ਆਪਣੇ ਬਿਹਤਰੀਨ ਕਿਰਦਾਰਾਂ ਤੋਂ ਸਿਨੇ ਪ੍ਰੇਮੀਆਂ ਦੇ ਦਿਲਾਂ ਵਿੱਚ ਆਪਣੀ ਖਾਸ ਜਗ੍ਹਾ ਬਣਾ ਚੁੱਕੇ ਅਨੂੰ ਕਪੂਰ ਨੇ ਹਿੰਦੀ ਸਿਨੇਮਾ ਵਿੱਚ 38 ਸਾਲ ਦਾ ਸਫਰ ਪੂਰਾ ਕੀਤਾ ਹੈ। ਇਸ ਮੌਕੇ 'ਤੇ ਟਵਿੱਟਰ 'ਤੇ ਇੱਕ ਤਸਵੀਰ ਸਾਂਝੀ ਕਰਦੇ ਹੋਏ ਅਨੂੰ ਨੇ ਲਿਖਿਆ, ‘‘ਹਿੰਦੀ ਸਿਨੇਮਾ ਵਿੱਚ ਆਪਣੇ 38 ਸਾਲਾਂ ਦੇ ਸੰਘਰਸ਼ ਦਾ ਜਸ਼ਨ ਮਨਾ ਰਿਹਾ ਹਾਂ। 29 ਜੂਨ 1982 ਨੂੰ ਜੇਬ ਵਿੱਚ 419 ਰੁਪਏ 25 ਪੈਸਿਆਂ ਨਾਲ ਮੈਂ ਸੁਫਨਿਆਂ ਦੇ ਸ਼ਹਿਰ ਪਹੁੰਚਿਆ ਸਾਂ।”
ਵਰਨਣ ਯੋਗ ਹੈ ਕਿ ਥੀਏਟਰ ਤੇ ਨਾਟਕਾਂ ਤੋਂ ਹੁੰਦੇ ਹੋਏ ਅਨੂੰ ਕਪੂਰ ਨੂੰ ਸਾਲ 1983 ਵਿੱਚ ਪਹਿਲੀ ਵਾਰ ਸ਼ਿਆਮ ਬੈਨੇਗਲ ਦੇ ਨਿਰਦੇਸ਼ਨ ਵਿੱਚ ਫਿਲਮ ‘ਮੰਡੀ’ ਵਿੱਚ ਕੰਮ ਕਰਨ ਦਾ ਮੌਕਾ ਮਿਲਿਆ। ਉਸ ਦੇ ਬਾਅਦ ਉਨ੍ਹਾਂ ਦੇ ਕਰੀਅਰ ਦੀ ਗੱਡੀ ਚਲ ਪਈ। ‘ਉਤਸਵ’, ‘ਮਿਸਟਰ ਇੰਡੀਆ’, ‘ਤੇਜਾਬ’ ਅਤੇ ‘ਸਾਤ ਖੂਨ ਮੁਆਫ’ ਵਰਗੀਆਂ ਫਿਲਮਾਂ ਨਾਲ ਉਨ੍ਹਾਂ ਨੇ ਆਪਣੀ ਅਲੱਗ ਪਛਾਣ ਬਣਾਈ। ਸਾਲ 2012 ਵਿੱਚ ਬਣੀ ਫਿਲਮ ‘ਵਿੱਕੀ ਡੋਨਰ’ ਵਿੱਚ ਡਾਕਟਰ ਬਲਦੇਵ ਚੱਢਾ ਦੇ ਕਿਰਦਾਰ ਲਈ ਉਨ੍ਹਾਂ ਨੂੰ ਫਿਲਮਫੇਅਰ ਬੈਸਟ ਸਪੋਰਟਿੰਗ ਐਕਟਰ ਦਾ ਪੁਰਸਕਾਰ ਮਿਲਿਆ। ਅੰਤਾਕਸ਼ਰੀ ਅਤੇ ਜਲਸਾ ਵਰਗੇ ਟੀ ਵੀ ਸ਼ੋਜ਼ ਵਿੱਚ ਉਹ ਘਰ ਘਰ ਲੋਕਪ੍ਰਿਯ ਹੋਏ। ਆਉਣ ਵਾਲੇ ਸਮੇਂ ਵਿੱਚ ਅਨੂੰ ਇਮਰਾਨ ਹਾਸ਼ਮੀ ਅਤੇ ਅਮਿਤਾਬ ਬੱਚਨ ਦੀ ਫਿਲਮ ‘ਚਿਹਰੇ' ਵਿੱਚ ਨਜ਼ਰ ਆਉਣਗੇ।