਵੀ ਕੀਮਤ 'ਤੇ ਪਰਮਾਣੂ ਹਥਿਆਰ ਨਹੀਂ ਬਣਾਉਣ ਦੇਵੇਗਾ। ਇਜ਼ਰਾਈਲ ਇਸ ਨੂੰ ਆਪਣੀ ਹੋਂਦ ਲਈ ਖਤਰਾ ਮੰਨਦਾ ਹੈ।