ਇਸਲਾਮਾਬਾਦ, 5 ਜੁਲਾਈ, (ਪੋਸਟ ਬਿਊਰੋ)- ਪਾਕਿਸਤਾਨ ਵਿੱਚ ਰਾਜ ਕਰਦੀ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ ਪਾਰਟੀ ਨੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ ਤੀਜੀ ਪਤਨੀ ਬੁਸ਼ਰਾ ਬੀਬੀ ਤੇ ਪਾਕਿਸਤਾਨੀ ਫੌਜ ਬਾਰੇ ਟਿਪਣੀਆਂ ਕਰਨ ਦੇ ਦੋਸ਼ ਵਿੱਚ ਆਪਣੀ ਮਹਿਲਾ ਵਿਧਾਇਕ ਓਜ਼ਮਾ ਕਾਰਦਾਰ ਨੂੰ ਇੱਕ ਆਡੀਓ ਟੇਪ ਲੀਕ ਕੇਸ ਦੇ ਕਾਰਨ ਪਾਰਟੀ ਵਿੱਚੋਂ ਕੱਢ ਦਿੱਤਾ ਹੈ। ਦੱਸਿਆ ਗਿਆ ਹੈ ਕਿ ਓਜ਼ਮਾ ਨੇ ਕਿਸੇ ਪੱਤਰਕਾਰ ਨਾਲ ਗੱਲਬਾਤ ਵਿਚ ਇਮਰਾਨ ਖਾਨ ਦੀ ਪਤਨੀ ਦੇ ਖਿਲਾਫ ਦੋਸ਼ ਲਾਏ ਸਨ, ਜਿਸ ਨੂੰ ਰਿਕਾਰਡ ਕਰ ਕਰ ਕੇ ਬਾਅਦ ਵਿਚ ਵਾਇਰਲ ਕਰ ਦਿੱਤਾ ਗਿਆ ਸੀ।
ਅੱਜ ਇੱਕ ਬਿਆਨ ਜਾਰੀ ਕਰ ਕੇ ਪਾਕਿਸਤਾਨ ਤਹਿਰੀਕੇ ਇਨਸਾਫ (ਪੀ ਟੀ ਆਈ) ਨੇ ਦੱਸਿਆ ਹੈ ਕਿ ਉਸ ਨੇ ਪੰਜਾਬ ਵਿਧਾਨ ਸਭਾ ਦੀ ਮੈਂਬਰ ਓਜ਼ਮਾ ਕਰਦਾਰ ਨੂੰ ਅਨੁਸ਼ਾਸਨ ਦਾ ਉਲੰਘਣ ਕਰਨ ਦੇ ਦੋਸ਼ ਹੇਠ ਪਾਰਟੀ ਤੋਂ ਕੱਢਿਆ ਹੈ। ਪਾਰਟੀ ਨੇ ਇਸ ਬਾਰੇ ਕੋਈ ਹੋਰ ਗੱਲ ਨਹੀਂ ਕਹੀ। ਕਰਦਾਰ ਨੇ 2018 ਦੀਆਂ ਚੋਣਾਂ ਵਿਚ ਔਰਤਾਂ ਲਈ ਰਿਜ਼ਰਵ ਸੀਟ ਪੀ ਟੀ ਆਈ ਉਮੀਦਵਾਰ ਵਜੋਂ ਜਿੱਤੀ ਸੀ। ਉਹ ਪੰਜਾਬ ਦੇ ਸਭ ਤੋਂ ਸਰਗਰਮ ਨੇਤਾਵਾਂ ਵਿਚੋਂ ਗਿਣੀ ਜਾਂਦੀ ਹੈ।
ਪਤਾ ਲੱਗਾ ਹੈ ਕਿ ਓਜ਼ਮਾ ਨੇ ਇਸ ਗੱਲਬਾਤ ਵਿਚ ਕਿਹਾ ਸੀ ਕਿ ਦੇਸ਼ ਨੂੰ ਪ੍ਰਧਾਨ ਮੰਤਰੀ ਇਮਰਾਨ ਦੀ ਪਤਨੀ ਬੁਸ਼ਰਾ ਬੀਬੀ ਚਲਾ ਰਹੀ ਹੈ ਅਤੇ ਉਹ ਆਪਣੀ ਪਤਨੀ ਤੋਂ ਬਿਨਾਂ ਪੁੱਛੇ ਕੋਈ ਕੰਮ ਨਹੀਂ ਕਰ ਸਕਦੇ। ਉਹ ਇਮਰਾਨ ਖਾਨ ਦਾ ਚਿਹਰਾ ਪੜ੍ਹ ਲੈਂਦੀ ਅਹੈ ਤੇ ਉਸ ਨੂੰ ਪਤਾ ਲੱਗ ਜਾਂਦਾ ਹੈ ਕਿ ਇਮਰਾਨ ਦਾ ਅੱਜ ਦਾ ਦਿਨ ਕਿਵੇਂ ਲੰਘਿਆ ਹੈ। ਓਜ਼ਮਾ ਇਸ ਦੌਰਾਨ ਕਹਿੰਦੀ ਹੈ ਕਿ ਇਮਰਾਨ ਨੂੰ ਬੁਸ਼ਰਾ ਹੀ ਚਲਾ ਰਹੀ ਹੈ। ਬੁਸ਼ਰਾ ਨੇ ਘਰ ਵਿਚ ਇਕ ਲਾਈਨ ਖਿੱਚ ਦਿੱਤੀ ਹੈ, ਉਸ ਦੇ ਅੱਗੇ ਕੋਈ ਨਹੀਂ ਜਾ ਸਕਦਾ। ਪਹਿਲਾਂ ਅਸੀਂ ਲੋਕ ਆਰਾਮ ਨਾਲ ਇਮਰਾਨ ਦੇ ਘਰ ਚਲੇ ਜਾਂਦੇ ਸੀ, ਪਰ ਬੁਸ਼ਰਾ ਦੇ ਆਉਣ ਪਿੱਛੋਂ ਬਾਕੀਆਂ ਨੂੰ ਛਡੋ, ਵਿਦੇਸ਼ ਮੰਤਰੀ ਸ਼ਾਹ ਮਹਿਮੂਦ ਕੁਰੈਸ਼ੀ ਵੀ ਅੰਦਰ ਨਹੀਂ ਜਾ ਸਕਦੇ।
ਮਿਲੀ ਜਾਣਕਾਰੀ ਅਨੁਸਾਰ ਇਸ ਗੱਲਬਾਤ ਦੌਰਾਨ ਓਜ਼ਮਾ ਨੇ ਪਾਕਿਸਤਾਨੀ ਫੌਜ ਬਾਰੇ ਵੀ ਕਾਫੀ ਕੁਝ ਕਿਹਾ ਅਤੇ ਦਾਅਵਾ ਕੀਤਾ ਹੈ ਕਿ ਸਰਕਾਰ ਦੇ ਕੰਮ ਵਿਚ ਫੌਜ ਦਾ ਪੂਰਾ ਦਖਲ ਹੈ ਅਤੇ ਇਸ ਗਲਤ ਕੀ ਹੈ, ਪਾਕਿਸਤਾਨ ਵਿਚ ਇਹ ਹਮੇਸ਼ਾ ਤੋਂ ਹੁੰਦਾ ਆਇਆ ਹੈ। ਇਥੇ ਫੌਜ ਦੇ ਬਿਨਾਂ ਕੋਈ ਸਰਕਾਰ ਚੱਲ ਹੀ ਨਹੀਂ ਸਕਦੀ।