ਵਾਸ਼ਿੰਗਟਨ, 5 ਜੁਲਾਈ, (ਪੋਸਟ ਬਿਊਰੋ)- ਦੁਨੀਆ ਭਰ ਵਿੱਚ ਫੈਲੇ ਹੋਏ ਕੋਰੋਨਾ ਵਾਇਰਸ ਬਾਰੇ 239 ਵਿਗਿਆਨੀਆਂ ਨੇ ਸੰਸਾਰ ਸਿਹਤ ਸੰਗਠਨ (ਡਬਲਿਊ ਐੱਚ ਓ) ਨੂੰ ਸਾਂਝੀ ਚਿੱਠੀ ਲਿਖ ਕੇ ਚੇਤਾਵਨੀ ਦਿੱਤੀ ਹੈ। ਕਰੀਬ 32 ਦੇਸ਼ਾਂ ਨਾਲ ਸੰਬੰਧਤ ਇਨ੍ਹਾਂ ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਕੋਰੋਨਾ ਵਾਇਰਸ ਹਵਾ ਵਿਚ ਵੀ ਰਹਿੰਦਾ ਹੈ। ਉਹ ਇਹ ਚਿੱਠੀ ਅਗਲੇ ਦਿਨਾਂ ਵਿੱਚ ਕਿਸੇ ਜਰਨਲ ਵਿਚ ਛਾਪਣਾ ਚਾਹੁੰਦੇ ਸਨ, ਪਰ ਇਸ ਤੋਂ ਪਹਿਲਾਂ ਇਹ ਚਿੱਠੀ ਮੀਡੀਆ ਵਿੱਚ ਲੀਕ ਹੋ ਗਈ ਹੈ, ਜਿਸ ਵਿੱਚ ਵਿਗਿਆਨੀਆਂ ਨੇ ਗਾਈਡਲਾਈਨਸ ਨੂੰ ਬਦਲਣ ਦੀ ਮੰਗ ਕੀਤੀ ਹੈ।
ਇਸ ਬਾਰੇ ਨਿਊਯਾਰਕ ਟਾਈਮਜ਼ ਦੀ ਰਿਪੋਰਟ ਮੁਤਾਬਕ 239 ਵਿਗਿਆਨੀਆਂ ਨੇ ਸੰਸਾਰ ਸਿਹਤ ਸੰਗਠਨ ਨੂੰ ਲਿਖੀ ਚਿੱਠੀ ਵਿਚ ਕਿਹਾ ਹੈ ਕਿ ਹਵਾ ਵਿਚ ਮੌਜੂਦ ਮਾਮੂਲੀ ਕਣਾਂ ਨਾਲ ਵੀ ਲੋਕ ਪ੍ਰਭਾਵਤ ਹੋ ਰਹੇ ਹਨ ਤੇ ਲੱਗਦਾ ਹੈ ਕਿ ਕੋਰੋਨਾ ਵਾਇਰਸ ਹਵਾ ਵਿਚ ਲੰਬਾ ਸਮਾਂ ਰਹਿ ਸਕਦਾ ਅਤੇ ਕਈ ਮੀਟਰ ਦਾ ਫਾਸਲਾ ਤੈਅ ਕਰਕੇ ਨੇੜਲੇ ਲੋਕਾਂ ਨੂੰ ਇਸ ਨਾਲ ਪ੍ਰਭਾਵਤ ਕਰ ਸਕਦਾ ਹੈ। ਵਿਗਿਆਨੀਆਂ ਦੀ ਇਹ ਗੱਲ ਠੀਕ ਹੋਵੇ ਤਾਂ ਬੰਦ ਕਮਰੇ ਵਿਚ ਜਾਂ ਹੋਰ ਥਾਂ ਵੀ ਏਦਾਂ ਦਾ ਇਨਫੈਕਸ਼ਨ ਤੇਜ਼ੀ ਨਾਲ ਫੈਲ ਰਿਹਾ ਹੋ ਸਕਦਾ ਹੈ ਅਤੇ ਇਸ ਲਈ ਸਕੂਲਾਂ, ਦੁਕਾਨਾਂ ਤੇ ਅਜਿਹੀਆਂ ਹੋਰ ਥਾਵਾਂ ਉੱਤੇ ਕੰਮ ਕਰਦੇ ਲੋਕਾਂ ਨੂੰ ਹੋਰ ਸਾਵਧਾਨੀ ਵਰਤਣੀ ਹੋਵੇਗੀ। ਵਿਗਿਆਨੀਆਂ ਦੇ ਮੁਤਾਬਕ ਬੱਸ ਵਿਚ ਯਾਤਰਾ ਕਰਨਾ ਵੀ ਖਤਰਨਾਕ ਹੋ ਸਕਦਾ ਹੈ, ਕਿਉਂਕਿ ਕਰੀਬ 2 ਮੀਟਰ ਦੂਰ ਬੈਠਣ ਉੱਤੇ ਵੀ ਲੋਕ ਕੋਰੋਨਾ ਵਾਇਰਸ ਤੋਂ ਪ੍ਰਭਾਵਤ ਹੋ ਸਕਦੇ ਹਨ।
ਸੰਸਾਰ ਸਿਹਤ ਸੰਗਠਨ ਨੂੰ ਚਿੱਠੀ ਲਿਖਣ ਵਾਲੇ ਇਨ੍ਹਾਂ 239 ਵਿਗਿਆਨੀਆਂ ਦੀ ਟੀਮ ਵਿਚ ਸ਼ਾਮਲ ਆਸਟ੍ਰੇਲੀਆ ਦੀ ਕੁਈਨਜ਼ਲੈਂਡ ਯੂਨੀਵਰਸਿਟੀ ਆਫ ਤਕਨਾਲੋਜੀ ਦੀ ਪ੍ਰੋਫੈਸਰ ਲਿਡੀਯਾ ਮੋਰਾਵਸਕਾ ਨੇ ਕਿਹਾ ਹੈ ਕਿ ‘ਅਸੀਂ ਇਹ ਗੱਲ 100 ਫੀਸਦੀ ਭਰੋਸੇ ਨਾਲ ਕਹਿ ਰਹੇ ਹਾਂ।` ਵਿਗਿਆਨੀਆਂ ਦੇ ਨਵੇਂ ਦਾਅਵੇ ਨਾਲ ਵਿਸ਼ਵ ਸਿਹਤ ਸੰਗਠਨ ਨੂੰ ਆਪਣੀਆਂ ਗਾਈਡਲਾਈਨਸ ਬਦਲਣੀਆਂ ਪੈ ਸਕਦੀਆਂ ਹਨ। ਜਿਨ੍ਹਾਂ ਥਾਵਾਂ ਉੱਤੇ ਵੈਂਟੀਲੇਸ਼ਨ ਸਹੂਲਤਾਂ ਦੇ ਵਧੀਆ ਪ੍ਰਬੰਧ ਨਹੀਂ ਹਨ, ਓਥੇ ਲੋਕਾਂ ਨੂੰ ਦੂਰ ਬੈਠਣ ਦੇ ਬਾਵਜੂਦ ਬਾਕਾਇਦਾ ਮਾਸਕ ਪਾਉਣਾ ਪੈ ਸਕਦਾ ਹੈ। ਵਿਸ਼ਵ ਸਿਹਤ ਸੰਗਠਨ ਦਾ ਅਜੇ ਤੱਕ ਇਹ ਕਹਿਣਾ ਸੀ ਕਿ ਮੁੱਖ ਤੌਰ ਉੱਤੇ ਕੋਰੋਨਾ ਵਾਇਰਸ ਪੀੜਤ ਵਿਅਕਤੀ ਦੀ ਖੰਘ ਜਾਂ ਛਿੱਕ ਨਾਲ ਸਾਹ ਦੀਆਂ ਵੱਡੀਆਂ ਬੂੰਦਾਂ ਦੇ ਰਾਹੀਂ ਹੀ ਫੈਲਦਾ ਹੈ, ਪਰ ਇਹ ਵਿਗਿਆਨੀ ਇਸ ਨਾਲ ਸਹਿਮਤ ਨਹੀਂ।