ਲੰਡਨ, 3 ਜੁਲਾਈ (ਪੋਸਟ ਬਿਊਰੋ)- ਗ੍ਰੇਟ ਬਾਰ ਦੀ ਵਿੰਨਸਲੇਡੇਲ ਰੋਡ ਦੇ ਰਹਿਣ ਵਾਲੇ 52 ਸਾਲਾ ਇੰਦਰਜੀਤ ਰਾਮ ਨੂੰ ਆਪਣੀ ਇੱਕ ਕਰਮਚਾਰੀ 63 ਸਾਲਾ ਮਿਸਿਜ਼ ਬਲਿੰਦਾ ਰੋਜ਼ ਦੇ ਕਤਲ ਕੇਸ ਵਿੱਚ ਬਰਮਿੰਘਮ ਕੋਰਟ ਨੇ 10 ਸਾਲ ਕੈਦ ਦੀ ਸਜ਼ਾ ਸੁਣਾਈ ਹੈ। ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਇੰਦਰਜੀਤ ਬਜ਼ੁਰਗਾਂ ਦੇ ਰਹਿਣ-ਸਹਿਣ ਤੇ ਦੇਖ ਭਾਲ ਕਰਨ ਵਾਲੀ ਸਸਟੇਨ ਯੂ ਕੇ ਨਾਮੀ ਕੰਪਨੀ ਚਲਾਉਂਦਾ ਸੀ, ਜਿਸ ਵਿੱਚ ਰੋਜ਼ੀ ਵੀ ਕੰਮ ਕਰਦੀ ਸੀ। 2007 'ਚ ਇੱਕ ਪਰਵਾਰਕ ਮੈਂਬਰ ਦੀ ਮੌਤ ਤੋਂ ਬਾਅਦ ਇੰਦਰਜੀਤ ਆਰਥਿਕ ਸੰਕਟ ਕਾਰਨ ਪ੍ਰੇਸ਼ਾਨ ਰਹਿਣ ਲੱਗਾ, ਜਿਸ ਲਈ ਉਹ ਲੋਕਾਂ ਤੋਂ ਮਦਦ ਮੰਗਣ ਲੱਗਾ ਅਤੇ ਨਾਂਹ ਹੋਣ 'ਤੇ ਉਹ ਅਕਸਰ ਗੁੱਸੇ 'ਚ ਆ ਜਾਂਦਾ ਸੀ।
ਮਿਸਿਜ਼ ਰੋਜ਼ ਦੇ ਪਤੀ ਨੂੰ ਅਧਰੰਗ ਹੋਣ ਕਾਰਨ ਉਸ ਨੇ ਕੰਮ ਤੋਂ ਸਮਾਂ ਘਟਾ ਲਿਆ, ਜਿਸ ਕਾਰਨ ਇੰਦਰਜੀਤ ਦੀਆਂ ਕਾਰੋਬਾਰੀ ਪ੍ਰੇਸ਼ਾਨੀਆਂ ਹੋਰ ਵੱਧ ਗਈਆਂ। ਉਸ ਨੇ ਮਿਸਿਜ਼ ਰੋਜ਼ ਤੋਂ ਵੀ ਪੈਸਿਆਂ ਦੀ ਮੰਗ ਕੀਤੀ ਸੀ। ਬੀਤੇ ਸਾਲ 17 ਅਗਸਤ ਨੂੰ ਇੰਦਰਜੀਤ ਰਾਮ ਨੇ ਮਿਸਿਜ਼ ਰੋਜ਼ ਨੂੰ ਪੈਰੀ ਬਾਰ ਦੀ ਪੈਨਡਰੈਗਨ ਰੋਡ ਦੀ ਇੱਕ ਜਾਇਦਾਦ ਵਿੱਚ ਸੱਦਿਆ, ਜਿੱਥੇ ਦੋਵਾਂ ਦਾ ਕਿਸੇ ਕਾਰਨ ਝਗੜਾ ਹੋਇਆ ਅਤੇ ਇੰਦਰਜੀਤ ਨੇ ਰੋਜ਼ ਉਤੇ ਚਾਕੂ ਨਾਲ ਪੰਜ ਵਾਰ ਕੀਤੇ ਅਤੇ ਉਸ ਨੂੰ ਸੋਫ਼ੇ 'ਤੇ ਡਿੱਗੀ ਛੱਡ ਕੇ ਚਲਾ ਗਿਆ। ਇੰਦਰਜੀਤ ਨੇ ਉਕਤ ਘਟਨਾ ਬਾਰੇ ਆਪਣੀ ਪਤਨੀ ਨੂੰ ਦੱਸਿਆ ਅਤੇ ਖ਼ੁਦ ਪੁਲਸ ਸਟੇਸ਼ਨ ਜਾ ਕੇ ਪੇਸ਼ ਹੋ ਗਿਆ। ਇੰਦਰਜੀਤ ਨੇ ਮਨੁੱਖੀ ਹੱਤਿਆ ਦਾ ਦੋਸ਼ ਕਬੂਲਦਿਆਂ ਕਤਲ ਤੋਂ ਇਨਕਾਰ ਕੀਤਾ ਹੈ। ਜੱਜ ਇਨਮਾਨ ਨੇ 10 ਸਾਲ ਕੈਦ ਦੀ ਸਜ਼ਾ ਸੁਣਾਉਂਦਿਆਂ ਕਿਹਾ ਹੈ ਕਿ ਸਜ਼ਾ ਪੂਰੀ ਹੋਣ ਤੋਂ ਬਾਅਦ ਇੰਦਰਜੀਤ ਰਾਮ ਨੂੰ ਪੰਜ ਸਾਲ ਵਿਸ਼ੇਸ਼ ਨਿਗਰਾਨੀ ਹੇਠ ਰੱਖਣ ਦੇ ਹੁਕਮ ਦਿੱਤੇ ਜਾਂਦੇ ਹਨ। ਜ਼ਿਕਰ ਯੋਗ ਹੈ ਕਿ ਇੰਦਰਜੀਤ ਰਾਮ ਨੂੰ ਪਹਿਲਾਂ ਵੀ ਹਿੰਸਕ ਹਮਲੇ ਦੇ ਸਬੰਧ 'ਚ ਛੇ ਮਹੀਨੇ ਸਜ਼ਾ ਹੋਈ ਸੀ।